[ عيون شفتها صدفة وأنا من يومها ضايع ] [الأرشيف]

مشاهدة النسخة كاملة : [ عيون شفتها صدفة وأنا من يومها ضايع ]

الكاسر888

10/5/2006, 17:37

http://9q9q.com/May/1147263572.jpg

الساعة 4 الفجر بدأت اشعة الشمس تبدد ظلام القاهرة مع وصول طائرة الخطوط الجوية العربية السعودية القادمة من الرياض ، وقبل حتى أن يسمح كابتن الطائرة بفك الأحزمة كان سلطان وتركي واقفين بينما ظل زياد في مقعده ويقولهم هيي أركدوا القاهرة مهب طايرة ..والعيال مزلبين في زياد.

فتح باب الطيارة وكان تركي وسلطان وزياد بعرجته البسيطة من أول الركاب هبوطا..سلطان وتركي متحمسين يشوفون القاهرة لان هالزيارة الأولى لهم للقاهرة بعكس زياد الي كانت سادس مرة يجي للقاهرة ..ماطولوا بمطار القاهرة الدولي حتى خلصوا الاجرائات خاصتن انهم رموا بخاشيش عشان يوصولن الفندق بسرعة..
طلعوا من باب المطار ويقابلهم سالم الي ضمه زياد بقوه ..وقال ها بشر ياسلووم خلصت الدراسه ضحك سالم وقال ايه ابشرك خلصت خمس أترام.

شالت الفولفوا سالم والشباب ومتجهين لفندق شيرتون الجزيرة..دخلوا السويت حقهم ..
سلطان وتركي متحمسين يشوفون القاهرة قالوا لسالم خل نروح نفطر قال يالله..زياد قال تعبان شوي ودي أريح..بالليل نطلع ياحلوين..تركوه العيال وانسدح زياد يريح ظهره..
زياد مستغرب أنه جاء مع العيال خاصة انه أخر مره زار القاهرة حلف انها زيارة الوداع لها المدينة الي يحبها أكثر من أي مدينة باالعالم ويكرها أكثر من أي مدينة في العالم..

يتذكر زياد زيارته الأولى للقاهرة هو وحمد ولد عمه النشبة..حمد ولد عمه نشبة حيل ولكن يحب زياد وكل مابغا زياد شيء سواه له لو هو أصعب شيء..
كان زياد جالس بحديقة فندق ماريوت ..العصر ..هو وحمد ومخمخ بمعسل كنتلوب مضبوط ..وحمد يسولف وزياد يقول ايه ..صح عليك..مضبوط ...جد والله..أما عاد..وهو مفهي بالطاولة الي جالسين ورى حمد..
التفت حمد عليهم بقوة ، قال هذولا البنات الي تبحلق فيهم أي وحدة بس عاجبتك ..زياد بفهاوة يقوله أقول انثبر وبلا خفة عقل..ويتلفت حمد ويتابع الي يناظرها زياد ، قال هذي أم تيشيرت أخضر عاجبتك ! ولايهم بس..وينقز حمد لطاولة البنات،" معليش أجلس معاكم!!"
قالوا لا ممنوع!.

http://9q9q.com/May/1147263335.jpg

قال: خوذي رقمي..قاموا البنات وصرخت فيهم راعية التيشيرت الأخضر ، الله يقلعكم يالسعوديين ورانا ورانا ..اوووووووووف..

ضحك حمد ورجع لزياد الي ابتسم له وماقال شيء، دق عليهم السواق قال خمس دقايق وجايكم..طلعوا مع السواق وراحوا عدة مشاوير ، وحضورا فلم بــ السيما ..

الساعة عشر محتارين وين يروحون ، قالهم السواق وش رايكم نروح قهاوي خان الخليلي ومسجد الحسين..قالوا رح

جالسين الثلاثة سوالفه وضحك شوي حمد يقول زياد زياد شف من جاء ..خوياتنا اليوم ههههههه
ناظرهم زياد واستغرب وش هالصدفه الي تصير للمره الثانيه اليوم!
رجع يكمل سوالف وهو يسولف حاس ان فيه شيء غلط بس مو عارف وشو!
يوم بغوا يمشون التفت يدورهم ، مالقاهم ..تنفس بعمق وارتاح..

http://9q9q.com/May/1147263680.jpg

طلعوا قالوا للسواق مر تكفى على الفرغلي مشتهين منقا ، مروا ويتلفت زياد يمين ويشوف البنات نفسهم للمره الثالثة اليوم ! استغرب حيل
وشوي يشوفهم نزلوا كلهم ماعدى الي عاجبته ..يفتح الجوال
يكتب ملاحظة

شتفها وياليتي ماشفتها..خقيت بسرعه لأني مشفوح!

قال خل اسوي سيرش وادور بلوتوث ، لقا اول اسم طلع له " بنت القمر"، ارسلها. وتم استقبال الرساله

شوي الا تناظره البنت تفتح الباب حق السياره الي هي راكبتها تنزل..وتتجه إلى زياد ..

يتبع

الهلاليه k.s.a

10/5/2006, 17:44

كمل كمل كمل كمل روووووووعه :love:
:d:

أسطورة الهلال

10/5/2006, 17:54

خليتنا ندمج معا الفيلم .... وبعدين تفصل علينا الكيبل

الله يهديك .... عطنا الجزء الثاني

ابوعايد

10/5/2006, 17:54

8
8
وشبلاس مبسوطه :amle:

ومشكور اخوي وبانتظارك

الزعيماوي

10/5/2006, 20:34

روووووووعة ..

بإنتظار الجزء الثاني .. :)

الدعيــ ( 1 ) ــع

10/5/2006, 21:35

بداية مشروع إبداعي يــ الكاسر ،، :)

شكلك ناوي تمسك فينا خطوط :jhgy:

أتمنى أنك توضح عدد أجزاء القصة من الآن ..

وبانتظار إبداعاتك ..

الديناصور

10/5/2006, 22:54

كمل كمل كمل كمل روووووووعه :love:
:d:

يحبن هالسواليف ...

ومشكووور يالكاسر ... بس أخاف راعية التي شيرت الأخضر تطلع سعودية << يعني أم ركب :angel:

o0o زراق o0o

10/5/2006, 23:15

الاتصالات فصلوا الخدمه عليه وراح يسدد ويرجع :jhgy: :d: :jhgy: :jhgy:

ننتظر بقية القصة

يعطيك العافية

سندباد_الهلال

11/5/2006, 04:51

عدد الأعضاء الذي يتصفحون هذا الموضوع : 2 (2 عضو و 0 ضيف)
سندباد_الهلال, الكاسر888

صدتك يالله نزل الجزء الثاااااااااااااني بسرررررعه :angel:

هلالي مغرور

11/5/2006, 06:47

ياخـي كمـل :slv:

ذكرتـن بمصـر .. وصدفتـي مـع غـلا :cry:

تقـول إن اسمهـا صدفـه .. وجـات فـي وقتـي الضايـع :love:

عيـون شفتهـا صدفـه .. وانـا مـن يومهـا ضايـع :(

تحياتـي لـك وبإنتظـار البقيّـه .. ابـوغـلا :(

الديناصور

11/5/2006, 16:22

عدد الأعضاء الذي يتصفحون هذا الموضوع : 2 (2 عضو و 0 ضيف)
الديناصور, الكاسر888

تولموا شباب ... تراه قاعد يكتب الي يتبع :angel: يعني البقية أو تكملة القصة ... أنا بس ودي أشوف أم تي شيرت أخضر وش تطلع أم ركب و إلا :qw: :love:

فتى الساحه

11/5/2006, 16:51

ضغطة على يتبع مطلع شي ليش لاتقول الهكرز حاسوا جهازي الله يرحم والديك لالالالالالالالا

الله يهديه زياد ماقال سالفته الى للكاسر يليت قالها لـ الدينا صور كان سرده مره وحده بلا تشويق بلا اثاره

يالله يالكاسر متى تنزل البومك الجديد ( يتبع )

جمهور يسأل عنك متى يكاسر

عاشق العثرات

12/5/2006, 18:14

الكاسر ..
واصل هطولك .. :)

الديناصور

12/5/2006, 18:27

^
^
^
^هلا عويشق ... حشى مو الكاسر ... هذا مطر ... :angel:

الملك العائد

12/5/2006, 18:37

والله انك تعليقه :d:
بس شكلك مسنتر في مصر ماراحو لشارع الاهرام يقولون منتاز
يمكن في الجزء الثاني
كمل والله اني تحمست اخاف بعدين تروح اللياقه
من اليوم وانا اسخن علشان موضوعك بسررررعه عجل علي متعلق :d: (himo)

الكاسر888

13/5/2006, 03:15

شكرا لجميع الاخوة المتابعين

بنزل الان الجزء الثاني..شكرا

الكاسر888

13/5/2006, 03:16

الجزء الثاني

ظن زياد أنها متجهه له ، إلا انها تجاوزته وراحت ورى..للمكان الي كان واقفات فيه البنات يسولفون مع بنت ثانية ، أخذ زياد نفس عميق ..والتفت عليه حمد قاله الله يفشلك الحين المفروض البنت ترتبك مهب انت..ضحك حمد وضحك السواق المصري ميمي..
جابلهم حق الفرغلي 3 كاسات منقا قزاز وشربوها بالسياره ورجعوا للرجال كاساته ..جاء السواق بيحرك..قال زياد اصبر ويتلفت ويشوف البنات قربوا من سياراتهم
يكتب مسج بالملاحظات :

تقول أن اسمها صدفة
وجت في وقتي الضايع
عيونن شفتها صدفه
وأنا من يومها ضايع

ويحط عقبها رقم جواله..

راح زياد وحمد والسواق ميمي لقهوة شقاوة بشارع الجامعة وهم جالسين وحمد كالعادة يتلفت كل ماشاف خليجية قام يتميلح عليها وهذي تصده وهذي ترده وهذي شوي تصفقه على وجهه بس ماعليه حمد ، وماتختلف عنده المقايس أهم شيء خليجية تجيه حلوه تجيه شينه ماهي مشكلة ، ياخذ حمد نفس معسل ويقول لزياد وميمي شوفي ذيك تناظر وأشرت لها بالرقم وابتسمت ، قال ميمي يله دي وحشة ..
قاله حمد " رجل الديكـ تجيب الديك" وهالشينة تجيب لي زينة ..
قام زياد يضحك على حمد..فهو معجب فيه بكل مافيه من وساعة وجه ومصاله وروح طيبة وانه مستمتع بكل لحظة بحياته ، وهم جالسين يدق جوال زياد دقة ويفصل ..ويناظر حمد ولد عمه ويقول رقم مصري ياحمد..يضحك حمد يقول رقمتها ياملعون وانا اقول هدي رضي وانت من ورانا ترقم ..دق عليها..دق عليها
قال زياد وش اقولها!!
قال حمد قلها وش اسم امك! حلوه ذي دق عليها وسولف
زياد يناظر الجوال ومتردد قال حمد دق عليها والا عطني اسولف معها..
دق زياد..ويدق..ويدق..ومايرد الرقم عليه!
شوي تجي رسالة لزياد..من نفس الرقم : تقول من انت..وراها زياد حمد..
يرد حمد برساله يقول " انا كوفي أنان ردي علي يا مادلين اولبرايت" ياشين دلعكم يالسعوديات..
ويعطي حمد الجوال لزياد يقوله تراني ارسلت لها كذا..زياد يضحك ومتنح قال تستهبل..قال شف جوالك الا يدق الرقم مرة ثانيه ، قال حمد دق عليها
يدق زياد الا ترد عليه البنت..هلا..كيفك..تمام..اجل انت كوفي عنان..ويناظر زياد حمد ويضحك ويقولها مهب انا هذا الخبل الي معي..تضحك البنت ويضحك زياد ويضحك حمد..ويضحك السواق الي كان مفهي لانه كان توه جاي من برى وضارب له صاروخ بانجو وجاي.
سولف زياد معها حوالي ساعة..عقب ماقفل..سئله حمد قاله وش اسمها يازياد..قال مدري
قال لعنبوا دارك لك ساعة تسولف ومقصر صوتك وش تقولون..لاتقولي انها تسمع لك حديث البخاري !
قال زياد : اسمها نورة ..
هلا هلا نورة...البلورة نورة ..اكشخ يابو نورة ..جاء حمد بيستهبل قاله زياد يرحم امك روقنا..قال حمد ابشر يابو نورة..
ركبوا السيارة وحمد وميمي يسولفون وميمي مروق ينكتب وحمد ينكتب وزياد راكب ورى وساكت!
وصولا الفندق وزياد ساكت انسدح زياد..دخل حمد اخذ شاور وطلع يصفر وشاف زياد للحين منسدح وساكت !
ناظره حمد قال الله يرحم والديك لاتسوي فيه حبيت..توك تعرفها وبلا حركات افلام هندية..قال زياد والحيرة بعيونه..حمد قالت لي خل نشوفك بكرة!
قال حمد: الحين البنت تبي تديتك ومرتبك ..خير فلها ياعم وابسط..
زياد يناظره بنظرة فيها حيرة وتوتر قاله بس انت عارف ياحمد..قاطعه وقاله بلا عارف بلا عصام ..دق عليها واعزمها بكرة على الغداء!
زياد مازالت نظراته حايره ، قاله حمد ياخي بلا عبا\ة دق عليها وواعدها الساعة ثنتين ونص بمطعم قدورة وخل الباقي علي!
جاء زياد يتكلم..رما حمد له الجوال قال دق عليها اقولك والباقي علي..دق زياد عليها قالت بشرط لايجي خويك معك..البنات مايبونه..قال زياد لا لازم يجي حمد لقط حمد الجوال من زياد وقاله قلها طيب مهب مشكلة..
قالت لا البنات مايبونه بثر بقوة..قال ابشري صار..

قفل زياد وقال لحمد ليه ماتبي تجي..ضحك حمد قال الله وكبر بتروح تقابل اليسا ونانسي ..ياشيخ الله يهنيك بركبك السود الي بتروح لهم..
http://www.9q9q.org/index.php?image=zIOX1wfEa

من الساعة 2.15 وزياد جالس ينتظر البنات..جت نورة ومعها وحدة ثانية ، رحب فيهم حمد وهو جالس بمكانه..وين البنات يانورة..قالت نايمات..
أشر زياد للي يشتغل وشوي بدأت صحون المقبلات تنزل وجاء بعدها سمكة مشوية وأخرى مقليه وقطع فيليه ومعاها جمبري مقلي ومشوي..سولف زياد معهم وضحك
سكت زياد وجلس يتأمل وجه نورة..عيونها نجلاء وسوداء رموشها طويلة وخشم صغير وحلو كنه خشم ساندرا بلوك فم صغير وهادي..ابتسامه تزينها غمازة وحدة بخدها اليسار ..شعر اسود مسترسل مثل ماهو يحب تماما .. نحر طويل وجميل..يناظرها ومهب مصدق انه جالس بطاولة وحدة ..خلصوا اكل..طلبوا شاهي خفيف ..خوية نورة قامت تغسل يدها وقالت عن اذنكم بطلع شوي قالها حمد خير وين رايحه ، قالت نورة وهي تضحك بتروح تكوي الحمار..خلها براحتها..
راحت وسكت زياد وسكتت نورة..نورة الي كانت قبل شوي كلها ضحك وفرفشة وانطلاق..تغيرت وصارت وحدة ثانيه كلها ارتباك وخجل..نورة خجولة وزياد خجول..وضحك..حاولت نورة تكسر حاجز الصمت قالت عسا مازعل حمد!
قال لا مازعل..قالت هو شكله حبوب بس الله يصلحه ماخذ شفاحة السعوديين كلها
ويضحك وتضحك..قال المرة الجاية بجيبه معاي..قالت المرة الجاية جب العالم كلهم..أهم شيء انت..
حمر خد زياد وقام يضحك على نفسه..قال المفروض انتي تحمر خدودك مهب انا..تجرأ ومد يده وضم كفها بين كفوفه..ويناظرها بصمت..
الا دخلت عليهم البنت الثانيه وقالت اخص قيس وليلى هنا بالقاهرة ..
ارتبك زياد وارتبكت نورة..قالت البنت شوفوا وش جبت..كتب لقيتها برى يبيعونها
الكتاب الاول ] فضائح حكام الخليج [
الكتاب الثاني : ] الاسرة الحاكمة السعودية واسرائيل [
ناظرها زياد وقام يضحك قال وانتي تشترين كتب الارصفة هذي ..يخربطون عليك كتاب نص كم ويطلعون لك خرابيط زي كذا والمشكلة يجون هالخليجين زيك ويضفون الكتاب من الشوارع!
قالت مدري..بتسلى عليها بالفندق..قالها اشتري مجلي ميكي ابرك ههههههه وضحك زياد ونورة...وعبير صديقة نورة.

قالوا البنات وش رايك نمشي..قال زياد روحوا انت بدق على حمد والسواق واخليهم يمروني...قالت نورة اجل بنجلس لين يجون..قال لها لا روحي..ماادري متى يجون..راحت نورة وخويتها

جاء حمد بعد ماطلعوا البنات وضم زياد وقال اكشخ ياروميو..ها كيف الموعد..انبسطت يا مطيح البنات عند دباديبو ..وضحكوا وطلعوا من المطعم..

بعد يومين كلمها زياد واتفقوا يلتقون بالليل بس وين مايدرون..تدخل ميمي قال اخوي جمال يشتغل في السرايا وش رايكم تقضون سهرتكم هناك..تحت رعاية جمال..قالوا قدام ..قال ميمي إيه هو الي قدام ..قالوا كلم جمال قله يحجز طاولة لنا

.. http://www.9q9q.org/index.php?image=tCI1ZzWtR

جاء زياد وحمد قبل البنات وجلسوا وشوي دقوا البنات قالوا حنا برى..طلع حمد يدخلهم..وطبعا مايحتاج أنواع الاستهبال على البنات خاصة نورة!
إستلمهم حمد خفة دم وضحك مع نهى بنت عمة نورة ورجهم..
شوي حمد يقول لنورة صدق ناوية تسجلين هنا بالجامعة بالقاهرة! زي ماقال لي زياد!
قالت إيه ..قالها ليه يانورة ..ليه ماتدرسين بالرياض!
قالت ودي ادرس طب ومعدلي زي وجهي!
هنا تدخل زياد وقال اجل معدلك 100%..حمر وجه نورة وحمد قام يقول اكشششششخ ادعس..ابوك يالغزل والبنات يضحكون وزياد يبتسم ونورة خاقه..
زياد جالس جنب نورة ..ويهمس هو وياها أغلب الوقت وحمد مستفرد يكب مصالته على الثلاثة الباقيات..نشب لهم إلا تعسلون..والبنات يقولون ماني وحمد إلا يخليهم يعسلون..طلب لهم 3 معسلات تفاحتين والبنات مايبون وهو يقول الا عشاني فديتكم..
جت المعسلات..وكحكحوا البنيات وبغوا يموتون وحمد جالس قدامهم وبس يضحك عليهم..

وكل ماجت أغنيه قام يرقص عليها سواء اغنيه رقص او سلو أو أي شي..حتى وحدة من البنات تقوله أنت الظاهر لو تسمع ميوزك الاخبار حقة قناة السعودية قمت ترقص عليها...

مسك زياد منديل وجاب قلم وكتب فيه:

وماكنت ممن يدخل العشق قلبه..
ولكن من يبصر جفونك يعشق
أنت النعيم لقلبي والعذاب له
فما أمرك من قلبي وأحلاك!

صفط المنديل وقال لنورة أقريه بغرفتك..

جو البنات يمشون وحلفت نورة هي تدفع وقالها زياد معصي..جاك حمد قال خلها دامه تحلف..ادفعي يانورة..عصب زياد وقال معصي..وحمد ونورة يضحكون على زياد ..

طلعوا البنات وبعدها بشوي طلعوا الشباب..وصلوا الفندق..قال حمد لزياد وش فيك عصبت قال ياخي لي ساعة أبي اروح الحمام وانت جيت كملتها..
سكت حمد شوي ..قال زياد أنت منت ناوي تقولها!
قال مجنون أنت!
قال حمد: لازم تدري يازياد ومصيرها تدري اليوم أو بكره أو بعده
مصيرها تدري..قلها بنفسك أزين..قاله زياد سكر ع السالفة الله يعافيك..
مشى حمد وترك زياد بالغرفه غرقان بهواجيسه وخيالاته..ويفكر بكلام حمد !..........

قام زياد الظهر على دقة جواله..رد هلا نورة ..كيفك ياقلبي..شلون نومك عساك انبسطتي..! اليوم السينما..ارتبك زياد..قال بحاول بحاول ..خلاص بحاول واعطيك خبر..

قام حمد ولقا زياد صاحي..قال وش عندك ياروميو صاحي..من دق عليك قبل شوي
قال نورة..قال حمد وش تبي!قال زياد تبينا نطلع اليوم سينما..
سكت حمد وناظر زياد..قال اوكيه نروح سينما..قال زياد انقلع بس..
ناظره حمد..قال عقلك براسك تعرفك خلاصك..لقط الفوطه حمد ودخل يتروش..

طلعوا يتغدون..نورة تدق على زياد ومايرد..وتدق وتدق..وزياد مايرد..ومع كل مرة تدق زياد يتوتر زيادة..لقط حمد الجوال قال هلا نورة كيفك..زياد نايم الحين..ايه مانام الا متأخر..السينما خليها بكرة اليوم إن كان ودك نلتقي بالليل ابشري..اها البنات خوياتك بيروحون مسرحية سمير غانم..اوكيه روحي معاهم..اجل وش بتسوين!
فكري وعطينا خبر..

قال حمد ان البنات بيروحون مسرحية سمير غانم وهي ماودها..أسكت زياد..
دق حمد عليها بعد العشاء قال بتروحين معاهم..قالت ماودي ..وش بتسون انتم..قال حمد سمعيني..انا وزياد عندنا موعد مهم الحين مع صديق للوالد..على الساعه 12 بنروح قهوة " شقاوة " إذا ودك تجين انتي والبنات حياكم..

الساعة 12.30 دخلت نورة شقاوة ..دخلت تتلفت شافها حمد اشر لها ..جت وجلست معاهم سئلها زياد وين البنات ..قالت راحوا البيت بيتك..وانا حبيت أجلس معاكم..
حمد دق على ميمي قاله تعال ياميمي أبيك..جاء ميمي واستئذن حمد قال عن اذنكم يا الكناري..بروح مشوار قريب وجاي..وهو طالع شاف مصري يدق عود..اشر له قاله رح لزياد ونورة وطلع.

جاء المصري وجلس عندهم قال عايزين أيه أغنيلكو ..قال وش تعرف خليجي قالوا أعرف كل حاقة..محمد عبده وعبدالمقيد وراشد الماقد وطلال مداح والقسمي.والرويشد..

قالوا عن لنا أي شي.. قام يدندن ..
أنت العزيز انتا..وانت المهم انتى..وزياد بعالم..ونورة بعالم..والي يدق العود بشارع جامعة الدول العربية!

شوي قالوا هات شيء للرويشد..ورجع زياد لعالم مشترك مع نورة..تحيط به خلفيه الله الله ياملفت الأنظار!

دندن المصري قرابة الساعة ..زياد مايدري دندن بس يذكر أنه عطاه مية جنيه وقاله متشكر يافندم!
جاء حمد..ورج المكان لهم كالعادة..قال هلا هلا بالكناري..ها بنيتوا عش الزوجية..ضحكوا ومحد علق..دق جوال نورة البنات قالوا لها يالله أطلعي حنا برى..
ودعتهم نورة وطلعت..حاسبوا الشباب وجوا يطلعون..

نورة ركبت مع البنات وهي حيل مبسوطة ومشت السيارة شوي..نورة تصرخ بالسواق ارجع ارجع نسيت شنطتي!

رجع السواق مسرع..وقفت السيارة عند باب القهوة..جت نورة تنزل..سمعت صرخة وحدة من البنات ناظرت قدام.." حمد يدفع زياد بالعربية " !

" يتبع "

هلالي الظهران

13/5/2006, 03:38

عوافي اخوي الكاسر :magkiss: ..رائد اذا مانيب غلطان :love: ,,

اسلم اسلم وانا اخوك .. كمل الروايه تراني تحمست .. ماشاء الله عليك الله لايضرك .. اسلوبك وطريقة سردك روعه واختيارك للالفاظ مناسب لنوع الروايه,,

مع اني اكره هالبلد من كثر فقش اهلها لكن ذكرتني بذكريات جميله :love: :love: ..

تكفى رائد قل ان باقي القصه في الفور سيزن وسميرا ميس ولايهون السرايا والعمده :love: :love: ,,

بالانتظار,,

ابوسعد الهلالي

13/5/2006, 03:47

8

8

سجل عندك واحد نفر متابع القصه (himo)

الديناصور

13/5/2006, 08:31

يا سلام عليك يالكاسر ...

بس وش فيه ((حـــمـــــد)) :amle: ما غير يترووش؟؟؟ :angel:

وألف سلامة لــ ((زيــــاد)) ... مع إني عاتب عليه بقوة ... أجل في واحد يعزم وحدة في موعد غرامي على ((غـــداء)) و الساعة 2 الظهر ... أما والله من الرومنسية عندكم يالسعوديين :angel:

وما زلنا في الإنتظار يا ألبي ... لا تطول علينا ...

ابوسعد الهلالي

13/5/2006, 15:15

8

8

هذا نظامهم بمصر .. وبعدين المواعيد عند الخليجيات واجد لأن البرنامج مليان ;)

جرب هالصيف ورح مصر وتعرف ان كل كلمه قالها رائد بتشوفها بعينك رغم التشفير الأدبي (himo)

شابع بطولات

14/5/2006, 10:39

رائد :)

تراك بتخلي العالم يسافرون للقاهره :)

الملك العائد

14/5/2006, 13:40

رحب فيهم حمد وهو جالس بمكانه..وين البنات يانورة..قالت نايمات..
أشر زياد للي يشتغل وشوي بدأت صحون المقبلات تنزل وجاء بعدها سمكة مشوية وأخرى مقليه وقطع فيليه ومعاها جمبري مقلي ومشوي..سولف زياد معهم وضحك
سكت زياد وجلس يتأمل وجه نورة..عيونها نجلاء وسوداء رموشها طويلة وخشم صغير وحلو كنه خشم ساندرا بلوك فم صغير وهادي..ابتسامه تزينها غمازة وحدة بخدها اليسار ..شعر اسود مسترسل مثل ماهو يحب تماما .. نحر طويل وجميل..يناظرها ومهب مصدق انه جالس بطاولة وحدة ..خلصوا اكل..طلبوا شاهي خفيف ..خوية نورة قامت تغسل يدها وقالت عن اذنكم بطلع شوي قالها حمد خير وين رايحه ، قالت نورة وهي تضحك بتروح تكوي الحمار..خلها براحتها..
راحت وسكت زياد وسكتت نورة..نورة الي كانت قبل شوي كلها ضحك وفرفشة وانطلاق..تغيرت وصارت وحدة ثانيه كلها ارتباك وخجل..نورة خجولة وزياد خجول..وضحك..حاولت نورة تكسر حاجز الصمت قالت عسا مازعل حمد!
قال لا مازعل..قالت هو شكله حبوب بس الله يصلحه ماخذ شفاحة السعوديين كلها
ويضحك وتضحك..قال المرة الجاية بجيبه معاي..قالت المرة الجاية جب العالم كلهم..أهم شيء انت..
حمر خد زياد وقام يضحك على نفسه..قال المفروض انتي تحمر خدودك مهب انا..تجرأ ومد يده وضم كفها بين كفوفه..ويناظرها بصمت..
الا دخلت عليهم البنت الثانيه وقالت اخص قيس وليلى هنا بالقاهرة ..
ارتبك زياد وارتبكت نورة..قالت البنت شوفوا وش جبت..كتب لقيتها برى يبيعونها
الكتاب الاول ] فضائح حكام الخليج [
الكتاب الثاني : ] الاسرة الحاكمة السعودية واسرائيل [
ناظرها زياد وقام يضحك قال وانتي تشترين كتب الارصفة هذي ..يخربطون عليك كتاب نص كم ويطلعون لك خرابيط زي كذا والمشكلة يجون هالخليجين زيك ويضفون الكتاب من الشوارع!
قالت مدري..بتسلى عليها بالفندق..قالها اشتري مجلي ميكي ابرك ههههههه وضحك زياد ونورة...وعبير صديقة نورة.

قالوا البنات وش رايك نمشي..قال زياد روحوا انت بدق على حمد والسواق واخليهم يمروني...قالت نورة اجل بنجلس لين يجون..قال لها لا روحي..ماادري متى يجون..راحت نورة وخويتها

جاء حمد بعد ماطلعوا البنات وضم زياد وقال

السلام عليكم قصه خااااااااااالعه شكلي ابقص تذكره لمصر
المهم انت تراك غلطان او انك تغيلط شف اللي مقتبس تقول رحب حمد فيهم اصلن حمد ماكان معهم وشلون رحب فيهم
وبعدين يوم جت تروح للحمام قاله حمد وين وشلون حمد ماكان معهم شف يمكن غلط مطبعي او انك تغيلط لسبب وبعدين تقول جاء حمد مر زياد من المطعم يعني هو مهب معهم وشوله تقول حمد رحب فيهم

المهم قصه رهيبه وحمد خااااالع مرجوج قله يخاوني القاهره ابروح خخخخخ :d:
كتى بيرحون لشارع الهرم

السد الازرق

14/5/2006, 14:39

بالأنتظار ,,, ولا تبطي

هلالي مغرور

14/5/2006, 15:56

زيـاد طلـع معـاق :eek:

والدليـل لمـا قالـولـه البنـات إمـش معنـا قـال لا بجلـس :slv:

تكفـى تكفـى يا الكاسـر عجـل علينـا .. فديتـك :magkiss:

:mad: :noo:

الكاسر888

14/5/2006, 16:08

الملك العائد فعلا هي غلطة مطبعيه

زياد /مش حمد

مدرعـم

14/5/2006, 17:39

هلا حوبي ..

مبطين عنك وعن سواليفك الخاثره ياقولبي :magkiss: .. الا ماعندك صوره لنوره وصديقاتها عشان تكمل عندنا الصوره (( مايحب يتخيل كل ماتخيل طلع له ناصر الجوهر ))..

اجل احد يروح مصر ويلاحق خليجيات امهات الركب السوده .. مااقول الا يازين المصريه لابقيت تأخذها اهلها يطلبون منك مهرها مروحه (( الله يديم الرخص :angel: )).. يعني لو تجيب لهم مكيف تأخذها هي واختها بخخخخخخخخخخخخخخخ :d: ..

كمل .. كمل .. معاك معاك طول الخط :d:

هنا القاهره :kany:

زاوية منفرجة

14/5/2006, 18:46

الكاسر يرحم امك كمل

أخو دلال

15/5/2006, 03:09

بيق سلام من أخو دلال :)

متابع وينتظر الباقي :)

مدرعم..

الا ماعندك صوره لنوره وصديقاتها عشان تكمل عندنا الصوره (( مايحب يتخيل كل ماتخيل طلع له ناصر الجوهر ))..

خخخخخ أقسم بالله فطستني ضحك يالدايخ :d:

كمل يارائد.. كمل يا بطل :)

وبيق سلام من أخو دلال مرة ثانية :)

الهلاليه k.s.a

15/5/2006, 18:02

اااااااااااااخ ببببس :d:
كمل كمل ترااني متحممسسسه :d: (himo) :kello:

الكاسر888

16/5/2006, 19:30

الجزء الثالث

حمد لمح البنات قبل يلمحهم زياد ، صرخ حمد قال آآآي..التفت زياد على حمد بيشوف وش فيه..عفط حمد وجه وسوى نفسه متألم ودف الكرسي وراح يمين..ويأشر بعيونه للبنات..يعني لاتقربون..
ركب حمد وزياد السيارة وراحوا والبنات في مكانهم متسمرين..نزلت نورة وهي مو مصدقة أحذت شنطتها وراحت..
حمد طول الخط ساكت، عرف ان البنات شافوا زياد وعرفوا حالته..وكان خايف لاتدق نورة وتجيب العيد..وممكن تجرح زياد بكلمة..
جو بيروحون الفندق..قال حمد خل نروح المقطم ..نبرد على نفسنا شوي..
راحوا فوق جبل المقطم وجلسوا ع الكراسي الي هناكـ..زياد مستلج ومبسوط ويسولف وحمد على عكس العادة يهوجس ويفكر..وميمي فاتح فمه ويسولف مع زياد..لاهو يفهم وش يقول زياد ولازياد يفهم وش يقول ميمي.وكل واحد مسوي فاهم الثاني..
حمد مسك الجوال وقام عنهم ويدق ع جوال نورة..ويدق ويدق ماترد..دق أكثر من مرة وماترد..أرسلها sms..قال متى كنتي استعداد للكلام..دقي علي انا لاتدقين على زياد.
رجع لهم وجلس يسولف معهم وكأن مافيه شيء..جائهم طفلتين وطفلة صعايدة يقولون عايزين نغنيلكوا..ميمي يطردهم وحمد جلسهم ..قالهم تعرفون تغنون لمين..قالوا عايز نانسي! قال هاتوا نانسي..وابصوات رغم انها طفولية إلا انها مقززة..بدأت أه ونص..تلتها حرمت أحبك لوردة..مع أهواك لعبدالحليم..عطاهم خمس جنيه وقالهم روحوا..قالوا تعرف صورة البكرة؟..قال ايش..صورة البكرة..وجلس حم بنقاش مطول معهم حتى عرف انها صورة البقرة..وسئلهم ليه..قالوا هناك فيه سعودي جالس.قالنا روحوا احفظوا صورة البقرة وتعالوا..أعطيكم مية جنيه..ضحك عليهم وقالهم روحوا بس..

من اليوم التالي..قام حمد وزياد..وقبل مايطلعون من الغرفة دق زياد على نورة وماترد.. راحوا تغدوا بفلفلة مع عروض مسرحية هزيلة..ما اكلوا زين لان الاكل الله يكرم النعمة بس..راحوا عقبها لحديقة ماريوت ..ومع 3 معسل كنتلوب يدق زياد على نورة وماترد..استغرب زياد ..طلعوا وحضروا فلم بالسيما وزياد يفكر بنورة ويهوجس به....بالليل وعلى مركب الصن ست ..ومع رقص الخليجيين والأغاني دق زياد على نورة..وماترد!
قال حمد يمكن نست جوالها بالغرفة وطلعت..زياد يقول ممكن..وميمي يقول ممكن..والصعيدي الي كان يضبط الجمر دخل معاهم وقال ممكن أيوه..
حمد يضحك..يرقص شوي..ويغمز لهذي شوي..ويأشر لهذيك شوي..ويرسل رقمه بلوتوث كثير..
التفت زياد زياد وقال حمد تعال وش رايك ان ردت علي نورة نروح بكرة والا بعدوا القناطر الخيريه..وننبسط يقولون فله القناطر..سكت شوي حمد..ضاق صدره لتوقعه ان زياد بينصدم بأي لحظة..قال حلو فكرة حلوه..ياخي نروح جزيلة العسل وناكل فطير مشلتت هههههه..
يقوم حمد دورة المياه..بالطريق يدق على نورة وماترد..قال هذي والله حومة الكبد..
جلس حمد وزياد يومين يدقون على نورة وماترد..وزياد بدأ يفقد الاستمتاع بالأماكن لانه مايدري عن نورة...
حمد ما أعجبه الوضع وقال لازم أشوف حل..وفي حدى المرات وهم جالسين بمقهى السلطان ..جاء شعبولا يغني..حامت كبده ..من الوضع من جهة ومن مصالة شعبولا من جهة ..طلع يدق على نورة ..ودق عشرين مره لين ردت..قالت بلهجة حادة ننننننعم؟
قال : هلا نورة..قالت : هلا خير..قال وينك من كم يوم..ردت بعصبيه..وانت ابوي والا امي عشان تسئلني ليه ما أرد..أنا حره أرد أو ما أرد..
سكت شوي وكتم غضبه..قال ابي اشوفك يانورة!
قالت وخير وش شايفني..يوم ماضبط وضعي مع ولد عمك جاي تلف وتحاول انت تشبكني..كتم غضبه بقوه..وقال ..ماني شايفك عشان شيء ثاني..بكلمك بخصوص زياد..قالت خير وش تبي قل هنا..قال لا أبي أقابلك....جت تتكلم..كرر ..أبي اقابلك..
قالت متى : قال الحين..قالت الحين ماينفع..قال أبيك ضروري..أقرب وقت..قالت بكره ..قال لا اليوم..قالت لما أرجع الفندق أدق عليك..
بعد ساعة جت مكالمة لحمد منها..تواعدوا باللوبي حق فندق ماريوت..
قالت : ها وش تبي..فيه نصبة جديدة ودك تقولها لي هالمرة!
قالها ليه في نصبه قبل هذي!
قالت زياد والكرسي!.
قالها وين النصب فيها..! أحد قالك ان زياد يمشي..أنتي من أول مره شفناكم فيها..عمركم شفتوا زياد يمشي..كل مره تقابلونه تلقونه جالس..!
قالت والكرسي حقه!
سكت حمد شوي..قال هي عادة دايم نسويها..ان جلسنا بمكان عام يتضايق زياد لو كان الكرسي حقه جالس جنبنا!
ثم اضاف : زياد ترى مايدري ليه أنتي صاده وماتردين..وطول هالايام قلقان عليك يحسب جايك شيء..ناظرت له قالت فيه الخير!
ثم كملت..طيب وش تبي انت طالبني!
ناظرها وكان وده يصفقها..تحمل وقال للحين ماسئلتيني وش فيه زياد!
قالت وش فيه؟؟؟؟
قال :قبل خمسة أشهر..كان راكب زياد مع اثنين من أخوياه جايين من الخبر للرياض..وقبل الرياض ب90 كيلو ضرب عليهم الكفر ولأنهم مسرعين..تقلبت السيارة..الي مع زياد كلهم تتوفوا وزياد أصيب..الدكاترة والشرطة يقولون هم ماتوا وهو لا لانه رابط حزام الأمان..أقول هم ماتوا وهو أصيب لانه كان يومهم..
جلس زياد شهرين باالعنايا الفائقة وشهرين أخرى خارج العنايا..من شهر واحد فقط خرج من المستشفى..اممم تقولين له علاج..عرضنا تقاريره على دكاترة كثيرين بالسعودية وكلهم يقولون بيضل كذا طول عمره..مافقدنا الأمل بالله..أرسلنا تقاريرنا لعدة اطباء في العالم للأن كل الي عرضنا عليهم ماعطونا رد قاطع..مازلنا نبحث ..وبالفترة الي والده يرسل تقاريره الحين لبعض الأطباء في ألمانيا وأمريكا ..جيت مع زياد هنا.. أول الأيام كان عادي ..من يوم لقائكم للأن..أشوف زياد الأولي..إنطلاقه وسعادة وفرح..
نورة ماجيتك الحين عشان شيء..لو الموضوع يخصني ماجيت أكلمك..بس يخص زياد..طبعا من حقك تقولين ماتبغين واحد زيه مصاب..وماتدرين هو بيطيب والا لا..بس أبي منك شيء واحد..ان كنتي ناويه تبتعدين..ارجعي هاليومين وخليك معاه..وقبل حتى مايفاتحك بالموضوع..إختلقي مشكلة وابتعدي عنه..وكذا تبتعدين دون تجرحينه..وان كنتي تبين تضلين قريبة منه..خليك قريبة بدون شفقة..زياد مايحب الي يعاملونه بشفقة..
نورة تسمع كل هالكلام وحاسه الدنيا تدور فيها..ماهي قادرة تفكر ولا تتخذ أي قرار..قامت وقالت انتظر مني مكالمة هاليومين...واتجهت للمصعد وهي ماهي حاسة بنفسها...

رجع حمد..ومايدري وش ناويه عليه هالبنت..بس يقول أهم شيء يرسي زياد على بر..
جلس زباد مع حمد وزياد يعبر له عن ضيقة صدره..وحمد يقول هونها وتهون..وخل كل شيء على ابو الحمود..
....

http://www.prameg.com/up/uploads/a87a39d72c.jpg

اليوم التالي قام زياد وحمد....مرهم السواق الساعة 3 الظهر قال وين بتروحون..قالوا ودنا أي مطعم حلو ونظيف..قال وش رايكم نروح مطعم سيدروز..قالوا رح ياميمي رح..وصلوا المطعم..طلبوا اكلهم..دق جوال حمد..ناظر الشاشة..هذي نورة..قام شوي وكلمها..قالت وينكم..قالها نتغدا بسيدروز..تجين يانورة ! قالت مممم مدري..قالها تعالي..قالت ماادل..قالها برسل لك ميمي الحين يجيبك ! أوكيه..قالت صار..تغدوا الشباب وبعدين حمد قال لميمي تعال..رح للمكان الفلاني بتلقى نورة جيبها..واذا قربت دق علي..
راح ميمي وجلس زياد وحمد..قال زياد وين ميمي..قال حمد ارسلته يجيب لي دخان ويجي..شوي زياد ناظر ساعته..قال مهب كنه تأخر..قال وسع صدرك..ماتعرف ميمي وحركاته..دق ميمي على حمد قاله جيت..قال حمد لحظة جايك..قام حمد وترك زياد وراح لنورة..قال وش بتسوين..قالت الحين بتشوف..قال حمد لا..بجلس هنا مع ميمي..ورجاء ماابي انصدم فيك وبثقتي فيك يانورة !..ابتسمت واتجهت للمطعم..زياد كان يشرب كاس عصير..رفع راسه ويشوف نورة..فرح حيل...سلم عليها وجلست..ناظر يمينه وشاف حمد ماوخر الكرسي حقه مثل مايسوي دايم! ارتبك زياد حيل..ناظرته نورة وقالت..زياد عارفه..قالها ولون وجه رايح وش عارفه!
قالت شفتك ذاك اليوم وانت طالع مع حمد من شقاوة!.
شلت المفاجئة لسان زياد وسكت...وسكتت نورة..زياد جاء يتكلم عشان يكسر حاجز الصمت..سبقته نورة قالت ليه تستحي من وضعك!
ليه من البداية ماخبرتني..تخاف تفقدني! لو فقدني ماني خسارة..لان مصيرك بتفقدني لو دريت اليوم والا بكرة..تخاف ما أتكلم معاك..ما أتكلم معاك من البداية أفضل من اني اكلمك ثم أتركك إن عرفت عنك..!
ثم قالت وهي تقوم من كرسيها ..زياد كنت صديق دخلت قلبي بسرعة يازياد..
ثم قربت وجلست بالكرسي الي جنب زياد وقالت ومازلت الصديق الغالي على قلبي..بعد مادريت أغلى من قبل..كان ودي تعلمني بنفسك..مو أتفاجأ وانت طالع بكرسي..ويجي حمد يشرح لي وضعك..
نزلت راسها وهي تقول أولا عظم الله اجرك بأخوياك..ثانيا الحمد لله على سلامتك..
قالها بصوت خافت..الله يسلمك..
وقفت قالت أنا بمشي الحين بس جيت أولا اقولك انك الغالي ومحد غالي غيرك..بنتقابل إذا تحب اليوم أو بكره..بس أبيك تكون واثق بنفسك أكثر من كذا..وأنت تسوى مية واحد مافيهم شيء.. أيضا كلنا معرضين لحوادث وغيرها..
جرها من يدها بهدوء وقالها نورة شوفي بصراحة تفاجئت بكل هالاشياء والمعلومات الي تكلمتي عنها..مدري تتكلمين انتي جدك والا الشفقة خلتك تجين هنا..إن كانت الشفقة ..فما أبي شفقة..اليوم كلمني الوالد وقال تلقوا من دكتور في ألمانيا يقدر باذن الله يعالج حالتي..يمكن أروح وارجع مثل أول ..أو اروح وارجع زي الحين..
عموما انتي اليوم فكري..وانا وحمد مسافرين بعد بكرة للرياض ومن هناك بروح مع الوالد لألمانيا..إذا ودك بكرة نشوفك فشيء حلو..وإذا ماودك..
قاطعته قالت بكرة نلتقي يازيزو..

جاء حمد..وأكل تهزيئة محترمة من زياد ..وحمد ساكت..قاله طيب وش صار عليكم..قال بنلتقي بكرة..مدري بيكون عاد لقاء وداع والا لقاء تجديد البيعة وضحك زياد بدون نفس..

مر اليوم تقليدي عليهم سينما..تمشيه بشارع الجامعة حضور مسرحية عادل إمام..ومن بعدها راحوا للبيت بيتك وسهروا سهره حليوه..

تواعد زياد مع نورة انهم ياخذون وحدة من القوارب الي في النيل..وطلعوا العصر بجولة على النيل بحضورالبنات الي مع نورة وحمد الي كان طاير في البنات..

http://p.vtourist.com/1052312-The_Nile-Cairo.jpg

في الجولة لم يتكلم زياد ونورة أي شيء بخصوص مستقبلهم.. واستمتعوا بالجولة كثيرا..
بعد رجعوا قالوا جوعانين..قال حمد أنا لها.. عازمكم على عشاء معتبر..صح بتتعشون بدري بس عاد حضكم حلو حمد عازمكم..قالوا وين عازمنا..قال يالله تعالوا وتشوفون..
ركبوا مع ميمي وتاكسي آخر..ووداهم حمد لمطعم أبو طارق للكشري..تلفتوا البنات قالوا هنا عازمنا..قال اقول تعالوا كلوا بلا خرابيط..عارفكم ماتاكلون بالرياض الا فول ..لايكثر..وزياد ونورة ميتين ضحك على حمد..
جت صحون الكشري..وبدوا البنات ياكلون وهم يحشون بحمد..الرومنسي حيل!!
أول ما أكلوا لقمة التفتوا على حمد ..طعم الكشري أعجبهم وماودهم يعترفون..يخرب برستجيهم قدام حمد..

بعد العشاء اقترح عليهم حمد كالعادة انهم يروحون فوق جبل المقطم..منها يجلس بطاولة يتميصل على البنات ويخلي زياد يستفرد بنورة على هدوء..

زياد طلب معسل وجلس هو ونورة بطاولة لحالهم..قالها إنه بيروح بعد خمسة أيام لألمانيا بيعالج..بيسوون له فحوصات..وربما عملية بالعامود الفقري..
نورة قالت زياد بقولك شيء بس مستحيه ..قالها قولي..
سكتت طلعت ورقة وجلست تناظرها فترة طويلة ثم كتبت كم كلمة وقالت خذ أقراها على بال مااروح اكلم البنات وأجي مرة ثانية. .

يتبع
اخر مره

ابوسعد الهلالي

16/5/2006, 21:24

<<< يلعن ابليسك يارائد انت وسوالفك ماخليتني اروووح انهبل مع شلتنا ((المساطيل)) بموضوعنا :)

بس الله الله بالتصويت انت ومن يعز عليك :d:

إبراهيمـ

16/5/2006, 23:08

بانتظار المتبقي .. !!

وعوافي رائد .. !! :magkiss:

الشريف محمد

17/5/2006, 01:09

يعطيك العافيه وماقصرت
والله وحمستني على مصر
اهلها وبخششتها وطعميه العجوزه
ومشكوووووووووور.

الديناصور

17/5/2006, 08:10

مشكووور رأوودي ... بس عاد كمل يا خي لا تصير بخيل زي ميمي >> واحد مو قاري شي وجاي يرد :angel:

متيم

18/5/2006, 21:22

هاااي

أهلين (r) .. ولا اقول لعيون (s) .. :angel:

تصدق اني كنت حاضر هالسالفه .. أكملها عنك (himo)

الكاسر888

18/5/2006, 22:15

متيم..ياخفة دمك بس

الكاسر888

18/5/2006, 22:18

الجزء الرابع

قرأ زياد الورقة بهدوء وتأمل وحطها بجيبه وسكت..رجعت له نوره..كملوا سوالف....وهم يسمعون ضجيج الطاولة المجاورة ..طال الهمس واليدين متشابكتين..مع سماع حمد يتريق عليهم....
إستمر الحال على هذه الوتيره.. وصلتهم أشعة الشمس..مع طلوع الفجر
..جوهم الي بالطاولة المجاورة وقالوا يالله سرينا..

عند باب فندق ماريوت وقفت سيارة ميمي والسيارة الأخرى..زياد ونورة مع ميمي ..والبقية مع تاكسي آخر..وعند الباب وفي لحظة الوداع..والأيادي متشابكة..ميمي..أنزل يابيه!..محد رد عليه.. فتحت الباب لكي تنزل..وللوداع بترحل..أخذ زياد يديها وقبل كفها...ودخلت الفندق بسرعة..

حمد يدفع زياد لمقاعد الانتظار بقرب بوابة دخول الطائرة في مطار القاهرة ...رن تلفون حمد ..هلا نورة ..زياد مخلصه بطارية جواله.. معليش اذا ودك تجين تشوفينا قصي تذكرة للرياض وادخل لنا داخل هنا دخلنا جوى..والله انتي برى..!معليش مقدر أطلع والله توني متطاق مع حق الجوازات ماعطيته بخشيش يسوى هههههههههههه..
قالت عطني زيزو..رد زياد ومبسوط..وفرح بأنها جت تودعه..
قالت : قلبي..قال هلا..قالت بقولك شيء..قال : لبييه..
قالت وهي تقطع الحروف حرف حرف..أ..ح.." فرح زياد وقال اخيرا بنفسه"..واصلت ...م..ي...نفسك زين..جاه احباط وضحك وهي ضحكتك..
قفل وقال لرفيقه..دلع بنات:)

ركبوا الطياره..وانطلقت الرحلة للرياض بعد أن غرست بقلب إثنين نبتة مشاعر..لاتوصف..أخرج زياد ورقة صغيرة كتبتها له نورة بالمقطم.. جلس يقرا..

على كثر القصــيد.. وكثر ماجـــاب الخـيال أفـكار

تعبت ومالقيت الا ثمان أشياء تشبه لك

نور الشمس.. لون الغيم.. طهر الما.. وصمت النار

لين الورد فجر العيدملك وانسان ياسهلك

بهدوء..وكبرياء..وشموخ ومهابة..بنيت لك بقلبي قلعه حصينه..

إبتسم وهو يرجع الورقة الي يقراها للمره العشرين هذا اليوم..وأغمض عينيه..وسط متابعة حمد الي يناظر زياد ويبوس يديه وجه وقفا ويضحك..

بعد عشرة أشهر وقف شاب للمرة العاشرة خلال ثلاث دقائق يعدل من لبسه وشعره ..ويتأكد من هندامه..ويركب تاكسي ويروح معاه لشقة فاخرة بحي المعادي..يدق الباب..يفتح الباب..تفتح شغالة الباب..يقولها الشباب الواقف باعتداد وهو يلمح مرايه في مدخل الشقه ليتأكد من لبسه..وين الست ! قالت اقولها مين..قال قولي لها صديق..

..دخلت الشابه صاحبة الشقة لصالون انيق وصغير يعبق بالحس الأنثوي لينبض بقوة..زياد قدامها واقف...نورة الي تدق على زياد من شهر ويقولها أنا بالمانيا للحين والعلاج مستمر..تشوفه قدامه..إتجهت له بنبضات قلب سريعة جدا..

مفاجئة قالها زياد..قالت وأي مفاجئة ..وتقولي بألمانيا وتوك هاه..قال..فرحتك هذي بغيت أشوفها بعيني...ونهى ماقصرت عطت حمد العنوان..صح نسيت حمد طلع يعرف نهى من ورانا هههه...نورة الي تدرس بالقاهرة قالت لزياد شف كل مكان رحنا له قبل نب ينروح له سوى..لحالنا ..وبدون عربية يدفها حمد..ضحكوا وقال كلي لك..

بنهاية إجازة الصيف التالية إتفق زياد ونورة الي قررت تترك الدراسة بالقاهرة على الزواج بمباركة العائلتين ماعدا "حمد"..تم الإتفاق على كل شيء..وتم عمل الترتيبات..نورة فرحانه وزياد طاير من الفرحة..ذهب زياد ونورة لعمل فحوصات قبل الزواج.. استعداد لمراسم الملكه بعد اسبوع.

فتح باب البيت واتجهت نورة لغرفتها بسرعة وهي تبكي..أمها تتجه لابوها وتقول وش فيها نوير! قال ابوها نتايج التحاليل تقول غير ملائمين لبعض وابنائهم احتمالية اصابتهم بأنيميا الدم المنزلية مرتفعة جدا...
http://www.9q9q.org/index.php?image=0kq07Zac6Rp

تمت
مافي يتبعpb094

حقوق النشر محفوظة

الكاسر888

18/5/2006, 22:19

سؤال صغيرون
لو كنت مكان أحدهم ماذا كنت تفعل

الديناصور

19/5/2006, 00:07

^
^
^
^
مـــا عــــاد أفكر بالزواج أبــــد :lkj: ...

ومشكووور يالكاسر وربي يعطيك العافية ... حقيقة متعتنا على مدار لإسبوع بيتبع ... بس النهاية مأساوية ... وأنا عن نفسي ما دخلت مخي قضية هالتحاليل أبد :lkj: :lkj: :lkj: لأن إللي كاتبه الله هو إللي يصير مع إحترامي للطب الحديث ... ولكن فوق كل ذي علم عليم ...

ومشكوووور يالكاســــر ....

ابوسعد الهلالي

19/5/2006, 01:08

هلا رائد :magkiss:

أخيراُ مابغيت تخلص :d: امزح بالعكس تصلح قصة مسلسل في رمضان :yes: وانت الكاتب.. والمخرج فجر السعيد عشان تكب المسلسل كله بنات لنا :ignor: ;)

احتمالية اصابتهم بأنيميا الدم المنزلية مرتفعة جدا...

تصحيح بسيط وانا اخوك " المنجليه"

اما لوكنت مكانه كان كملتها صداقه وبس اما زواج يفتح الله ;)

الكاسر888

19/5/2006, 17:15

لتحميل القصة كاملا تفضل

أبوحمـــ15ـــــــــــد

19/5/2006, 21:24

يامال العوافي والله يالكاسر .. قصة حلوة وسرد مونتاز ..

بس وشلون ؟؟ هما زياد يعرج أول ماهنا ؟؟ وشلون صار مشلول ؟؟؟

ولا قصدك بالعرجة البسيطة يعني ان اخوياه ماسكينه ؟؟

فتى الساحه

19/5/2006, 23:43

يقولون ان الكشف الطبي قبل الزواج اثبت فشله في تركيا >>>>>> يبيهم يتزوجون

ياسلام عليك يالكاسر

إبراهيمـ

20/5/2006, 00:42

هلا رائد :magkiss:

أخيراُ مابغيت تخلص :d: امزح بالعكس تصلح قصة مسلسل في رمضان :yes: وانت الكاتب.. والمخرج فجر السعيد عشان تكب المسلسل كله بنات لنا :ignor: ;)

تصحيح بسيط وانا اخوك " المنجليه"

اما لوكنت مكانه كان كملتها صداقه وبس اما زواج يفتح الله ;)

^

إيه مجرب وعارف البير وغطاهـ .. !!

ويمال العافية رائد قصة ممتعة جداً .. !!

الكاسر888

20/5/2006, 20:08

الهلاليه k.s.a :
هلا هلا..كملت الموضوع يسعدني هالصباح وهالمساء

اسطورة الهلال: وعطيناك الجزء الثاني والثالث والرابع..ابسط ياعم :angel:

ابو عايد": على الموعد جيتكم يامخلفين الموعود :angel:

ابو عبدالمجيد

20/5/2006, 21:14

والله مصيبة موضوع حق محاضرات تقول من الصبح اتمني التثبت وماحول احد وموضوع قصه بنات وضحك وهبال مثبت والله من جد مصيبة :)

HeLaaaLiii

20/5/2006, 22:16

أجل ناوي يتزوجها :ignor:

عاشق العثرات

21/5/2006, 02:16

هلا والله وغلا الكاسر ...
قصة راااائعة جدا جدا جدا ..
بس لو انك مخليهم يعرسون ماهوب ازين :d:

..

ابو حمد ، مدخل القصه كان يعبر عن آخر سفرة لزياد يعني بعد ما تعالج يوم انسدح على السرير بدأ شريط الذكريات يمر .. ، و سردية القصة كانت عن سفرة قديمة لزياد لمصر ..

kaka_22

21/5/2006, 06:48

بالفعل روووووووووووووووووووووعه

يعطيك العافيه اخوي الكاااااسر ..

POWER

21/5/2006, 07:57

<< هذا المستخدم خاش جو ويحس انه خاق شوي ما يدري ليه :qw:

لي عودة عقب ما تروح الحالة :angel:

وقبل ارجع احب اقول موضوع قوي وطريقة العرض ابداع كالعاده ....

رح ياشيخ :cry:

أخو دلال

21/5/2006, 11:54

بيق سلام من أخو دلال :)

هلا رائد.. الله يعطيك العافية..

في البداية ألف شكر لك يا رائد على هالاضافة الجديدة للمنتدى.. بحق هالرائعة هي أحد الاضافات الجديدة والجيدة للمنتدى.. بالأمس القريب كان هناك مجلة روعة.. وكان هناك صدى الكلمات.. وكان هناك مسابقة المساطيل والسحالي الخ .. واليوم هنا رائعة الكاسر :)

رائد .. إذا سمحت لي لدي عدة ملاحظات سأسردها بشكل سريع.. وهي بالطبع كأي ملاحظات تحتمل الصواب وتحتمل الخطأ.. :)

أولا.. أنا لي تحفظ كبير لمن يكتب روايات أدبية أو قصص قصيرة أو حتى قصائد شعرية هنا بالمنتدى ويبني على ردود أفعال أو عبارات إعجاب شباب المنتدى.. قد تقول لماذا؟؟ هل هو تقليل بحق الشباب؟؟ لا والله ليس تقليلا بحق أحد لكن وبكل صراحة غالب شباب وبنات المنتدى هم من صغار السن أكاديميا و أعني بذلك ليسوا من حملة الشهادات العليا بل وبعضهم الى الآن ليسوا من حملة الشهادة الجامعية وبالتالي ليسوا قادرين على تقييم القصة بشكل أكاديمي أدبي.. وأكثر ما يستطيعون تقديمه هو انطباع بسيط يعبرون فيه عن إعجابهم بالقصة أو عدم إعجابهم بها.. فكثيرا ما نقرأ بعد أي رواية أو قصة أو قصيدة عبارة مثل " الرواية صراحة روعة" أو " صراحة روايتك أعجبتني" أو " روايتك زي وجهك ما فيها ملح :d: " الخ الخ من العبارات الانطباعية.. لكن نادرا جدا تلقى شخص يمسك قصتك ويحللها أدبيا ويتكلم عن الحبكة الدرامية فيها والبلاغة والاستعارة والمجاز والتجريد الخ الخ.. أنا لا أزعم أنني أجيد هذه الفنون فهذه فنون لها أهلها.. و أنا لا أدعو لعدم طرح القصة هنا بالمنتدى لكن أفضل أن تطرحها في منتدانا هنا بالاضافة إلى منتدى أدبي آخر لكي تجمع بين استقبال الانطباعات البسيطة والتقييم الأدبي الموضوعي :)

ثانيا.. في بعض الأحيان.. يربط المتلقي بين شخصيات القصة و شخصية الكاتب نفسه.. بل في كثير من الأحيان يجزم بعض القراء وخصوصا من يعرفون الكاتب بصفة شخصية بعلاقة الكاتب بشخصية معينة بالقصة.. أنت رائد هل تجد نفسك في أحد الشخصيات؟؟ هل تجدها في زياد؟؟ أم في حمد؟؟ أم في نورة :jhgy: :jhgy:

ثالثا.. وهذه الفقرة أرجو ألا تثير حساسية أحد.. رواية بنات الرياض.. ورائعة الكاسر.. هل بينهما فرق ؟؟ كلا الروايتين تتحدثان عن أحداث يومية لأصحاب الرواية وفيهما ضرب على بعض الأوتار الحساسة بالمجتمع من العلاقات بين الجنسين والغرام المتبادل بينهما إما بالخفاء هنا أو علانية في القاهرة أو بيروت.. ما ذكر في رواية بنات الرياض وما ذكر في رائعة الكاسر هما واقع نعيشه - مع بعض المبالغة في وصف الواقع في الروايتين - وهذا الواقع لا يلزمنا أن يكون لدينا مجهر لكي نكتشفه.. بل هو واقع صرنا نراه شاء من شاء وأبى من أبى.. المقصود هل لأن رائد قامة معروفة في منتدانا بل وفي أغلب الشبكات الهلالية -أعجبنا بضم الألف- بروايته بينما رجاء لأننا لا نعرف عنها الا أنها طالبة كلية طب أسنان سلطنا عليها أقلامنا وسياطنا؟؟ هل لأن رائد رجل شفعنا له ولأن رجاء فتاة قذفناها في أعز ما تملك؟؟ هل سلطة المجتمع الذكوري مدعاة لمدح رائد وذم رجاء؟؟ يعلم الله أنني لا أدعو لتوجيه سهام النقد اللاذع لرائد بسبب قصته لا والله فرائد يعلم مكانته في قلبي.. ويعلم مدى إعجابي بقلمه و "مساحته" التي أزروها بشكل دوري؛ لكنني فقط أدعو للتعقل في النقد ولاحسان الظن برجاء وعدم الربط بين مضمون القصة وشخصية كاتبها.. فالفن الأدبي يظل ضربا من خيال يصدق أحيانا ويكذب أحايين كثيرة..

رابعا.. وهذه بيني وبينك رائد.. وأعتقد أني ذكرتها لك في أحد الرسائل الخاصة المتبادلة بيننا مؤخرا.. رائد.. تصدق كنت أحاول أتعاطف مع زياد.. وكنت أقول يارب نورة تحن عليه.. بس سبحان الله ما قدرت.. ضغطت على روحي بس ما قدرت.. بس لا يهمك ترى البلاء فيني مو في طريقة سردك.. لأن والشهادة لله روايتك وطريقة سردها روعة حيل.. بس أنا اللي ما عاد فيني حيل :(

خامسا.. وهذا جواب على سؤالك الصغنون الذي طرحت في آخر القصة..

سؤال صغيرون
لو كنت مكان أحدهم ماذا كنت تفعل

أكون معاك صريح يا رائد .. لو كنت مكان أحدهم كان استغفرت الله العظيم عن كل اللي حصل.. وطويت صفحة الماضي.. وعاهدت الله ألا أعود لتلك التصرفات.. وحمدت الله اللي مد لي عمر علشان أتوب واقلع عن هالتصرفات :)

أخيرا.. رائد.. من جد أبدعت في الرواية.. سردك وتسلسل أفكارك كان جميل.. أسلوب التشويق كان عندك مجنون.. كلمة "يتبع" كانت تثير جنوني دائما.. الصور كانت معبرة.. استخدام المفردات العامية وتفاصيل المعسل والمقطم وبعض الأماكن الشعبية كان أكثر من رائع.. وصف الحالات النفسية التي مرت بزياد ونورة من ناحية وحمد من ناحية أخرى حينما يفشل في ربط نورة بزياد كان رائع أيضا.. مع أن بطلي القصة عند كثير من القراء هما نورة وزياد الا أنني أرى أن بطل القصة هو حمد .. ولكي أكون أكثر تجردا فبطل القصة الحقيقي هو كاتبها ألا وهو رائد :)

وبيق سلام من أخو دلال مرة ثانية :)

أبوحمـــ15ـــــــــــد

21/5/2006, 15:29

هلا عاشق & الكاسر :kello:

ياشين العجلة :kello: وانا ماتذكرت من بداية القصة الا العرجة :kello: ؟

سآم9

22/5/2006, 16:49

قصة خاااااااااااااااااااااااااااااااااااااااااااالعه جدن :angel:

وبصراحه اكثر واحد انبسطت عليه هو حمد .. ياخي شكله فلللللللللللللللللله .. :kany: :kany: ولا يهونون باقي الشباب زياد ونوره ونهى وميمي :angel: ..

<<< تحسون انه متحمس وداخل جوو .. (himo) (himo)

وما قصرت اخوي الكاسر ،، يعطيك العافيه على القصة الرائعه ،، وبصراحه احمد الله واشكره اني ما قريت القصة من اول من حطيت الموضوع ،، لاني وانا اقرا والقصه موجودة كاملة بالموضوع ،، جان الصمرقع من كتبة يتبع ،، :d:

تحياتي (himo)

خراب السفينه

22/5/2006, 19:28

تسلم الاناامل

تمياط الهلال

25/5/2006, 06:03

مافي صور حق راعيته الشورت الاخضر :cool:

على كل حال معك ياهلال

27/5/2006, 06:21

روووووعه ..

هلاليه والنعـم

28/5/2006, 00:25

:( :( :( :(

ياااحيااتي

عقب هالحب كللللله

!!!!

ااااه

يااارب !!

بصيح

يلااا

الله يووفقهم دنيا واخره !! < مافيه شي ينقال !!

تسللللم على القصه

واااه يازيااد يابعدي !! < حبته هههه

الله يعطيك العاافيه

:noo:

السد الازرق

29/5/2006, 01:10

مشكوور أخوي ,,,, قصه روعه والله لكن النهاية ماكانت مناسبه ,,,
لكن شي ماشالله عليك ,, ولي عوده ,,, :magkiss: :magkiss:

o0o زراق o0o

29/5/2006, 16:46

قصة رائعة والاروع اسلوبك في سرد القصة

بصراحة هالقصة فيها كوميديا كثير وتراجيديا اكثر :angel: << مسوي مثقف :d:

يعطيك العافية يامميز

ولو انا مكانهم استغفر ربي واطلبه العفو واتوب وماارجع للاشياء اللي صارت

تقبل فائق احترامي :)

o0o زراق o0o

29/5/2006, 16:47

رد مكرر

الكاسر888

29/5/2006, 19:38

الزعمياوي : نزلنا الثاني والثالث والرابع..بح شطبنا هههههههه نورت حبيبي

الدعيع : تراها بس اربعة اجزاء ===>> بدري ههههههههه نورت حبي

الديناصور : ركب كراعين ياملحهن ياشيخ بلا عتاب وبلا بطيخ ==>> يزعم ان عتاب لبنانيه هههه نورت

زراق شفت شلون: ذبحونا هالاتصالات مع اني الحمد لله الحين فاتورتي ماتتعدى 250 ريال :cool:

سندباد تستاهل نزلت الثاني لعيونك ياشيخ

هلالي مغرور : منهي غلا :angel:
عطنا سالفتها يابعد حيي

فتى : قل لجمهوري نزلت اربعة اجزاء وحفلتي ان شاء الله قريب في سميره ميس والتذكرة ب500 دولار وممنوع المشروب..نورت

عاشق العثرات

الكاسر ..
واصل هطولك

مهند ترى كذا اخق :qw:

الملك العائد: انت الممتاز مهب شارع الهرم
نورت

شكرا لحضوركم ..يتبع الردود :p

الكاسر888

29/5/2006, 19:49

هلالي الظهران: ليه لك بهالاماكن ذكريات حلوه؟

تسلم لاخوك رائد:)

هلالي من طفولتي : اتشرف بيك

الديناصور

يا سلام عليك يالكاسر ...

بس وش فيه ((حـــمـــــد)) ما غير يترووش؟؟؟

وألف سلامة لــ ((زيــــاد)) ... مع إني عاتب عليه بقوة ... أجل في واحد يعزم وحدة في موعد غرامي على ((غـــداء)) و الساعة 2 الظهر ... أما والله من الرومنسية عندكم يالسعوديين

وما زلنا في الإنتظار يا ألبي ... لا تطول علينا ...

بلا من زين الجو عندهم هههههههههههههههههههههه اجل موعد الديت مهب زين :angel:

نورت

شابع: معطيني وزارة السياحة عموله

الملك العائد : صدقت يابطل

السد: ابشر بعزك يابطل

هلالي مغرور: يفداك الزين قبل الشين يابطل

مدرعم : شيك ع الصور جتك بالخاص..الله يحوم كبدك انتي والصعيدية وع
نورت يابطل

زاوية منفرجة : امي وامك بالجنة ان شاء الله ...كملت

يتبع :jeng:

الكاسر888

29/5/2006, 19:56

هلالي من طفولتي:

<<< يلعن ابليسك يارائد انت وسوالفك ماخليتني اروووح انهبل مع شلتنا ((المساطيل)) بموضوعنا

بس الله الله بالتصويت انت ومن يعز عليك

ياحبيلك يابو سعد

حب الهلال: يعافي قلبك

الشريف محمد: هههههههههههه تحمست اجل :cool:

الديناصور : هههههههههههه اجل ميمي بخيل ههههههههههههههه

ومشكووور يالكاسر وربي يعطيك العافية ... حقيقة متعتنا على مدار لإسبوع بيتبع ... بس النهاية مأساوية ... وأنا عن نفسي ما دخلت مخي قضية هالتحاليل أبد لأن إللي كاتبه الله هو إللي يصير مع إحترامي للطب الحديث ... ولكن فوق كل ذي علم عليم ...

ومشكوووور يالكاســــر ....

الله يمتع ايامك..التحليل شيء علمي مثبت الله يبارك فيك شكرا ع حضورك

هلالي من طفولتي : بالفعل المنلية خطا املائي شكرا لك ع المتابعه

ابو حمد الله يبارك فيك: ماقصر ابو عثرات شرح لك شكرا لحضورك حبيبي

فتى الساحة واثبت نجاحه برى تركيا

حب الهلال: مغسي ع الحضور

الكاسر888

8/6/2006, 07:44

POWER
<< هذا المستخدم خاش جو ويحس انه خاق شوي ما يدري ليه

لي عودة عقب ما تروح الحالة

وقبل ارجع احب اقول موضوع قوي وطريقة العرض ابداع كالعاده ....

رح ياشيخ

يافديتكـ ..نورت حبيبي

اخو دلال

في البداية ألف شكر لك يا رائد على هالاضافة الجديدة للمنتدى.. بحق هالرائعة هي أحد الاضافات الجديدة والجيدة للمنتدى.. بالأمس القريب كان هناك مجلة روعة.. وكان هناك صدى الكلمات.. وكان هناك مسابقة المساطيل والسحالي الخ .. واليوم هنا رائعة الكاسر

شهادة من شخص اعتز فيه وبرايه الحكيم

رائد .. إذا سمحت لي لدي عدة ملاحظات سأسردها بشكل سريع.. وهي بالطبع كأي ملاحظات تحتمل الصواب وتحتمل الخطأ

بالعكس شيء يفرحني اقرا نقد ملاحظات توجيهات..وش فايدة النشر ان لم يكن فيه هذه الاشياء

أولا.. أنا لي تحفظ كبير لمن يكتب روايات أدبية أو قصص قصيرة أو حتى قصائد شعرية هنا بالمنتدى ويبني على ردود أفعال أو عبارات إعجاب شباب المنتدى.. قد تقول لماذا؟؟ هل هو تقليل بحق الشباب؟؟ لا والله ليس تقليلا بحق أحد لكن وبكل صراحة غالب شباب وبنات المنتدى هم من صغار السن أكاديميا و أعني بذلك ليسوا من حملة الشهادات العليا بل وبعضهم الى الآن ليسوا من حملة الشهادة الجامعية وبالتالي ليسوا قادرين على تقييم القصة بشكل أكاديمي أدبي.. وأكثر ما يستطيعون تقديمه هو انطباع بسيط يعبرون فيه عن إعجابهم بالقصة أو عدم إعجابهم بها.. فكثيرا ما نقرأ بعد أي رواية أو قصة أو قصيدة عبارة مثل " الرواية صراحة روعة" أو " صراحة روايتك أعجبتني" أو " روايتك زي وجهك ما فيها ملح " الخ الخ من العبارات الانطباعية.. لكن نادرا جدا تلقى شخص يمسك قصتك ويحللها أدبيا ويتكلم عن الحبكة الدرامية فيها والبلاغة والاستعارة والمجاز والتجريد الخ الخ.. أنا لا أزعم أنني أجيد هذه الفنون فهذه فنون لها أهلها.. و أنا لا أدعو لعدم طرح القصة هنا بالمنتدى لكن أفضل أن تطرحها في منتدانا هنا بالاضافة إلى منتدى أدبي آخر لكي تجمع بين استقبال الانطباعات البسيطة والتقييم الأدبي الموضوعي

كلامك مية مية..وان بغيت الصدق شخصيا مااحب انزل موضوع لي في النت الا يكون هنا بشبكة الهلال فيه نسخة منه..احيانا كثير اعرف انه غير مكانه وماراح اجد التجاوب الي ابغاه..بس يهمني ان شبكة الهلال يكون فيها نسخة ..

نزلت الموضوع لا اخفيك امرا باربع منتديات ..الاول هنا وكان التجاوب لطيف وجميل..نزلتها بمنتدى كبير ..حق المموضوع تجاوب مااذكر لي موضوع اخر حقق تجاوب مثل هذا..جائتني انتقادات وتوجيهات وملاحظات بس كلها على الخاص او ماسنجر..محد قدم تقييم ادبي للنص في المنتدى " ربما لانه نص يعتبر شعبي ! "..نزلته بمنتدى اماراتي متخصص بالقصص ومشهور فيها..ومع ذلك كل الي جاني انطباعات مشابهه للي هنا....واخيرا بمنتدى شقيق مبتدىء لم اتوقع منه اصلا اي تجاوب وهذا ماحصل..

لا اخفيك جاءتني انتقادات وتوجيهات لكن ليس بالحجم المرجو من شخص يتمنى النقد للتطوير..ولكن هذا ديدننا..واتمنى مزيدا من التوفيق والعشم فيك وبمن مثلك ياصديقي

ثانيا.. في بعض الأحيان.. يربط المتلقي بين شخصيات القصة و شخصية الكاتب نفسه.. بل في كثير من الأحيان يجزم بعض القراء وخصوصا من يعرفون الكاتب بصفة شخصية بعلاقة الكاتب بشخصية معينة بالقصة.. أنت رائد هل تجد نفسك في أحد الشخصيات؟؟ هل تجدها في زياد؟؟ أم في حمد؟؟ أم في نورة

احيانا كثير يربطون بين شخصية الكاتب وشخصية ابطاله ودايم يعاني اصحاب الروايات من هالنقطة ولا اخفيك وصلني مثل هالنار ولكن للي يعرفني ماراح يلقا رائد في النص ابدا..وهذا تحدي صغير حاولت اسويه وقدرت الحمد لله فيه

ثالثا.. وهذه الفقرة أرجو ألا تثير حساسية أحد.. رواية بنات الرياض.. ورائعة الكاسر.. هل بينهما فرق ؟؟ كلا الروايتين تتحدثان عن أحداث يومية لأصحاب الرواية وفيهما ضرب على بعض الأوتار الحساسة بالمجتمع من العلاقات بين الجنسين والغرام المتبادل بينهما إما بالخفاء هنا أو علانية في القاهرة أو بيروت.. ما ذكر في رواية بنات الرياض وما ذكر في رائعة الكاسر هما واقع نعيشه - مع بعض المبالغة في وصف الواقع في الروايتين - وهذا الواقع لا يلزمنا أن يكون لدينا مجهر لكي نكتشفه.. بل هو واقع صرنا نراه شاء من شاء وأبى من أبى.. المقصود هل لأن رائد قامة معروفة في منتدانا بل وفي أغلب الشبكات الهلالية -أعجبنا بضم الألف- بروايته بينما رجاء لأننا لا نعرف عنها الا أنها طالبة كلية طب أسنان سلطنا عليها أقلامنا وسياطنا؟؟ هل لأن رائد رجل شفعنا له ولأن رجاء فتاة قذفناها في أعز ما تملك؟؟ هل سلطة المجتمع الذكوري مدعاة لمدح رائد وذم رجاء؟؟ يعلم الله أنني لا أدعو لتوجيه سهام النقد اللاذع لرائد بسبب قصته لا والله فرائد يعلم مكانته في قلبي.. ويعلم مدى إعجابي بقلمه و "مساحته" التي أزروها بشكل دوري؛ لكنني فقط أدعو للتعقل في النقد ولاحسان الظن برجاء وعدم الربط بين مضمون القصة وشخصية كاتبها.. فالفن الأدبي يظل ضربا من خيال يصدق أحيانا ويكذب أحايين كثيرة..

دعني اتكلم باختصار عن بنات الرياض ويمكن هذا اول تعليق لي عليها في النت مع ان الصجة خلت كل مين يعلق..يوم كنت اقرا واتابع هجوم البعض عليها بشدة ودفاع الاخر الاخر بشدة ايضا توقعت بقرا رواية مشابهه للعدامة او الشميسي ..توقعت بقرا قصة رجل جاء ثم ذهب..توقعت بقرا شقة الحرية..توقعت بقرا نص يستحق الضجة الي حصلت لكن للاسف عزيزي ..كثيرين من ابناء شعبي غوغائيين..كثيرين انتقدوها بدون مايقرون الرواية وهذا شيء خطا ومليون خطا اكتفوا بمقاطع مبتورة من النص الاساسي الكبير وهذا شيء خاطىء..المهم قريتها عرفت انها رواية عادية لو نزلت بمنتدى انترنت يمكن راحت زي هالموضوع لقسم المواضيع الذهبية :d: بس ماتستحق هالضجة..يعني رواية خفيفة زي القصص الي تقراها في النت ..خفيفة تفتقر بصراحة لكثير من ابجديات العمل الروائي ..رواية اقرب لها قصة تقراها في منتدى جمعت وطبعت في كتاب..عنوانها مع ان الي كاتبها بنت بالاضافه لكلمة غازي في الكتاب اشعلت نار المنتقدين من جهة والمدافعين من جهة وبصراحة هي رواية عادية لاتستحق الهجوم ولا الدفاع ..يكفي اللعب بالوسط :d: امزح يعني كيفي تقراها وتسكرها وتقول الله يهدي هالبنات الموجودات في القصة ..رجاء سلطت الضوء على طبقة معينة ..وأخطأت بجوانب استفزت شباب الرياض بوصفهمب الجلوف كلهم " وينها ماشافتني كيوت ونعوم (himo) " ايضا عنوانها كان له اثر ايجابي/سلبي ع الرواية..فالتعميم كان خاطىء رغم انها بالداخل لم تعمم ولكن العنوان جلب الاستعداء لها.

رابعا.. وهذه بيني وبينك رائد.. وأعتقد أني ذكرتها لك في أحد الرسائل الخاصة المتبادلة بيننا مؤخرا.. رائد.. تصدق كنت أحاول أتعاطف مع زياد.. وكنت أقول يارب نورة تحن عليه.. بس سبحان الله ما قدرت.. ضغطت على روحي بس ما قدرت.. بس لا يهمك ترى البلاء فيني مو في طريقة سردك.. لأن والشهادة لله روايتك وطريقة سردها روعة حيل.. بس أنا اللي ما عاد فيني حيل

ماعليك تعال ماسنجر وارجعك لايام الصبا والقليل الرهيف :p

أخيرا.. رائد.. من جد أبدعت في الرواية.. سردك وتسلسل أفكارك كان جميل.. أسلوب التشويق كان عندك مجنون.. كلمة "يتبع" كانت تثير جنوني دائما.. الصور كانت معبرة.. استخدام المفردات العامية وتفاصيل المعسل والمقطم وبعض الأماكن الشعبية كان أكثر من رائع.. وصف الحالات النفسية التي مرت بزياد ونورة من ناحية وحمد من ناحية أخرى حينما يفشل في ربط نورة بزياد كان رائع أيضا.. مع أن بطلي القصة عند كثير من القراء هما نورة وزياد الا أنني أرى أن بطل القصة هو حمد .. ولكي أكون أكثر تجردا فبطل القصة الحقيقي هو كاتبها ألا وهو رائد

حبيب قلبي ابو عابد..كلامك كبير والله ..سعدت بحضورك وطلتك ..وردك الي يفرح رائد ان فيه ناس ترد وهي حريصة ع النقد البناء...

وين الغزل الموعود فيه يا واد يا اسمر :rolleyes: