المساعد الشخصي الرقمي

مشاهدة النسخة كاملة : وش قمّة القهر برايكم ؟؟؟

POWER
15/2/2002, 18:49
وش قمه القهر برايكم..؟
قمة القهر هي اذا قعدت في حلاق هندي وتقعد تحلق بين الهنود وهم يحشون فيك ؟؟ وانت داري انهم يحشون فيك ؟ بس ماتدري وشيقولون ؟؟
...........................................
قمة القهر هي ... لما تغسل سيارتك وتزركشها وتعلق فيها ريحة السفينه (قديييم) وتسفطها عند باب بيتكم ويجي بزر من بزارين الشارع ويشخطها بسيم من الرفرف الى الرفرف ان خليته بتموت ماراحت حرتك وان جلدته قالوا ايا الهبيل تحط راسك براس بزر ؟؟
...........................................
قمة القهر هي .... لما تشوف برنامج افراح وتهاني وانت توك عزوبي .....................؟
.........................................قمة القهر هي ... لما تشوف لك مزيونه تفطر التسبد وتفقع القلب في سوبر ماركت وتقعد تخطط انك ترقمها وتقعد تشتري اغراض واجد مالها داعي .. حجارات .. وقفل؟ ... وصلصه ؟ .. وتفلس ويوم تجي البنت تاخذ الرقم تكبس عليها امها وتخلي رقمك طايح على الرف ؟؟
............................................
قمة القهر هي ... لما تطيح من طياره وتطيح لك على باص بنات ولاتطيح الا في حضن السايق ؟؟؟
...........................................
قمة القهر هي .... لما تكون في تاسع نومه (كيفي بغير سابع) ومتجود في اللحاف وتوها غافية عينك ويجيك واحد عله ويقومك من النوم ويقولك : انت نايم ؟؟؟؟
..........................................
قمة القهر هي ... لما تكون باز في موترك وكاشخ به وهو دين وعمى عين ويجيك شايب غشيم متعافي ويدعمك لا وتسامحه وهو المخطي وينشب في حلقك ويقول صلح موتري ؟ خصوصا عاد اذا كان موتره دتسن 84 ورفرفها الايمن مصبوغ بمعجون ؟؟


عاد اللي عنده شي يقهر لا يبخل علينا

والى اللقاء
جـــلال
15/2/2002, 19:14
موضوع حلو يابو حسين,,,,,

------------------------
بس انا في رأيي إن قمة القهر,,,,

يوم انك تجتهد وتذاكر وفي الاخير (راسب),,,,,,:( :(

وتلقى غيرك (ماعندك احد) وجايب 90,,,:amle: :amle: :nrey: :nrey:

------------------------
وقمة القهر خسارة الهلال من الطائي الأخيره ااااااااااه يالقهر,,
------------------------

تحياتي لك..
بدر
15/2/2002, 19:25
قمه القهر انه يقطع اشتراكك وانت على المسنجر:(:(
barbie_ksa
15/2/2002, 19:58
:nrey:



قمت القهر عندي لمن اكووووون مسافره وتنتهي اجازتي




قمت القهر لمن اكتب موضوع ولا احد يرد علييه



قمت القهر لمن تكون تغلي انسان تكتشف انه كذاب


:req:
هاوي الهلال
15/2/2002, 22:36
هلا وغلا ابو حسين ..


مافي شئ في الدنيا يستاهل ان الواحد ينقهر عليه ... !!!!!!!!!!!!!!!!


اخــــــــــــ خالد ـــــــــوك
:jhgy:
TOTTI- 10
15/2/2002, 22:44
والله قمه القهر كثير لكن ممكن نقول

انك اذا كنت تحمل برنامج و اذا جاء على 99 وينقطع الاتصال .:D :D

و اذا انهزم روما في الدوري الايطالي او برشلونا في الدوري الاسبانبي او الارسنال في الدوري الانجليزي :mad: :mad: :mad: .

وشكراًُ
POWER
15/2/2002, 22:49
الغالي جلال :-
الظاهر انت متوذي من الرسوب...بس خلك مصلحجي مع المدرسين..ولا تذاكر أبد..يمكن تنجح
بس أتوقع ان خويك اللي (ماعندك احد) مشتري الاسئله من مدرسين المواد !!!!!

الغالي بدر :-
:D :D :D :D :D :D :D بدون تعليق :D :D :D :D :D :D :D

الأبله barbie_ksa :-
أنتم يالحريم ما ينفع معكم .... يعني تبون عيشتكم اجازات وسفر وبس:mad:
بس يمكن الموضوع اللي تكتبينه يكون مهب زين ولا بايخ ..
ومشكوره على مشاركتك ..

الاستاد هاوي الهلال :-

مافي شئ في الدنيا يستاهل ان الواحد ينقهر عليه ... !!!!!!!!!!!!!!!!

الظاهر انت ما جرّبت واحد يجيب سيم ويمخش سيارتك وهي توها وكاله:)

ومشكورين على الرد وياهلا بالجميع ...
POWER
15/2/2002, 22:55
يا هلا والله بتوتي 10
اما عن تحميل البرنامج فهذي انا معك...وياما حملنا برامج واذا وصل 99% ينقطع الاتصال
بس من ناحية الفرق..وش ودك..تبيهم يفوزون دايم..يا اخي الكوره فوز وخساره
وعلى فكره..أخوك ابوحسين من مشجعين لازيو LAZIO المتعصبين ‍‍‍‍!!!! يعني لو ينهزم روما يفرح كثييييييييير

ومشكور على مشاركتك تحياتي لك ..
عنود الصيد
15/2/2002, 23:15
@ قمة القهر هي انك تدخل الحمام تتروش .. وبعز البرد .. فجأة تنقطع المويه الحارة :eek: , وكلك صابون ..:mad:


@ قمة القهر بعد :cool: <<== هاذي للدوافير أنك تطلع من الامتحان , وفجأة تتذكر حل سؤال كنت ناسي جوابه :zael:





مشكور اخوي ابو حسين على الموضوع :angel:
TOTTI- 10
15/2/2002, 23:48
اخوي ابو حسين : و نعم والله بمشجعين لاتسيو كلهم والله .
بس ما اشوف كتاباتك في منتدى الرياضه العالميه :confused: :confused: :confused: .

وشكراً
علي معتـوق العمـــري
16/2/2002, 00:24
قمة القهــر : لما تجيك مكالمة مهمة وينقطع الجوال بسبب انتهاء الشحن :)

قمة القهر : لما تكتب موضوع طويل جدا ويعلق الجهاز :zael:

قمة القهر : لما يصرح واحد من الاتحاد السعودي ويقول تهمنا سمعة الكرة السعودية:jnbg:

قمة القهر : لما تروح للمطار وتكتشف انك نسيت التذكرة والرحلة فل ولاعندك غير 5 ريال ماترجعك للبيت وترجع باي طريقة وتلقى التذكرة اكلتها الغنم :jnbg: :jnbg: :jnbg:

قمة القهر : لما تذاكر نصوص وادب وقبل دخول الاختبار بــــ 5 دقائق تكتشف ان مادة الاختبار توحيد :ignor: :ignor: ( هذه حصلت مع واحد دلخ زميل دراسة )
مها العالميه
16/2/2002, 00:32
ما فيه شي يقهر زي الظلم 00
POWER
16/2/2002, 01:10
السلام عليكم
الاخت عنود الصيد:-
انا مافيه أمل اتروش بالبرد..يعني اذا خلص الشتاء تصير ريحتي خياس وفايحه بعد
ومشكوره على مشاركتك وتعقيبك الجميل...وتحياتي لك;)


حبيب القلب tooti10 :-
بالنسبه لكتاباتي.فأنا حاط حيلي باهتمامي الاول والاخير وشغلي بعد وهو الكمبيوتر
ويكون بعلمك ما قد دخلت منتدى الرياضه العالميه...
بس مافيه مباراة في الدوري الايطالي تفوتني...وخاصة لاتسيو...بس وش رايك في الصخره نيستا nesta
وياهلا والله بك ومشاركاتك..


الاستاذ الكبير :- على معتـوق العمـــري :-
ماشاء الله عليك..كل اللي في مشاركتك قمّة قهر..الظاهر انت مقهور طول حياتك..أخاف انت عاشق ولا تحب !!!!:angel:
قمة القهر : لما تذاكر نصوص وادب وقبل دخول الاختبار بــــ 5 دقائق تكتشف ان مادة الاختبار توحيد ( هذه حصلت مع واحد دلخ زميل دراسة )
:D :D :D :D :D :D :D :D :D لا تعليق :D :D :D :D :D :D :D

ويا هلا والله فيك وفي مشاركتك..وبصراحه موضوعي منوّر فيك
تحياتي لك

الأخت
مها العالميه :-

بصراحه كلامك عسل...وقد أصبتي ..والدليل على ذلك اخواننا في فلسطين


وأشكر كل من قام بالتعقيب ...وياهلا والله بالجميع
تحياتي لكم ..
TOTTI- 10
16/2/2002, 01:14
والله نيستا نجم كبير و فنان و هو خليفه باولو ماليني في الازوري :yes: :yes: .

و اتمنى اني اشوف كتاباتك في منتدى الرياضه العالميه قريباً ان شاء الله :yes: :yes:
عاشق العثرات
16/2/2002, 04:09
قمة القهر انك تقعد تقصقص لك صورة في الفوتوشوب .. ويجيك بزر يتل سلك التوصيله والا ينفصل السلك من نفسه ..



قمة القهر انك تقعد تكتب موضوع طويييييييل وتحول عيونك من جد في الشاشة .. ولا احد يرد عليه :mad: .

قمة القهر انك تلعب برزدنت ايفل وتخلص ثلاثة ارباع اللعبة .. ويجي ابوك يفصل السلك الصلاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه ...


قمة القهر انك تغلي واحد من قلب ويرخصك علشان رخيص ..




ولكم تحياتي ياغاليييييين .. ويا الغالي ابو حسين موضوعك رااائع ....
السيناتور
16/2/2002, 04:19
هلا ...


قمة القهر ان الواحد يحب وحده وفي الاخير ..........تطلع اخته ( اقصد تقوله انا زي اختك ):mad:


قمة القهر ان يجيك اخوك ويقومك من النوم يبيك توديه المدرسه وتقوم وتغسل وتلبس ...وفي الاخير يقول بغيب ...:mad:
بدر
16/2/2002, 04:50
قمة القهر ان يجيك اخوك ويقومك من النوم يبيك توديه المدرسه وتقوم وتغسل وتلبس ...وفي الاخير يقول بغيب ...:mad: [/B][/QUOTE]

احس انك صادق في هذي :D بس تراها ما صرت لي:ignor:

قمة القهر ان الواحد يحب وحده وفي الاخير ..........تطلع اخته ( اقصد تقوله انا زي اختك ):mad:

بعد هذي قويه :D

<-- مسوي انه هو راعي الموضوع:asno: ... بس الموضوع كله معجبني:yes:

تسلم يا ابو حسين على انك طلعت الاشياء اللي قاهره بعض الاعضاء:D
هلاليه بالفطره
16/2/2002, 10:59
قمة القهر .. تحلم بشي وتدري انه مستحييييييييييييييييييييييييييييييييييييل :cry: :cry: :cry:









الموضوع كذا :yes: تسلم
الطيرالهلالي
16/2/2002, 11:40
السلام....


قمة القهر انك تكون متأخر عن حظور مبااراااة الهلال ...وينفقع الكفر .ولا تنزل وترفع السياراه بالعفريته وتنزل الاستبنه وتدور مفتااح العجل ولا تلقااه:D (حاصله معي )

وقمة القهر انك تكون كابتن فريق مدرستك واحسن لاعب فيها وفي الاخير زملاك الي كانو يلعبون تحت قيادتك يصرون لاعيبه في في منتخب المملكه :D (حاصله معي)

وقمة القهر انك تستنى الحلاق يخلص محلق لواحد اصلع ولا له دقن :D :D

ومشكو ابو حسين:cool:
عنود الصيد
16/2/2002, 14:44
قمة القهر ان الواحد يحصل على خمسمية الف ريال , وبعدين يصحى من النوم ويطلع حلم :cry:


<<== حلمي البارحه :N: , قــهـر :q:
POWER
16/2/2002, 18:20
ياهلا والله بالجميع
وان شاء الله عجبكم الموضوع

وبالنسبه للغالي totti 10 :-
بصراحه انا واثق من انك بتقول نيستا نجم كبير وفنان..لأنه هو الان الدفاع الافضل عالميا..ولاحظ انه شاب وعمره 25 سنه..
وياهلا والله بك ومشاركتك...تحياتي لك..

الغالي الذيب:-
بالنسبه للفوتو شوب..اخاف انك مضايق اخوانك ولا مستقعدلهم...علشان كذ يرفعون ضغطك ويفصلون الفيش عن الجهاز
اما عن الموضوع الطويل...فما كل موضوع يعجب الجميع..لكن خير الكلام ما قل ودل;)
اما عن رزدنت ايفل فحلها عندي..: انت لا تشغل الجهاز الا بعد صلاة العشاء..يعني الوعد صلاة الفجر
وياهلا والله بك وبمشاركتك..وتحياتي لك

حبيبي بدر :-
والله لو اخوي يقومني من النوم وبعدين يقولي بغيب ..كان امسكخ وامصع اذانيه
وبعدين هذا ما يقهر وبس....هذا يرفع الضغط:mad: :mad:
وياهلا والله بمشاركتك...وان شاء الله انا نجحت باخراج بعض الاشياء اللي ترفع الضغط للاعضاء
تحياتي لك.

اختي هلاليه بالفطره :- ..وضحي أكثر وش تقصدين ؟؟؟

الغالي السيناتور ":-حلوه ذي (( ان الواحد يحب وبعدين تطلع زي اخته ))
بعدين الظاهر البنت خافت تقلب عليها ولا شي...ومثل ما يقولون الرجال مالهم امان!!
وياهلا والله بك في جميع مواضيعي...وبالتوفيق ،،،


المنسم :-الطير سداح :-
بالنسبه لمباراة الهلال..ليش تروح للملعب..يمدحون اوربت..ومعها بريق الشاهي والفصفص و:ignor:
اما عن حقت لاعبين المنتخب.... فما عندي تعليق لها

وقمة القهر انك تستنى الحلاق يخلص محلق لواحد اصلع ولا له دقن
هههههههههههههههههههههههه
ليش داخل الحلاق ذا ؟؟؟ يمكن يحلق شعر سيقانه !!
:req:
مشكور على ردك الجميل وياهلا والله بك ..تحياتي لك

الغاليه عنود الصيد :-
ههههههههههههههههه حلو الحلم ذا..وبعدين انتي احمدي ربك ان هذي حلومك
امس انا محلم في جنانيا واشياء تخوف...وش رايك بالمقارنه بحلمي وحلمك !!!
وتحياتي لك ...وياهلا والله بالجميع
ابو الذهب
16/2/2002, 20:50
قمه القهر
انك تمسك سرا عند خباز ونفسك تأكل تميس وقدامك 17 باكستانى واذا
وصلك الدور قالك صديق خبز مافيه :(

او تكون محترى الراتب وطفران مامعك ولا ريال وتروح للمكينه تبى تشوف راتب
نزل فى حسابك ولا .. ومجراد انك تحط بطاقتك تروح البطاقه ويقولك الجهاز
راجع الفرع .. والمصيبه انه يوم خميس ونص دوام :(
POWER
16/2/2002, 22:47
ياهلا والله بمعلمنا الكبير ابو الذهب
أصلا انت ليش تروح لخباز تميس..ومحد قالك تبزع وتمسك سرا عنده!! ما كثّر الله الا الخبازين بالرياض
بس لو يقولي الباكستاني مافيه خبز..والله لأتوطّى في بطنه....
وحياك الله بجميع مواضيعي..ومشكور على تفاعلك
تحياتي لك
الذاهبه
17/2/2002, 00:49
قمة القهر لما تنقطع الكهرباء وانت نايم في عز الصيف :sheto:
3boud
17/2/2002, 01:17
قمة القهر لما تقعد ساعة تكتب رد لواحد في الماسنجر وتكتشف بعدين انك قاعد تكتب انقليزي:zael: (حصلت معي كذا مرة)

قمة القهر لما تبي ترد على موضوع ويقولك انت غير مسجل:zael: و الا اعد التسجيل(يوميا تصير لي)

قمة القهر لما تفتح ايميلك و تلقى ميتين رسالة...و في اخر شيء ما تقرا ولا واحدة منهن لانهن اعلانات:zael: (كل يوم تحصل معي)

قمة القهر لما تصلح موقعك و تحمله على النت و تفصل الاتصال...ثم تكتشف انك ما حملت الصفحة الرئيسية...علما ان تحميل الموقع اخذ منك ساعتين:zael: (حصلت معي)

قمة القهر انك تكون جوعان مرة وتشتري ثلاثة شاورما دفعة واحدة ولما توصل البيت تكتشف انه حط لك كاتشب وانت ما تداني الكاتشب....علما بأنك موصيه و مشدد عليه لا يحط كاتشب ...و المحل يبعد 15 دقيقة عنك:zael: (حصلت معي)

قمة القهر لما تطلب انت واخوياك من المطعم الفخم...و بعد ما يجي الطلب تكتشف ان طلبك انت من بد خلق الله ما جاء...بالرغم انك انت اللي طلبت بالتلفون(حصلت معي)

قمة القهر لما .........................ما تحصل شيء تكتبه:D
قرقو
17/2/2002, 13:51
لالالا تدرون وش قمه القهر


انك تطلع من اول يوم من الاختبارات وماتحل زين ولا بعد وتصدم(حاصله معي):D :D
هلاليه بالفطره
18/2/2002, 09:28
يعني اللي اقصده يابو حسين ..
ان في بالك حلم وامنيه تبغا تحققها بس مستحيل مستحيل مستحيل
تتحقق ومقفله الابواب في وجهك من كل جهه :noo: :cry: :cry:
POWER
19/2/2002, 23:14
يا هلا بالجميع

الغاليه رهف :- ههههههههههههههههههه
هذا ما يقهر..هذا والله يرفع الضغط !!:mad: :mad:
بعدين يمدحون النوم عند الحوش ولا بالسطح !!!!!:N: :N:
وتحياتي لك ;)

حبيبي 3boud :-
حلوه حقّت الماسنجر....بس والله بيني وبينك انا من الناس اللي ما يحبون الكتابه بالماسنجر الا لتبادل المعلومات والا اجواب لبعض الاشخاص عن اسئلتهم حول الكمبيوتر
ولا ان بغيت أكلم اي واحد علطول بالمايك
بس حقّت انت غير مسجّل...هذي البلا من الكوكيز...الظاهر انك تحذفه ولا عندك برنامج يحذفه والا افتح الانترنت اكسبلورر
واضغط ادوات ثم خيارات انترنت ثم خيارات متقدمه وتأكد من وجود علامة الصح في التصفح مع ملفات تعريف الارتباط

اما عن حقّت الدعايات..فبدال ما تحط علامة صح علشان تحذف الرساله...حط علامة صح(بجنب الرساله) واضغط على block وبكذا ما تجيك ولا رساله

اما عن حقّت الموقع..ما ادري وش يسوي بهالساعتين ؟؟؟!!! كل ذا تحميل صفحه رئيسيه؟؟
اما عن حقّة الكتشب..الظاهر انك تقصدك مطعم ماما نوره..لأني والله ما ادانيه دايم اقوله لا تحط كتشب..وهو ما غير يترس لي الشاورما كتشب..شكل الكتشب يجيهم ببلاش
بس حقة المطعم الفخم ذي ما ادري وش تبي
بعدين انت ووجهك وجه مطاعم فخمه..حدّدك بوفيه والا مطعم بخاري:ignor:

بس الاخيره وش تقصد يا عبّود..وتحياتي لك

الغالي ابو حواس
ههههههههههههههههههههه اصلا انت ما براسك دراسه
لا وبعد غشيم وما تعرف تسوق...ما ادري شكل كل لمبات حارتكم مشمع فيها !!!:p :p
تحياتي لك

حبيبتي هلاليه بالفطره :-
الحين فهمت حلمك..بس الظاهر انتي تحلمين في ايش مثلا علشان تقولين مستحيل يتحقق
وبيني وبينك انا احس انكي الوحيده في هذا الموضوع اللي فاهمه وعاقله والا الباقين عليهم السلام:asno: :asno:
ويا هلا والله بهلاليه بالفطره..ومع خالص تحياتي لكي...
هلاليه بالفطره
19/2/2002, 23:54
هلا والله .. يابو حسين :D <===== فرحانه علشان المدح ..:D

اخوي ابو حسين مو لازم اقولك على اللي احلم فيه (( خليها مستوره :D :D ))


بس الحين اللي اتمناه ان ماحد يشوف المدح اللي كاتبه عني :D خايفه يخربون ويطلعون الفضايح :D :D
على العموم انا عاقله وفاهمه بس من عرفت هذا المنتدى اختربت :D :D

تحياتي :yes:
3boud
20/2/2002, 00:30
هلا ابو حسين

اما بلوك...فكثر لي منها....:D
و الله اني مسوي بلوك في الهوتميل ومسوي الفلتر على Med وسط

و لا زلت اتلقى رسائل من جهات انا متأكد اني صلحت لها بلوك

الظاهر ان عندهم عشرين اي ميل


اما الموقع....انا ساعتين احمل جميع الموقع مو الصفحة الرئيسية بس
و لا حظ ان موقعي ماشاء الله 55 صفحة:eek:
و حجمه تقريبا 1.5 ميقا بايت
من غير الصور و ملفات الوين زيب و و و و ...الخ


و الاخيرة..اقصد ان الحكي خلص:D
مها العالميه
20/2/2002, 01:01
اهلين00

ابو حسين وش ها الحركاااات مع هلا ليه 00:sher: :sher:

ترى جمس المنتدى قريب:sher:


:lsaon: <<<<<<<<<<<<<< وحده تحب الخير والصلاااااح
POWER
20/2/2002, 01:43
هل بهلاليه بالفطره
عادي هذا حلمك...ولا تقولينه لأحد
اما عن الكلام اللي كاتبه عنك..فهو عادي وهذا اللي حاصل ( بصراحه)
كل اللي اعرفهم بالمنتدى داجين وما عندهم ما عند جدتي السابعه طعش
ويحقلك تخربين مادام الاعضاء اللي فيه من مها العالميه وجاي !!!!!
تحياتي لكي

الغالي عبود :- انت اذا سويت بلوك
يقولك تبي بلوك على هذا البريد ولا على اي شي يجي من محتويات هذا البريد
يعني حط الخيار اللي تحت واضغط اوكيه وان شاء الله تنحل مشكلتك

والله يعينك على موقعك..وانتبه من ملفاتك لا يكون فيها فيروسات....واي استفسار انا حاضر حبيبي

الغاليه مها العالميه :-
أي حركات الله يقطعس...مجرد مدح..اعوذ بالله
حتى الهيئه لاحقيننا في المنتدى...وما سوينا شي يختي:mad: :mad:
ايش قال ( تحب الخير والصلاح) هههههههههههههههه
ما اقول الا الله يصلحس ويهديس
تحياتي لكي حياتي مها :yes:
هلاليه بالفطره
20/2/2002, 10:40
اخوي ابو حسين .. اشكرك على المدح .. بس ياحلو الخراب اذا جاء من احلى منتدى :D :D
وانا صحيح عاقله وفاهمه :rolleyes:




مهااااااااااااااا ويش فيكي اكلتي الرجال .. وترى يابو حسين مها تمزح ;)
سام الملاعب
20/2/2002, 14:25
هلا أبو حسين...
أبقول لك مواقف يمكن ما يفهمها الا انت...لأنها حاصله لك...خخخخخخخ:kany:
..
الموقف الأول.... إنك توصي واحد يجيب لك أغراض من العتش والا من عشيره... ولا يحاسبك:D
---
الثاني.. إنك تاكل من مطعم..(( ماتدري وشو)).. ويوجعك بطنك....ويكمل عليك واحد ويقعد يتطنز:zael: بالماسنجر
------------

تحياتي لك
POWER
20/2/2002, 16:59
لا ياهلاليه ما هنا خراب ان شاء الله
مهااااااااااااااا ويش فيكي اكلتي الرجال
ايوه عطيها الساخن يمكن تعقل..تراها ظالمتني...

حبيبي سام الملاعب :-
بس وش بتجيب من عشيره ؟؟؟ولا تستحي تقول للاعضاء
شكلك بتجيب اخر جلسات الفنان عزازي !!!!! <---- مسوي ما يدري وش القصه
بس الموقف الثاني مسكّت..وانت عاد صكبته في ظهري!!!
تراه حاصلنلك...المهم على فكره بقولك قصتي يوم يوجعني بطني
رحت لمطعم في احد خطوط الرياض القصيم..وكنت جوعان..قلت يا ولد اعفط الموتر وكل من هالبخاري
وقلت للقرسون ابي حبّة رز مع دجاج..قال ما فيه دجاج قلت وش فيه قال لحم حاشي بس
قلت حاشي !!! براسك عطنا حاشي يا قرسون
ويجيبلي الله العالم ثلاث حبات رز..ولحم كثر التراب...واستغربت بصراحه قلت وش هالكرم عندهم
وانا ما غير اضرب من هاللحم
وبعد ما شبعت طلعت ومسكت الخط..ويوم وصلت بريده واقرا بالجرايد انهم مسكو محل يبيع لحم حمير
واقرا اسم المحل وطلع نفس المحل اللي اكلت منه:zael: :zael: :zael:
وش بيكون شعورك؟؟؟
المهم لو تخبر لي مطعم يبيع لحم حمير علمني..ترى لحم الحمير والله انه زين وخاصه اذا صار مقلقل !!!

داري انك بتضحك علي وبتقول الله يحوّم تسبدك..لكن هذا اللي حاصل
تحياتي لك