.... الــخــيـــمـــة الـــرمـــضـــانـــيــــة .... ( 12 )

[مدرعـم]

.. حياالله الوجيه المنورة ..

وحياكم في حلقة جديدة ودردشة خفيفة مع ضيف جديد في خيمتكم الرمضانية ..

نسعد بصحبتكم وتلقي مداخلاتكم وطرح اسئلتكم على الضيف وهو يلعب بالسبحة ..

ضيفنا اليوم شخصية من الذهب والالماس وقلب الشبكة النابض بالاحساس بالسعادة ومحبة الناس :magkiss: ..

ضيفنا العزيز فاكهة الاساطير ::

.. الاســـطــــوره ..

الموضوع مقفل الآن وسيتم فتحه مساء هذا اليوم عند الساعه ( 12:00 ) بتوقيت الصعودية

الخامسة مساء(ن) بتوقيت مملكة الثقبة ..


(himo)

[مدرعـم]

يالله حي الاسطورة تو مانور المكان يابعد حيي ..

وشلونك وشلون رمضان معاك مشاءالله وش هالسبحة الزهرية والبشت الفسفوري مسوي طقم لااا وحاط رقم 10 راس حربة ماشاءالله عليك :D :D

سم مد يدك تبي بسكوت ولا سن توب :angel:

سؤالنا اللي دايم نطرحه باول كل لقاء ::

قدامك صحن جعه وصحن فيمتو .. وش تختار منهم ؟؟؟

<<< مدري من قاص عليه وقاله ان هالسؤال مهم :jhgy:

[برستيج]

تسلم يا مدرعم

وان شاء الله اكون ضيف خفيف عليكم اليوم .. :jhgy: .. :angel:


حي الله ابو عبدالعزيز .. تفضل القهوه .. بيمينك انت وخشتك .. :amle:

<<<< شكله ناويك الليله .. (rambo)


(himo)

[TOTTI- 10]

.. هلا و الله هلا ..

.. يوم ربوع و رمضان .. الله يعينك يا ياسر .. و الله شكل الشباب اليوم ناوينك ..

كيف يقضي ياسر يومه في رمضان .. !

و راجعين .. :)

[الاســـطــــوره]

ياهلا بالوجيه المسفهله :rolleyes: ,,

هلا درعومي :) ,,

سؤالنا اللي دايم نطرحه باول كل لقاء ::

قدامك صحن جعه وصحن فيمتو .. وش تختار منهم ؟؟؟

والله صحن الفيمتو موضه قديمه , والان الجعه هي اللي تدل على الرقي :p ,,

< = = = = = = = أحس انك معجب بشخصيه (( ابوغانم )) في مسلسل الدنيا لحظه :D ,,

[مدرعـم]

سم الله عدوك ..

الا وش الوجبة المفضله عندك برمضان وماتشتهي تفطر دونه سواء بالليل او بالنهار عادي ؟؟؟

:angel:

[الاســـطــــوره]

مين برستيج !!

ابو راس مبروم زي الاناناس :rolleyes: ,,

< = = = = = بيباغته قبل لايروح هو فيها :rolleyes: ,,


بعدين قهوتكم بايته وبارده وطعمها غير (( وش السالفه )) :amle: ,,

[برستيج]

سؤال خفيف على المعده ..


بكم مليوووون ريال اكتتبت في اتحاد الاتصالات ؟


(rambo)

[الاســـطــــوره]

هلا بوخلود :) ,,

.. يوم ربوع و رمضان .. الله يعينك يا ياسر .. و الله شكل الشباب اليوم ناوينك ..

كيف يقضي ياسر يومه في رمضان .. !

اشوا انها ساعه :angel: ,,

والله يومي في الفتره الصاحبهي وحتى الظهر في الدوام بعدها اجلس فتره العصر اتفرج على المسلسلات حتى وقت الاذان واحيانا اقيل لي ساعه خاصه اذا كنت ماخذت كفايتي من النوم :) ,,

بعدها تكون جلساتي مختلفه مابين النت والجلسه مع الشباب حتى وقت السحور ثم تنزيل الاخبار وبعدها صلاه الفجر ثم النوم للدوام :) ,,


روتين ممل (( عارف )) :cool: بس رمضان يقلل عليك فرص التعويض في النهار :) ,,,

[مدرعـم]

الله يهديك يابرستيج فشلتنا وش ذي القهوة وش في لونها تسذا اول مره اشوف قهوة لونها برونزي بس ماعليك طعمها مايحتاج بس حاره شوي يبيلها ثلج (( ينسطل على اي شي :jhgy: ))..

الا بوياسر على طاري المسلسلات ::

وش برنامجك المفضل وتحرص على متابعته غير هزيم الرعد بسبيس تون ؟؟؟

:angel:

[الاســـطــــوره]

درعم يامدرعم ,,

وش الوجبة المفضله عندك برمضان وماتشتهي تفطر دونه سواء بالليل او بالنهار عادي ؟؟؟

والله في هاذي مااستغنى عن الفطاير بالخضار وعاده الدونات واصابع حلى :angel: ,,,

[TOTTI- 10]

.. ما ودي ارفع ضغطك يا ياسر بس ودي اسئلك سؤال ..

الانتر .. متى يبي يفرح .. !!

فريق فيه كل شي .. بس تخبطه بادي مع بدايه الموسم .. !

الفريق لعب ثمان مباريات و ما جاب الا 12 نقطه .. يعني نص عدد النقاط الممكنه .. !

و وش تتوقع بكره .. فيه اربعه جديده و الا .. ؟

[الاســـطــــوره]

برستيج ,,,

سؤال خفيف على المعده ..


بكم مليوووون ريال اكتتبت في اتحاد الاتصالات ؟

مليون :eek: ,,


والله يابرستيج شكلي تحسبني " داج " اقعد اوزي هالقروش تحت البلاط واكنز من هالهلل :amle: ,,,

حتى قل ندخل بالالاف بس ويالله يخب بعد :) ,,,

[برستيج]

الله يهديك يابرستيج فشلتنا وش ذي القهوة وش في لونها
انت يالشين .. وش عرفك في القهوه .. انت حدك عصير سنتوب ويخب عليك .. :p

خلنا من الهواش الحين .. وخلنا نشوف ضيفنا .. ولي تفاهم معك بعدين .. :kayf:


اقول ياسر ..

وش الموضوع اللي كتبته و تشوف انه افضل ما كتب الاسطوره الى الان ؟

:)

[الاســـطــــوره]

مدرعم ,,,

بوياسر على طاري المسلسلات ::

وش برنامجك المفضل وتحرص على متابعته غير هزيم الرعد بسبيس تون ؟؟؟

والله اللي احرص عليها الخليجي (( الدنيا لحظه )) و (( بعد الشتات )) ماافوت اى حلقه :) ولو اني فوتت (( دنيا القوي )) ولاعاد يمديني اتابعها :( ,,

[ياسر عبدالعزيز]

مرحبيتين :kany:
راجع لك بس شوي اصحصح :N:

[مدرعـم]

الا على طاري الفطاير ..

وش علاقتك مع المطبخ يقولون انك احسن واحد يعرف يلف سمبوسة عنب ؟؟؟

[الاســـطــــوره]

توتي ,,

ما ودي ارفع ضغطك يا ياسر بس ودي اسئلك سؤال ..

الانتر .. متى يبي يفرح .. !!

فريق فيه كل شي .. بس تخبطه بادي مع بدايه الموسم .. !

الفريق لعب ثمان مباريات و ما جاب الا 12 نقطه .. يعني نص عدد النقاط الممكنه .. !

و وش تتوقع بكره .. فيه اربعه جديده و الا .. ؟

بالعكس لا رفعه ضغط ولاشىء , فريق فعلا يملك نجوم ولكن برأيي ان الفريق لم يوفق مع اصابات لاعبيه ومدربيه , ولكن الجولات لازالت كثيره ولازالت المنافسه متاح للكل,


ولو اني ارى ان مانشيني سينهض بالفريق فحتى لو لم يحقق هذا الموسم فانا متفائل بقدرته التدريبيه بشرط المحافظه على هذه العناصر حتى المواسم القادمه وانا اوؤكد لك تقدمه ,,,

صحيح ان الفريق تخبط في الدوري الايطالي ولكن حتى الان يسير بقوه في بطوله اوربا واتمنى ان يحقق بطوله اوربا ويأخذ المركز السادس ان لزم الامر في الدوري الايطالي :) ,,,

اما بالنسبه لمباراه الغد , فأن لعب توتي كما لعب امام الانتر فالفوز سيكون حليف روما بإذن الله , ولكن رباعيه لا اعتقد ولكني اتعاطف مع روما لاجل توتي ولان جماعه المنشطات يستخفون بهذا الفريق كثيرا فليت يعطيهم درس بكره :) ,,

[الاســـطــــوره]

برستيج ,,

وش الموضوع اللي كتبته و تشوف انه افضل ما كتب الاسطوره الى الان ؟

انا مااقدر اقيس مواضيعي لاني الكاتب ولكن حسب مااشعره انا وشعره ممن قرأ المواضيع التي كتبتها لازال موضوع (( التحكيم ومسيرته في ظلم الهلال )) له الاثر الاكبر لدي , لانه مدعم بكل شىء (( صور ولقطات فيديو )) :) , ثم يأتي بعدها الموضوع في النصر (( دايما دموع )) :D ,,

[ياسر عبدالعزيز]

وش اصحصح وارجع لكم
V
V
V
V
V
V
حلى طلعت :D




وش سالفة الانتر :slv:
هذ ثاني مباراه يضيع الفوز فيه يكون متقدم بهدفين ويتعادل

[مدرعـم]

بحكم انك شقراوي يابوالاساطير وتعز الريال على ذمة بوكليجا داج :angel:

وش لون اجواء رمضان بشقراء ؟؟؟ ووش تفرق عنا بولاية الثقبة ؟؟؟

<<< احس انه اصعب سعوال :jhgy:

[TOTTI- 10]

تتابع مسلسل دنيا القوي .. !

الكويتين مخربينها في ذا المسلسل .. وش رايك ؟ :rolleyes:

[الاســـطــــوره]

ياسر ,,

مرحبيتين
راجع لك بس شوي اصحصح

ياخوي انت ياجوعان وتبي تاكل يا 24 ساعه فاقد ونايم :amle: ,,,

[الاســـطــــوره]

مدرعم ,,

وش علاقتك مع المطبخ يقولون انك احسن واحد يعرف يلف سمبوسة عنب ؟؟؟

يارجال خلها على ربك , يالله اعرف اسوي شاهي :( , والله الودي ودي اعرف اسوي كم شىء بس يدوب القهوه والشاهي ولاعرفت اسويها بعد الا بعد مااحتجت لها في اختبارات الثانوي (( يعني انحديت عليها بالعربي )) :d ,,

[الصبحي]

حيا الله الاسطوره

كيفك اخوي وكيف رمضان وياك

احم نبدأ الفطور <<<< :slv:

اخوي ياسر شنو الشي اللي تفتقده في رمضان زمان

حياتك مع الالعاب الناريه خاصة في هالشهر

موقف طريف حصلك في هالشهر


تحياتي وراجعين

[برستيج]

سؤال تحشيشي


لو طلبنا منك تسوي تشكيلة فريق من اعضاء الشبكه ( 11 ) لاعب .. من تحط ؟

لاحظ اننا راح نباري ريال مدريد .. :jhgy:


(himo)

[الاســـطــــوره]

ياسر ,,

وش سالفة الانتر
هذ ثاني مباراه يضيع الفوز فيه يكون متقدم بهدفين ويتعادل

انا سبق وقلتها مشكله الانتر في دفاعه وحراسته , بعد تغيير تولدو فأن فونتانا قدم مستيات لابأس بها وربما افضل من بدايه تولدو مع الفريق في بدايه في الموسم ويمكن شفت المباراه امام ميلان انقذ كرتين خطيرات جدا وابدع في ابعادهما :) ,,

الدفاع يجب في فتره الانتقال الثانيه ان يضع موراتي ومانشيني العين على احد المدافعين البارزين ليغطي عيوب الدفاع ,,,

[الاســـطــــوره]

مدرعم ,,

بحكم انك شقراوي يابوالاساطير وتعز الريال على ذمة بوكليجا داج

وش لون اجواء رمضان بشقراء ؟؟؟ ووش تفرق عنا بولاية الثقبة ؟؟؟

<<< احس انه اصعب سعوال

اجواء عاديه ماتفرق كثير والبيت كله ينام بدري من 1 الليل :slv: , بحكم مافيه شىء يغير عليك الاجواء هناك ,,

[Full Moon]

السلام عليكم ورحمة الله وبركاته...

يا حيا الله الاسطوره...

عندي كم سؤال عالماشي وان شاء الله مانثقل عليك...

اللي نعرفه انه ماعندك اخوات فهل تفتقد وجودهم بالبيت ولا عادي مو فارقه هذا اذا كلامي صح ماعندك اخوات...؟؟

قد دخلتا محل ابو ريالين...؟؟ واذا كانك قد دخلتاه ممكن تقولنا رايك فيه...؟؟

وش اصعب طلب مر عليك في منتدى الطلبات...؟؟ وليه ماتحطوا اعلان ثابت بمنتدى الطلبات انه فيه مكتبة فيديو وترفقوه بالشرح كمان لانه فيه كثير مايعرفوا عنها او مايعرفوا يستخدموها...؟؟

وبالاخير الــف شكر لك اخوي وربي يعطيك العافيه...

والسلام عليكم...

[ياسر عبدالعزيز]

المهم نجي للجد ونبي نسئلك كم سؤال :magkiss:

*بما انك متزوج وشرايك في الزواج.. وش راح تنصح اخوانك العزوبيه

* اكبر صفقة حمام بعته......... :cool:

* يقولون انك ناوي به الرمضانيه على صفقه العمر مثل مايسمونه وانك ناوي تنشئ انت ونوير شركة قابضه للبيع للصروايخ والشروخ .. فماصحة هذا الخبر :cool:

* انت فيه يوم قد لعبت كوره ..(( والله... اشك من شفت لعبك في البلا يستيشن )) ادري انك ماعمرك لعبت غير مصاقيل


* ليه دايم انا اصفق في البلايستيشن ياخوي زلابه ماتعرف تلعب :fghty: وانت اربع وعشرين ساعه مسنتر عليه :ignor:

[الاســـطــــوره]

توتي ,,

تتابع مسلسل دنيا القوي .. !

لاوالله مادريت عنه الا بعد كم حلقه :slv: ,,


الكويتين مخربينها في ذا المسلسل .. وش رايك ؟

عشان كذا متحسف اني مادريت عنه وشف الخراب اللي فيه (rambo) ,,

[مدرعـم]

على ذكر الروتين الممل ..

وش الشي اللي تفتقده في رمضان الحاضر عن رمضان المستقبل ؟؟؟

وهو انت من الناس المعارضين للدوام والدراسه في رمضان ولا لا .. وليش ؟؟؟

[AZRAG HILALEE]

هلا والله بالاسطوره...

منور...

من تتوقع يفوز.. بوش ولا كيري؟

هل سبق وغثك احد من اعضاء الشبكه اكثر مني؟

لو خيروك تفطر على برقر كنق والا بيتزا.. وش تختار؟

ودمتم

[الاســـطــــوره]

هلا وغلا صبحي باشا ,,

احم نبدأ الفطور <<<<

اخوي ياسر شنو الشي اللي تفتقده في رمضان زمان

الشىء اللي افقده في رمضان زمان هي الجمعه الحلوه , اول ماكان عندك التزامات , فكان الواحد يقدر يطلع ويلعب كوره ويجلس مع الشباب وخذ سواليف , ولكن مع بعض المسئوليات ووجود الالتزامات اصبحت تأخذ وقتك مما يجعلك (( تيأس )) ان يكون هناك فرص لتعويض الماضي , حتى وان اردت فلاتجد من يحرص كحرصك على اعاده تلك الاجواء ,,,


حياتك مع الالعاب الناريه خاصة في هالشهر

والله اصبر تونا على الالعاب الناريه اسئلني هالسؤال على اخر 5 ايام من رمضان :D ,,

موقف طريف حصلك في هالشهر

الحقيقه مافيه شىء مميز , غير اني قمت في امان الله في سنه من السنوات (( ومضيع الشهر )) وادخل المطبخ وخذ شرب كاس مويه (( والوضع عادي )) حتى استوعبت ان الوضع رمضان لما شفت (( السنبوسه )) قاعد تلقى :angel: ,,

[TOTTI- 10]

.. اذا كنت تتابع .. المسلسل القطري بعد الشتات .. وش كانت ردة فعلك يوم .. قال ولدهم سامر يبي يفتح ملحق و يعزم اخوياه يلعبون " كيرم " وبلايستيشن .. !! <<< وش ذا التجانس .. :d

[GAHERHM]

الله حي .. ابو عبدالعزيز ..
مستر ياسر ..

والله شئ بكل تاكيد .. انا مافوت الموضوع .. اللي فيه حظرت جنابك (rambo)

عندي لك كم سوال .. على الماشي

شلون اخترت اسم الاسطـــــــــــورة .. ؟

وش كان شعورك يوم اسوي فيك ( اول تصميم بحياتي .. واهديته لك )
صح كان التصميم غبي .. بس ابيك وش كان ودك تقول لي .. ؟

لو قالوا لك .. ابو عبدالعزيز ماذ يفعل .. في رمضان .. وماهم الواجبات التى تفعلها فيه ..؟؟

[الاســـطــــوره]

برستيج ,,

لو طلبنا منك تسوي تشكيلة فريق من اعضاء الشبكه ( 11 ) لاعب .. من تحط ؟

والله سؤال مؤثر (himo) ,,

الحراسه (( الكاسر )) بحكم انه دب بيسد الباب على رونالدو واوين :D ,,
الدفاع (( سداح - العجمي - برستيج - داج ))
الوسط (( توتي - اليكس - الاولاني -))
الهجوم (( صقر الوادي - ياسر " راس حربه " <عشانه طويل > :D - مدرعم ))

[GAHERHM]

ابو عزوز ..

معروف انك من موسسين الشبكه ..
وش كان هدفك .. اول شئ يوم فتحتوها .. وقصوا الشريط
هل لك اهداف اخرى( تحقيق ) كانت غير خدمة الهلاااال ;)

[الصبحي]

اما ع هالتشكيله بتسدحوا الريال بعشره
مدرعموه هجوم :lkj:


<<<< واحد يتلزق يبي الاحتياط او ع الاقل يجيب كور :eek:

[الاســـطــــوره]

شمس الغنيه :) ,,

حيالله :) ,,

اللي نعرفه انه ماعندك اخوات فهل تفتقد وجودهم بالبيت ولا عادي مو فارقه هذا اذا كلامي صح ماعندك اخوات...؟؟

لاوالله مهوب عادي :( , والود ودي يكون عندي خوات , لان حلو بالمره يكون فيه جانب ناعم في البيت :) وانا اتوقع ان زوجه المستقبل من ناحيه بتكون لي زوجه واخت بعد , مثل مااتوقع انها بتكون مثل (( الابنه )) للوالده , وانا كنت في السابق ابي يكون " البكر " ولد , ولكن الان لاتفرق معي كثير لاني ارغب في البنت كرغبتي في الولد :) ,,,



قد دخلتا محل ابو ريالين...؟؟ واذا كانك قد دخلتاه ممكن تقولنا رايك فيه...؟؟

والله قد دخلته مره وحده بدافع الفضول , صح فيه اشياء قد تكون غريبه ولكن ليست لدرجه الحرص على دخول المحل بأستمرار :) ,,


وش اصعب طلب مر عليك في منتدى الطلبات...؟؟ وليه ماتحطوا اعلان ثابت بمنتدى الطلبات انه فيه مكتبة فيديو وترفقوه بالشرح كمان لانه فيه كثير مايعرفوا عنها او مايعرفوا يستخدموها...؟؟

والله اصعب طلب هي دعايات اللاعبين (( زي عايه الشامبو للثنيان , ودعايه لييز لسامي )) , اما مسأله التوضيح ان فيه مكتبه الفيديو صدقيني البعض يدري لكن مايبي يبحث ,,


فهو يشوف انه يكتب موضوع يطلب اسرع عنده من انه يبحث هو بنفسه (( مع ان التصنيف مسهل على الجميع )) :) ,,

وهذه المشكله دائما مالاحظها في البعض ممن يطلبون الطلبات :) ,,

[الهواوي]

هلا ياااسر..

حياك الله يالغالي..ماودي ااثقل عليك بس عندي سؤال..الحين لييه مانشووف لك مشاركات في المنتدى العام..والا ذاابحتك الكوره :angel:

[ياسر عبدالعزيز]

ادري انك ماراح تلحق ترد بلا..والله من كثر المعجبين والمعجبات :)
طاح حظي انا وبحر وبرستيج :slv:
المهم

*انت ساهمت في الاتصالات الاماراتي
* وبعدين ماعاد فيه جمعه ولاخميس :angel: زي اول..ولا انتم برمضان تقفلون الملحق محل بيع عجينة سنبوسه :angel:

* طلع لك مارد وقال شبيك لبيك وانا تحت يديك هعهعهعهعهعهعهعهعهع
وش اول طلب تطلبه....

* انت كفائه :angel:

[الاســـطــــوره]

ياسر ,,

بما انك متزوج وشرايك في الزواج.. وش راح تنصح اخوانك العزوبيه

لاياخوي لاتلزق اني متزوج :slv: ,,

واخواني العزوبيه انصحهم زي ماانصح نفسي انهم يدورون (( بأنتقاء )) زوجه المستقبل ويكون حسن الحظ ان كان الحب موجودا :) ,,


* اكبر صفقة حمام بعته.........

كانت عليك يوم ابيعه عليك وتتطلبني اصبر عليك بكامل المبلغ :p ,,


يقولون انك ناوي به الرمضانيه على صفقه العمر مثل مايسمونه وانك ناوي تنشئ انت ونوير شركة قابضه للبيع للصروايخ والشروخ .. فماصحة هذا الخبر

والله ياخوي هالكلام صحيح , وحاولت اقنعها اني بنشر لها زباين في الشبكه ولكن نوير تقول انها قاعده تسوي موقع شخصي لها وبيتم افتتاحه قبل العيد بــ 5 أيام :rolleyes: ,,



* انت فيه يوم قد لعبت كوره ..(( والله... اشك من شفت لعبك في البلا يستيشن )) ادري انك ماعمرك لعبت غير مصاقيل

بالعكس اى واحد يحب الكوره تأكد انه قد لعبها , ولكن الحق حق , اني اخر مره لعبت فيها (( كمباراه يعني )) من سنه تقريبا ,,


والا من الحواري والمدارس وللجامعه وانا العب :) ,,




ليه دايم انا اصفق في البلايستيشن ياخوي زلابه ماتعرف تلعب وانت اربع وعشرين ساعه مسنتر عليه

مابقى الا هي تصفقني :amle: ,,

اشوا اني وسداح خليناك تتكافخ انت وصقر النوادي وتنصعقون منا بــ 7 :D مع ان صقر النوادي منكب فيك :D ,,,

[زعيم الهــــلال]

خيمه مميزه مع الغالي ((ياسر))

ذكر اخويه مدرعم ....تسوي تشكيله11 ...وحطيت التشكيله فاضل((مهو لقبكangel: )) انك تحط الاحتياط :angel: ؟؟؟؟ من ترشح في الاحتياط

وش كنت تابع ايام زمان من المسلسلات المصريه ؟؟

في من الفنانين المصاريه تحب تمثيلهم ؟؟

ما رأيك بالرنامج سباق المشاهدين ((على قناة السعوديه )) ؟؟

وش رأيك بالبيك :angel: عمرك اكلت منه <<<سؤال غبي مشي حالك حالك يمشي ؟؟

ايش رأيك بشخصية اسعد عمر قلي ((يوسف الجراح ))؟؟؟

معليش يأخوي كثرنا من الاسئله يالحبيب ....

[مدرعـم]

.. تم قفل باب الاسئلة ..


وبالختام ..

اسعدنا حضورك ياالاسطورة وشرفتنا واسعدتنا بالدردشة معاك :rolleyes: ..

كلمة اخيرة تحب توجهها للمعجبين والمعجبات وتختم فيها اللقاء ..

:magkiss:

[الاســـطــــوره]

مدرعم ,,

وش الشي اللي تفتقده في رمضان الحاضر عن رمضان المستقبل ؟؟؟

هي الجلسات الحلوه بين الشباب لان رمضان المستقبل يمكن اكون مع المدام :angel: ,,,


وهو انت من الناس المعارضين للدوام والدراسه في رمضان ولا لا .. وليش ؟؟؟

والله من المعارضين , لان الشهر لازم يكون له هيبته وجوه الحلو , وفرصه للبعض يسافر براحته لاداء العمره في مكه - اذا كان يرغب - وحتى يكون هناك فرص للتواصل بين الاقراب والاصحاب :) ,,

[TOTTI- 10]

.. على هذا الكم الهائل من الاسئله ..

صدقني يا ياسر ان ساعه وحده ما تكفي .. على الاقل نبي ساعه ثانيه زوود .. :)

[مَـلَـــك]

هلا واللله الاسطورة

كيف تحس برمضان وخاصة انه كم يوم ويمر مثل رمشة عين؟؟وتتوقع ان ممكن الانسان زي ماهو منتظم برمضان بامور روحانية يقدر يطبق هدا على بقية السنة؟؟ والا رمضان له مزايا خاااصة نحسس عمرنا اننا نفتقدها في بقية الشهور؟؟



اش هي احلى مراحل حياتك ؟؟
طفولتك وهل عشت فيها معنى الطفولة ؟؟والا شبابك وهل مازال الطفل موجود بداخلك؟؟
والا الكهوووله :d بسم الله عليك لسا بدري عليك ....

كل عام وانت بخير والخيمة نورت بوجودك يالاسطورة وعساك على الخير والقوة ...

[الاســـطــــوره]

هلا وغلا ازرق هلالي :) ,,,

منور...

من تتوقع يفوز.. بوش ولا كيري؟

والله اذا التوقع فهو كيري بسبب استغلاله للاحداث في العراق وبالذات بعد اعلان عدم وجود اسحله دمار شامل في العراق , ولكن لا استغرب فوز بوش خصوصا اذا عرفنا الطرق الملتويه واستغلال السذج لترشيحه :slv: ,,


هل سبق وغثك احد من اعضاء الشبكه اكثر مني؟

ابدا ياغالي لايوجد لا انت ولا غيرك (( يعني ليتكم تغثوني دايم )) ,,


لو خيروك تفطر على برقر كنق والا بيتزا.. وش تختار؟

بدون كلام بيتزا :kany: ,,

[برستيج]

بحكم وقف باب الاسئله ..

اللي عنده اسئله اضافيه .. يرسلها على فاكس مدرعم .. وصفقووني ان وصلت لياسر .. :angel:


تحياتي لك يا ابو عبدالعزيز .. وشرفتنا في الخمية الرمضانية .. :yes:


(himo)

[الاســـطــــوره]

توتي ,,

اذا كنت تتابع .. المسلسل القطري بعد الشتات .. وش كانت ردة فعلك يوم .. قال ولدهم سامر يبي يفتح ملحق و يعزم اخوياه يلعبون " كيرم " وبلايستيشن .. !! <<< وش ذا التجانس

قلت يازين من يباريهم بلاي ستيشن :angel: , اما الكيرم احبها - سابقا - وكانت الوالده وخالتي يرقعوني فيها :slv: ,,

[الاســـطــــوره]

هلا وغلا (( قاهرهم )) ,,

شلون اخترت اسم الاسطـــــــــــورة .. ؟

كنت احب الهلال حب جنوني , وكنت لاسمعت كلمه الاسطوره اقرنها دايما بالهلال , فلما سجبت في منتديات الهلال وبالتحديد " الزعيم الملكي " سجلت بأسم الاسطوره :) ,,


وش كان شعورك يوم اسوي فيك ( اول تصميم بحياتي .. واهديته لك )
صح كان التصميم غبي .. بس ابيك وش كان ودك تقول لي .. ؟

أكيد يكون حلو خاصه انك تشعر انك مح تقدير من اشخاص تعدهم اخوان لك :) , وصدقني التصميم ليس بعمله بقدر ماهو اهدائه :magkiss: ,,


لو قالوا لك .. ابو عبدالعزيز ماذ يفعل .. في رمضان .. وماهم الواجبات التى تفعلها فيه ..؟؟

لا افعل الكثير غير المعتاد (( دوام - مشاهده مسلسلات - جلسات على النت ومع الشباب )) :) ,,

[9smsm9]

هلا بالغالي


مدرعم وش قصتك مستقعدلي

كل ما جيت اسئل الضيف قلت باب الأسئله قفلوووه

وش بينك وبيني بالظبط :ignor:



إلا ابو عبدالعزيز

وش رايك في خروووج البارسا من كأس أسبانيا :cry:؟؟؟؟

[الاســـطــــوره]

هلا قاهرهم ,,

معروف انك من موسسين الشبكه ..
وش كان هدفك .. اول شئ يوم فتحتوها .. وقصوا الشريط
هل لك اهداف اخرى( تحقيق ) كانت غير خدمة الهلاااال

والله كانت خدمه الهلال فقط , وذلك بعد ان تعذر اكمالنا في الزعيم لهذه الخدمه لعدم مناسبه الاجواء هناك مما جعلنا نفتح هذه الشبكه ونعمل على خدمتها :) ايضا اثبات ان الكل بمقدوره خدمه الهلال (( متى مااراد ذلك - :) ,,

[الاســـطــــوره]

هلا ابوسعود (( الهواوي )) :) ,,

هلا ياااسر..

حياك الله يالغالي..ماودي ااثقل عليك بس عندي سؤال..الحين لييه مانشووف لك مشاركات في المنتدى العام..والا ذاابحتك الكوره

والله اول حبيبي كانت هناك فرصه لكن الشبكه كل ماكبرت كبرت مسئولياتها ومتابعتها , وهذا للي يخلي الواحد تقل مشاركاته في كل المنتديات مهوب بس في العام :) ,,

[الاســـطــــوره]

ياسر ,,

*انت ساهمت في الاتصالات الاماراتي
* وبعدين ماعاد فيه جمعه ولاخميس زي اول..ولا انتم برمضان تقفلون الملحق محل بيع عجينة سنبوسه

وانت الصادق بنخليها تجميع (( ملقحين )) للنخل :d (( على فكره ترى نبي ملقحين للنخل في الدوام )) :d ,,

* طلع لك مارد وقال شبيك لبيك وانا تحت يديك هعهعهعهعهعهعهعهعهع
وش اول طلب تطلبه....

انه يكسبني محبه الناس حتى مماتي :) ,,

* انت كفائه

انت اكفىء :D ,,

[الاســـطــــوره]

هلا ملك :) ,,

كيف تحس برمضان وخاصة انه كم يوم ويمر مثل رمشة عين؟؟وتتوقع ان ممكن الانسان زي ماهو منتظم برمضان بامور روحانية يقدر يطبق هدا على بقية السنة؟؟ والا رمضان له مزايا خاااصة نحسس عمرنا اننا نفتقدها في بقية الشهور؟؟؟

اكيد رمضان له مزايا خاصه , صحيح اني معك انه يكون ارتباطنا بالامور الروحانيه يجب ان تكون على طوال السنه ولكن لايمنع ان قدوم شهر رمضان يذكرنا دائما بهذا الامر - اى كما يقال يحيي الصفات الحسنه التي نسيناها في مسيره حياتنا في بقيه سنواتها - :) ,,


اش هي احلى مراحل حياتك ؟؟

المرحله الجامعيه لانك تكون الممت بالكثير من الامور وتشعر ان الدنيا فتحتها ابوابها لك ليس دراسيا فقط بل على مستوى العلاقات الشخصيه وعلى تكوين الشخصيه التي تنشأ لديك ولانك تعرف وجه العالم بشكله الحقيقي بعيدا عما كنت تتصوره :) ,,,


طفولتك وهل عشت فيها معنى الطفولة ؟؟والا شبابك وهل مازال الطفل موجود بداخلك؟؟
والا الكهوووله :d بسم الله عليك لسا بدري عليك ....

ايه والله عشتها , والاهل ماخلوا على فرصه مااعيشها فأعطوني كل شىء ويكفي اني كنت الابن الاكبر والاخ اللي تحتي بيني وبينه حوالي 7 سنوات - المقصد انهم اعطوني كل شىء وانا لم اشعر انهم انتقصوا علي شىء في كل مراحل حياتي - :) ,,

اما وجود الطفل بداخلي فهو موجود ويجعلني في عالم اخر , فجميل ان تعيش مرحله داخليه تتعايش معها ولتجعلك اسيرا لمرحله معينه , فالطفل يتواجد بداخل كل منا :) ,,

[الاســـطــــوره]

هلا وغلا سمسم :) ,,

إلا ابو عبدالعزيز

وش رايك في خروووج البارسا من كأس أسبانيا ؟؟؟

لايوجد غير التكبر على الفرق الصغيره :( اضف على ذلك حماس الفريق الصغير للفوز , وهذا الفوز ذكرني بفوز اليونان اعلى فرق اوربا :( ,,

[الاســـطــــوره]

هلا وغلا بوحميد :) ,,

؟؟؟؟ من ترشح في الاحتياط

والله الاحتياط سبايك :jhgy: ,,,

الصبحي (( حارس ))
زعيم الهلال (( مدافع))
جن الملاعب (( وسط ))
ونه وتر (( وسط ))
ابو الذهب (( جناح ))
قاهرهم (( راس حربه ))





وش كنت تابع ايام زمان من المسلسلات المصريه ؟؟

والله حقيقه مااذكر لاني من زمان ماتابعت مسلسل مصري , والقديم ناسيه :( ,,


في من الفنانين المصاريه تحب تمثيلهم ؟؟

كثيرين مثل (( احمد زكي , نور الشريف , عادل امام , محمود عبدالعزيز )) ,,


ما رأيك بالرنامج سباق المشاهدين ((على قناة السعوديه )) ؟؟

من جد مااشوف في القناه السعوديه الا طاش في رمضان والبقيه مباريات الدوري فقط :rolleyes: ,,,


وش رأيك بالبيك عمرك اكلت منه <<<سؤال غبي مشي حالك حالك يمشي ؟؟

هاذي اكله :confused: !!


اول ماشفت كلمه " البيك " قبل لا اشوف اللي بعدها ظنيتك بتقول وش رايك بلقب " بيك " :D ,,


ايش رأيك بشخصية اسعد عمر قلي ((يوسف الجراح ))؟؟؟

ممتاز جدا :D ,,


لايفوتك بعد برنامجه الاذاعي في الاذاعه السعوديه الساعه 4 العصر يؤدي الادوار بالحجازي ايضا :D ,,,

[مدرعـم]

نشكر الاسطورة على حضوره :magkiss:

وان شاءالله لنا لقاء آخر ودردشة خفيفة مع ضيف ممتع آخر :angel:

طحياطي للجميع (himo)

[الاســـطــــوره]

في نهايه هذه الخيمه الرمضانيه :) ,,

اتقدم بكل الشكر على الاستضافه من صاحب الراس المبروم (( برستيج )) وصاحب الصروال الوردي (( مدرعم )) على كرم الضيافه :rolleyes: ,,


صح ان القهوه بارده وخايسه , والشاهي نسمع فيه ولاشفناه بس ولو يكفي ضحكه اسنانهم الصفراء :D ,,


كل الشكر لجميع من شرفوني بالحضور في الخيمه , اتمنى اكون ضيف خفيف :) ,,


تحياتي للجميع ,,