عـــجران: يبغى دعم كي يطير مباشرة من الساحة الــعامــه إلــى برنامج نسايم ليل

[عجران]

السلام عليكم ورحمة الله وبركاته

تحياتي وأشواقي لأعضاء هذه الساحة الغالية

وبدون مقدمات

فقط شجعوني وحاولوا صقل موهبتي

وأبشروا بالشعر اللي ماقد مر عليكم ..

وسوف اعتزل جميع المنتديات وأبقى عندكم

كي أذكر (( اسم )) جميع من ساعدني ووقف معي في بداياتي

في برنامج الشعر :

نســـــــــايم ليــــــــــــــــل..


في حالة رغبتهم في إستضافتي تقديراُ لشاعريتي في هذا البرنامج

والذي يقدمة المذيع الشين :


نجاح الموجي ..

الممثل المصري المعروف ..>> تمويه ..

وإعتباراً من اليوم سوف أنثر إبداعاتي الشعرية على هذه الصفحات بلا توقف

فشجعوني وأنتقدوني

فإن السير على طريق النجاح يتطلب المرور على محطة الإنتقاد ..

فتفضلوا ماكتبت من قصائد وسوف تتطور إن شاء الله بدعمكم ..

وإذا عندكم إهداءات عبر موضوعي فليس عندي مانع

فكل ما اكتبه لم يعد ملكي وإنما هو ملككم انتم

وإذا لديكم طلبات وتريدون أن نكتب فيها فهاتوا

حتى لو تبغوني اكتب في بيالة شاي ..

ماعندي مانع ..

ونبدأ أولى القصائد

وهي قصيدة في الجمل ( البعير ) :

قالوا : أصيل .. وقلت بالحيل بالحيل *** رمز الأصالة والصبر يوصفونه

قالوا : عـــــرفنا مقصدك دون تحليل *** جيبٍ فـــــــريدٍ بالغلا يشترونه

قلت : أسكتوا مــاظن يصنع له مثيل *** لـو ينقطع جنسه لقينا المهونه

هذا البعــــير اللي مثل نجمة سهيل *** لو يــــرخص الفكس ار مايتركونه .. :


:


وهذي القصيده قلتها في إعتزالي الــمنـتـديات وإتجاهي للرسم :

ياناس أنا مليت طعم الكتابه ... ودي بساحه كلبوها شخاميط

ترسم على راحتك بليا رتابه ... وكل الرسوم تجيك من دون تنقيط

طعم الملل ذقته وشفت الكآبه ... لاشك طعم الرسم مثل الزلاميط ..

س : مامعنى زلاميط ..؟

ج : هي كلمة تناسب القافية دون العلم بمعناها ، ولكن شكلها يوحي بانها حلوى ..

:

:


وهذي القصيده كتبتها في إساءة الظن من البعض تجاهي

>> عشان تعرفون اني مظلوم وإن الشعر اللي قدامكم ماجاء من فراغ ..

عز الله إني ياولد ماشي ٍ هيك *** لا ني يمين ولا مسكت الشمالي

مثل الألف دربي ولا فيه تفريك *** متجنب العالم وجالس لحالي

وأليا كتبت الحرف ماقصدي اوذيك *** وش فيك تنشب لي وكنك ظلالي

تقول لي يافلان وش قصدك بذيك *** وش لون تذكرها وانا عنك سالي

وأقول لك يـــــــــافلان الله يقديك *** شيء كتبته مـــــن نــوادر خيالي

أثرك خبل والناس مخدوعة فيك *** عقلك هواء والجسم جسم الجبالي ..

:

:

وهذي قصيده كتبتها في الحبيبة وتناقلتها المنتديات لروعتها وكذلك مجلة فواصل

وأشترتها مني مجلة المختلف ..

ولكن الحبيبة توفيت بسبب عين ممن أعجبتهم أوصافها وتمنى مثلها

وأقول فيها :


يازين حبك عافي ٍ حالتي عفس *** صبحي مسا والليل أصبح قوايل

لاجيت ابرقد قام فكري يهوجس *** وأتخيل أسمك صار بدفتر عوايل

ازريت اقاوم حبك اللي تفقس *** وقـــــــــام يتكاثر من جميع الوسايل

تلخبط التاريخ عندي وتلحوس *** مدري أنا صاحي .. او من العقل زايل

حبك لحس مخي ومع اللحس فلس *** وماباقي إلا العظم وبعض السوايل

هبلت بي ياجعل وجهك يخَـفـَس *** صرت البس الغتره على عقال مايل

وأفطر مرق وأخلط مع الشاهي الببس *** ومعــاد اميز بين نيدو وسايل

يابو مبيسم فيه من شنطة الجمس *** بعدك ترى عني يسوي الهوايل

ولك شفة ٍ تشبه كفر كابرس أس *** مــانستمع فيها على قــول قايل

ولون ٍ فريد ٍ أسود ٍ غامق أدمس *** من طيب لونه صار لون الأصايل

لامن ذكرت الجسم والوجه الأملس *** تطري علي عتاب بنت القبايل

طالبك ياحظي تقوم مرة ٍ بس *** وتكـمـــــل المشروع ونصبح حلايل

هذا الذي حبه دبس خافقي دبس *** غيره أبد ما اقبل جميع البدايل ..

الله يرحمها ويرزق أعضاء هذه الساحه شبيهاتها ..
:

:

وهذي القصيده قلتها في جوالي عندما توفى في مسبح :

جوالي اللي كل ساعه يطنطن *** مدري مرض وألا عيون الجماعه

ساعه رفعته قام في يديني يزن *** بصوت غريب ماخبرت إستماعه

ناديت له وسميت لايكون بك جن *** حتى إرسال البث زاد إنقطاعه

دعا علي وقال : أحرمتني الرن *** وسامحتك الله يارفيق المجاعه

لكن وصاتي دام بي روح ٍ توِن *** شريحتي لاتموت خذها بضاعه

وساعة فتحته شفت بطنه معفن *** أثره شرب مويه .. وأعلن وداعه ..

:

:

وهذي إحدى قصائدي في الدفتر :

يالدفتر الماخوذ وش فيك تنقص *** نبغى الزياده وأثر مافيك مصلوح
خابرك ابو ستين واليوم بك النص *** وش السبب لاتكون زعلان يالوح

قال : احترم نفسك لا في بطنك ارقص *** انا ورق ماني مثل ماقلت لي لوح

قلت العفو ياخوك ...................................................................

هذي في طريقها للإكمال لاحقاً ..


:

:


ونرجو إبداء الرأي ترى الدعوه كلها مواهب وحروف ..

والساحه إسمها الساحه العــــامــــه ..

والبرنامج اللي انتم خابرين ماعنده مانع يستضيف مثلي ..

[مدرعـم]

http://modr3m.alhilalclub.com/close.gif

• تمنع المواضيع المكرره والمنقولة من الايميل أو من المنتديات أو القروبات و يستثنى منها الأخبار الطارئه والمواضيع الدينية مع اشتراط ذكر المصدر لأي خبر أو موضوع ديني منقول .

http://www.alhilalclub.com/vb/showthread.php?s=&threadid=65419