المساعد الشخصي الرقمي

مشاهدة النسخة كاملة : تعالو نتناقش هالموضوع...ليه حنا نحب الكوره والرياضه ؟؟؟

الطيرالهلالي
7/12/2001, 23:09
بسم الله الرحمن الرحيم
السلام عليكم

ياجماعة الخير احنا ليه نحب نتابع الكوره ونروع للملعب ونخسر فلوس وندور مواقع الكوره في الانترنت ووووو
على ابش وش الفايده..
انا حستست (يعني حاكيت)...روحي كثير وقلت لها ليه حنا نحب الكوره..ونفرح اذا فاز الهلال زلا المنتخب ونزعل اذا انهزمو..
قلت عشان هذا الفرح الي نفرحه حبينا الكوره وعشان الحزن حبينا الكوره..
وبعدين الرياضه حلوه وموصي بها الرسول ومدام كرة القدم هي الاكثر شعبيه في العالم احنا مراح نختلف عنهم...

بس هل تتوقوعون ان العزوف الجماهيري عن الملاعب ان يكون ان الجماهير ملت من الكوره...

عموما المكرفون ومعكم ونبي ارائكم..

اخوكم
الطير سداااااح:cool:
ابو الذهب
7/12/2001, 23:18
هلا .. الطير سداح .. سداح عط الحر فرصه ;)

شف يأخى الجماهير ماملت من الكوره . لكن القنوات الفضائيه ماخلت شى حتى المباريات الغير منقوله

فى التلفزيون السعودى .. تنقلها قناه الاوربت .. يعنى الواحد يشوف المباره بين عياله احسنله بكثير من

روحه الملعب وخصوصا انه اذا سلم ظهره من الحب والفصفص وترجيم الحكام بقوارير المويه مايضمن

ان سيارته بعد انتها المباره بتكون سليمه والله يكون فى عونه من الزحمه :(
عاشق الهلال حسون
7/12/2001, 23:18
عطني المايك ....



صراحه ماأتوقع انه يكون ملل والله ..... لكن اتوقع ان المستوى قل ....... علشان كذا قلت الجماهير



وشكرا

خذ المايك
صمام الامان
7/12/2001, 23:48
اتوقع ان السبب يعود لوجود الفضائيات اللتي تنقل المباراة مع تحليل للمباراة
الطيرالهلالي
8/12/2001, 00:16
مرحبا شباب..

شوفو موضوع قل الجماهير يعود ان الجماهير ملت من الكوره...

بس جاوبوني انتم ليه تحبون الكوره......
خمسطعش
8/12/2001, 03:26
صحيح ان الفضائيات لها دور بس لاتنسى ان الدوري عندنا مربع ذهبي يعني الي عنده مبارة مأجله يمديه يلعب والي يلعب مع فريق مو مره مو شي يلعب بالرديف هنا ينقص عامل التشويق والحماس الي حنا حبينا الكره علشانه وعلشان الهلال ..وبعد فيه شي المحترفين الي عندك يجون هنا يدربون على يد احسن المدربين وبعدين يروح ولا استفدت منه شي وياكلون فلوسك واخرتها عود اسنان وعلى المطار يعني ان مافيه شي نروح علشانه الملعب لا لعب زي الناس ولاحماس كن الاعب يلعب في الاستراحه حقتهم مو في ملعب وجماهير ... ومو علشانابس علشانه هو بعد يحترف برا ويحتك بالعالم بدال ماهو قاعد يحكي في الجرايد .....
ويخرط .... اجل افضل دوري عربي مايحترف منه احد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وشكرا على الموضوع الحلو اخوي سداح
هاوي الهلال
8/12/2001, 03:43
هلا فيك اخوي سداح ...

اول شئ متابعة كرة القدم .. (وبالذات الهلال متعه ) ... ولما تتابع كوره ولا تروح لملعب فانت تدور متعتك ...
ومها خسرت .. بس في النهاية بتكون مبسوط لانك نفذت رغبه خاصه فيك ...
مثل اللي يصرف الاف في السفر .. نفس الوضع لبحثه عن المتعه ... وتنفيذ رغبة ..


اما العزوف الجماهيري .. فله اسباب كثيره ..
اهمها ... شدة التعصب اللي زادت الفتره الاخيره .. وكل واحد يقول اقعد في البيت اريح نفسي ماله داعي يجيني الضغط والسكر
وايضا الفضائيات
اما اللي يقول ارتفاع الاسعار .. فالاسعار هذا هو سعرها من زمان


بس الملاحظه الغريبه .. ان اكثر الحضور من صغار السن .. عكس السابق ...
ويمكن ها الشئ يمنع الكثير من الذهاب للملعب .. بسبب اللي يروحون للازعاج والرجه .. ولا مايدرون عن الكوره
واللي يرفع ضغطك ان 70 % من الحضور الحين مافراسهم كوره
فشف عاد رفعت الضغط .. لمايكون واحد جنبك .. راعي رجه .. ولافراسه كوره .. وطول المباراة مصدعك .. ومسوي فيها الشتالي .. وقتها البيت احسن ...


تحياتي
:)
الطيرالهلالي
8/12/2001, 04:34
السلام.....

اخواني كلامكم سليم.....يعني سليم كلام..

وخصوصاً مشكلة الفضائيات و التلفزيون....لكن لو تشفرت المباريات ولعاد تقدر تشوف الا ان تدفع اكثر من الي تدفعه في الملعب ...اكيد انك راح تحظر....
بس فيه مشكله اذا شفرت يمكن العزوف الجماهيري يزود يعني راح يكون سلاح ذو حدين ...وان جيتو الحق الامر خطير ولهوب سهل وحله صعب..
ســ9ــامــ9ــي
10/12/2001, 18:11
والله تبي الصدق يالطير سداح ...

إلى يومك هذا وأنا ما أدري ليه نحب الكورة ...

إذا الواحد أنهزم وصار حالته حاله قال أنا وش دخلني وحاول ينسى ...

مع انه ما فيه امل ...

ولكن وش نسوي ...

نحب الكورة غصب علينا ...

والعزوف عن الملاعب بسبب النقل أكيد ...

ولك تحياتي ...

أخوك / سفر المرزوقي .
بـحـر
10/12/2001, 18:21
هلا وسهلا اخوى سداح

فى ذمتك وش فيه غير الرياضه عندك.

بعدين الرياضه سهله وفى متناول الجميع الصغير قبل الكبير.

اما عزوف الجماهير تدرى ليش؟

الملعب 3/4 مبزره و متهوريين فى الملعب وفى السواقه.

<<<:::::: ترانى عاقل. :)

تحياتى.
زعيم الهلاليين
10/12/2001, 19:19
مشكور على هاموضوع

وبعدين العب نزل مستوى الحماس فيه

وما فيه ذاك العب الي اول
الطيرالهلالي
11/12/2001, 13:45
السلام...

والله ضاعت الطاسه..:D

تدرون ..تعدة الاسباب والمشكله وحده...والنتيجه وحده..

عزوف جماهيري عن الملاعب ...ابتعاد الجماهير عن متابعة كورة القدم مثل اول...

والمشكله ان الاتحاد السعودي لازال متحفظ حول هذي المشكله الشي الوحيد الي سواه هو تخفيض التذكره..المشكله ماهي من التذاكر المشكله من نفس الجماهير لاتريد الحظور....

ولكن اعتقد ان الحل الانسب هو تشفير المباريات والي يصير يصير..