فهد وغازي.. وواقع الشباب السعودي.. فضائح

[لايفوتك]

* في الحقيقة أول مرة أكتب موضوع خارج منتدى الرياضة العربية والعالمية، وأرجو أن تقبلوني هالمرة بس.
* لكن اللي دعاني للكتابة هو الحال المؤسف اللي وصل اليه الشباب السعودي (بيني وبينكم حتى الشياب صار ينخاف منهم).
* صورتنا في الخارج صارت تكسف وتخلي الواحد مايدري وين يودي وجهه من يوم مايقول انه سعودي، والسبب بعض المحسوبين على الشعب السعودي.
* أجل اسمعوا خوينا (فهد) اللي طايح في غرام رزان وماغير يتصل عليها يوم الأحد والخميس لدرجة انهم يقولون انه أصيب بالاغماء في رمضان والسبب انه حرموه من مشاهدة رزان.
* تصدقون عاد .. في مرة متصل خوينا وقاعد يعطي رزان من هالكلام .. يقولها انت مشمش وانت فراولة وانت تفاحة .. اللي يسمع يقول قسم الخضار في بندة .. والله حاجة تفشل.. يقوم يرد عليه أبو حسين ويقول يا أخ فهد عيب عليك (أنا قلت ذلحين هذا العاقل اللي بيصلح الهرجة) واليا أبو حسين طلع أخبل منه يوم يقول المفروض تقول انت وردة وانت عسل .. ليه.. لأن رزان أكبر من الفراولة والقريب فروت!!
* ولا جات الهرجة للثقافة اسمع الحكي اللي يفتح النفس.
* طال عمركم هذا دكتور اسمه (غازي) رايح للبنان وبيشارك في برنامج الحلقة الأضعف (اللي يشوفه وهو كاشخ ويسمع انه دكتور يقول هذا اللي مابعده).
* المهم.. جاء دوره وتسأله المذيعة .. في السعودية في أي مدينة توجد جامعة أم القرى؟!
* وعاد خوينا قال سهلة في الرياض:confused: .
* وبعد ما انتهت الجولة تقوله المذيعة معقولة ماتعرف وين أم القرى وانت من السعودية .. وتسأله انت من وين ماخذ الدكتوراه .. قالها من جامعة الملك فيصل .. وتقوله وين هذي الجامعة.. يقولها في الدمام
* واحد يدرس في جامعة ومايدري هي وين.. تبيه يعرف الجامعة اللي هناك.
* بلعناها.. ويجيه السؤال اللي بعده.. وتقوله كم وجه للهرم؟ .. يقوم الدكتور يقول وجه واحد !!!!
* ياهوه.. أقطع هدومي ولا أنقز من فوق الفيصلية.. ولا تدرون أبسافر لبنان وأرجع هالدختور.
* تقوم المذيعة تتجنن (معاها حق) وتقول خلينا نفكر سوى كيف نخلي الهرم بوجه واحد؟ ( تحشه) وهو يضحك (يابرودة دمك.. والله فضحتنا).
* في نهاية الحلقة .. يقول والله معلوماتي زينة .. بس مادري كيف مافزت بالمبلغ.( أقول انثبر الله يرحم والديك).
* وان عرجنا على الاتيكيت.. حنا قاعدين في المطعم في إحدى الدول الأوروبية .. والكل قاعد عالكرسي وماسك الشوكة والسكين وشغال سف.. قوم تعال انت يابو بندر .. وتربع فوق الكرسي وارفع الكم .. وامسك (الاستيك) وسفه باليد.. والخليقة تطالع فيه.
* والله ياجماعة الخير الواحد صار يخجل من الوضع المتردي اللي وصل بعض الناس اليه.. واللي بره يعتقدون أن الجميع هنا من طقة فهد وأبوحسين.
* واحد أمريكي معي عالماسنجر .. يسألني يقول عندكم سيارات؟!!!! (لاتعليق).
*

[زعيم الهلاليين]

ههههههههههههه
والله انك صادق شي يفشل

لكن وش تقول ........... ما عليهم شرهه

[منادي]

ما اقول الا الله يخلف

والله الشباب اللي من طقة فهد وغازي اللي ذكرتهم اخوي لا يفوتك المفروض يسوون عليهم حجر لانهم سفهاء بمعنى الكلمة

[الطيرالهلالي]

السلام عليكم:

لايفوتك...لاعاد تكرر تكتب ثانيه هنا ..خلك في منتدى الرياضه

تدري ليه..
انزل

7
7
7
7
7
7
7
7
7
7
7
7
7
7
7
7
7....
ياخوي فضحتني ..


بس معك حق احنا في عيون العالم ناس متخلفين

[الاسير الهلالي]

انا معك ان الحالتين الاولى والثانية شاذة ومحزنة وتفضح لكن ؟؟؟؟؟؟؟؟؟؟؟؟؟؟؟ اللي تقول انه في اوروبا وياكل بيده اعتقد انه ليس مخجلا بل هو عين الصواب وانا عن نفسي افرح حينما ارى مثله فهذه هي السنة فقد قال صلى الله عليه وسلم :
(( كل بيمينك وكل مما يليك )) والاكل باليد دون شوكة او ملعقة ليس عيبا بل هو عين الصواب وجهة نظر خاصة قد تكون صحيحة وقد تكون خاطئة

شكرا لك على هذا الموضوع واتمنى ان نرى مواضيعاً لك معنا في المنتدى العام

اخوك الاسير الهلالي - الرس

[ابراهيم النجيدي]

هلا وغلا بلا يفوتك , ونورت المنتدى بطلتك ,,,

مشكله بعض الشباب إنه ينظر لمثل هذي التصرفات والتجاوزات من منظور شخصي بحت ويعتقدها حريه شخصيه لا تترتب عليها أي مسؤليه تجاه المحيطين به ,,,

وهذا غير صحيح .... فمثل هذي التصرفات اللامسؤله تنعكس آثارها على المجتمع بأسره وعلى نظرة الشعوب والمجتمعات الأخرى لنا كشعب مسلم يجب أن نعكس الصوره الحقيقيه لنا ولديننا الحنيف , فنحن وبفضل من الله ومنته علينا رزقنا بالحرمين الشرفين , فكيف نعكس مثل تلك الصور الماجنه أو المتخلفه عن مجتمعنا ‍‍!! ,,,

والله هذا الحال مما يؤسف له وأتمنى من الجميع التفكير مليا قبل الإقدام على مايسيء لوطننا وديننا ,,,

تحياتي الخالصه لك ,,,

[الصبحي]

ارجوا ان لاتحرمنا من قلمك الرائع وموضوع يطرح مشكله نعاني منها بوجود بعض الشباب اللا مبالي

تحياتي لك

[3boud]

صح لسانك

ولو اني اتفق مع الاسير في النقطة الاخيرة