ياحــــــــــظ البنـــــــــــــات

[ابورشا]

حبيب البي..
مساء الخير والإحساس والطيبه..
من منا مايحب البنات ..سواءً ام او اخت او بنت او (عقرب)..
والغريب اننا في هالبلد يتباكون البنات بانهم هن المضطهدات وهن اللي مستهدفات من قبل المجتمع..
وان جميع حقوقهن مسلوبه سواءًبالتحكيم اوغيره..
ولكن خلونا نتكلم على قد عقولنا وعلى قد مايعطينا خيالنا من افكار..
ولو ناقشناها من ناحية الزواجات والأسواق..
البنت ياعيني تروح للمشغل من المغرب وبعد ماتاخذ موعد من المشغل وتروح وتعطيها صنفره كامله لعيون الحفله..وتطلع وتركب مع السواق(السواق لبنات النعمه بس)او مع اخوها العله واللي يتمنى هاالمشوار عشان (يكحل) عينه بالحضور..
ويوقف السواق او الأخ عند الباب وهو (مفهي) ومبقق عيونه ويتمنى ان اخته ماتنزل الامتأخره والضعيف هذا رايح فيها مايدري يطالع هذي والا ذيك..وتنزل اخته وتدخل ويبداء يتسحب ماوده انه يمشي..وهو كل الخواطر والأفكارتدور على ساعة الرجعه لخته عشان ياخذها..
وتدخل البنت وبعد ماتعطيها تبويس لصديقاتها وتشرب العصير وتبلبط على احد الطاولات والفنانه تغني والأمور طيبه..واشي رايح واشي جاي وهي ماغير تحش باللي رايح واللي جاي..وكأن هي الكمال بالجمال..
نرجع للضعيف اللي نزلها وراح ياخذله فره لعل وعسى يلاقي اللي على باله !!
الحين البنيه راحت ومبسوطه على الأخر..طيب الولد اللي على باله انه اوسم ولد بالدنيا وسيارته اللي مغسلها اللين بغت تروح البويه هاالضضعيف وين يروح؟؟
ان راح للكافي كل شيء ممنوع..
وان راح للسوق يشتري شيء قالوا ممنوع العزاب وبعدين انت جاي تغازل..
وان راح للستراحه ..فتحوا موضوع الدوري والهلال والنصروالمنتخب
وان جلس يتمشى يالله من فضلك بالرياض..هبلوا فيه الدوريات بالتفتيش..
طيب وين يروح؟؟
ولو كان حظه (طيب) وتعرف له على وحد(ياحظه من قده)..
والله ياهي راح تمسخر فيه مسخره..ويلعن ابو الثقل اللي راح تهبل فيه..
وتجلس طبعا تقوله كم كلمه انجليزي اللي يسمعها يقول مقطوع سرها في نيويورك..
وتكلمه عن سفرياتهم بالصيف وهي تلاقيها ماطلعت جواز..
والخبل الضعيف وش يسوي...مبسوط ومتحمل..
وغير انها مهبله فيه تقول لاتكلمني الا على الجوال (وهات يافواتير على ظهره)..
وكل شوي مجرجرته بسوق تقول تعال ابي اشوفك..وهو على باله انه يبي يسلم عليها ويشوفها(معذب الولد)..
وهي ماغير جايبه خوياتها وتقول وش رايكم هذا اللي انا متعرفه عليه..وهات ياتريقه من المهبل اللي معها..
بس وش يبي يسوي..هيك صار
نرجع للي فاله بالزوج وطقطقه واغاني..وشكشكه وآخر بسط
وغير هذا اذا جاء اخوها ياخذها او زوجها تجلس تسولف له انه زواج ممل..
وفلانه لابسه كذا وفلانه قصتها كذا..
وكل اللي صارهذا وضايق صدرها..
اجل الضعيف وش يسوي اللي ماهو قادر يروح لأي مكان لآنه(ولد)..
والولد في مجتمعنا يعني (خطر)..
وش نسوي..
وانا والله احسد البنات..مبسوطات ومدلعات من ابوانهم..واللي يهبل فيك انهم مصدقيين..
يعني وحد تفتري عليك بالسوق..خلاص رحت فيها..
وتعرف حنا شعب نفزع مع اللي (يستاهل)بغض النظر عن اللي غلطان..
وفوق هذا كله يقولن انهن مظلومات..
ياحرااام


<center>
<br>
<br>
<br>
<br>
<br>
<br>
<br>
<APPLET codebase="http://ie.yimg.com/e/5da47e1c/h/87d89c18"code="flame.class" width=400height=200>
<br>
<br>
<br>
<br>
<br>
<br>
<br>
<br>
<br>
<br>
<br>
<br>
<br>
<br>
<br>
<param name="text" value=" أبـــــــورشـــــــا"></applet>
<br>
<br>
<br>

<br>

<br>

[JAJ]

كل البنات يدخلون ويردون علية

ياهو يحش بالبنات حش:rolleyes:


لو كان يحش فينا كان وريتك فيه:mad:














واحد مايحب التحرش أبد:o

[عنود الصيد]

وين ياحظنا الله يكفلنا بس :(


ترى مهوب كلنا مثل هالمبسوطات اللي تقول عنهم .. ولا كلنا عندنا سواويق وناس على كيفنا :(:(

هاذولي اللي تقول عنهم ياحظهم يمكن مايجون عشرة في المية مننا ..


والله انتم اللي ياحظكم ..

مهوب حنا .. اذا قلت باروح لصديقتي , مافيه عندنا بنات يسيرون وامهم مهيب معهم :(

والا اذا بغيت نطلع .. وماعندنا سواق .. اللي يقول منيب فاضي , مالي شغله الا انتم , قولي لاحد غيري , بعدين , مهوب لازم تطلعون , معزوم , ........الخ :(:(


ومالنا الا ننطق بالبيت اربع وعشرين ساعه .. ونحط حرتنا بالأكل ولا التلفزيون والا النت والا التلفون .. واللي مالها نفس بهذا كله .. تقعد تصيح وتبكي و تطلع اللي بقلبها :( :(


وبسسس:(

والحين قل ياحظكم يالبنات :rolleyes:

[ابو الذهب]

ماقلت الا الصحيح ;)

وهذا قليل من كثير :rolleyes:

[ابورشا]

حبيب البي..
الغالـــــــــيjaj...
رغم التحرش اللي انت تسويه الا اني ارحب بروحك الحلوه هذي..
ويخرب شنينك على هيك حكي..
يخليك ربي حبيب البي..



حبيب البي..
الغالي ابو الذهب..
الله يخلي كل ايامك ذهب في ذهب..
وتسلم على مشاركتك بس نبي مشاركه ونقاش اذا سمحت..
يخليك ربي حبيب البي..

[ابورشا]

هلا والله بالغاليه..عنود الصيد..
تعرفين مااقدر اقول كلمتي المشهوره(.............)..
على العموم من اسمك يدل على ذوقك الحلو..والمرهف..
وبعدين مالك ومال العصبيه الله يصلحك انشاء الله..
اما من ناحية ان ماعندكم سواق فانا ذكرت وبين قوسين انها ميزه (لبنات النعمه)..:)
اما ان اخوانك يتعذرون فانا والله معك بالناحيه هذي بس لوتقولين له تعال ودني لزوج شوفي وش لون يوافق(يبي يقق عيونه)..
بس ياعنود..لو لاحظتي انتم تدخلون اي مكان مهما كان اما الضعوف (حنا) ..ياويلك لو تهوب وتحاول تسأل بس..
شوفي المنتزهات والا الملاهي والا غيره..ماندري نلاقيها من السكرتي والا...
اما انتم (ياعيني)..تسحبون العالم على وجيههم وين ماتروحون..ومن قدكم
وبالنسبه للجلسه بالبيت..فااحيانا تطلع حلوه..منها على قولتك التلفزيون والتفلون والدش والنت..
اما حنا من مقاظي الى جب خواتك..الى..
ومن ناحية انك تجلسين تصيحين(ماعاش اللي يبيكيك)..عارفه ان االصياح حيلة اليآئس..ومااعتقد انك يائسه
لأن عندي مبدا عن البنت وهي انها طموحه لحد المغامره ومن هذا عدم اليأس;) ..
ويخليك ربي...:D إلك

[POWER]

انا عندي تنبيه بسيط لعنود الصيد

((((
ومالنا الا ننطق بالبيت اربع وعشرين ساعه .. ونحط حرتنا بالأكل ولا التلفزيون والا النت والا التلفون ))))

أصلا يا اخت العنود معروف ان البنت تقعد بالبيت تساعد امها وتطبخ وتغسل وتكنس
وهذا أصلا شغلهم..أجل وش ودك يصيرون؟؟؟
يسوقون بالشوارع...ويطلعون للبر بلحالهن...
الحين الوحده لو كانت مدرّسه ومهب سنعه..والله محد يعرس عليها الا اللي طامع بدراهمها
صح انتي تقعدين على النت...لكن ليش امك ما تقعد على النت ولا قالت الكلام اللي قلتيه....علشان هم متربين على كذا...
يعني هم متربين على القعده بالبيت والطبخ والنفخ والكنس و..و... الخ من اشغال البيت
ارجو انك ما تفهمينني غلط...والله من وراء القصد:)

[ابورشا]

حبيب البي..
هلا والله وغلا بالغالي ابوحسين..
بس بصراحه ماتلاحظ ان ردك لعنود الصيد عنيف شوي..
وعلى فكره ترى البنات وخصوصا عندنا هم طاقات المجتمتع..بس انت تعرف ياابوحسين ان عندنا (غزاره بالإنتاج..وسوءبالتوزيع)..على كل مستوى
ويخليك ربي حبيب البي

[بدر]

ماشالله عليك يا ابو رشا:) كنت اظن ان ابداعك بس بالجمهور الهلالي بس صرت مبدع حتى في مواضيع البنات:D الموضوع حلو بس اللي محليه اكثر انه منك:) :) يخليك ربي حبيب البي;) :cool:

تحياتي ....

[عنود الصيد]

أخوي ابو رشا ..
حتى لو قلت له ودني لزواج .. كله واحد , وش اللي بيتغير عشان يستانس ويوديني ( بيدخل معي؟ ) ..
و أصلا أكره شيء عندي العروس .. ازعاج وطقطقة وبثارة بزران وعالم يبي من يسلم عليها .. هذا غير الحش بخلق الله , لا والله اقعد ببيتنا احسن لي .. :rolleyes:


أما بالنسبة لاننا ندخل اي مكان نبغاه .. مافيه الا الملاهي وبس .. وكلها طفش :( أما أماكن العوائل فما ندخلها الا و أحد معنا وانتم بامكانكم تروحون لها مع أهلكم .. والا مايصير تستانسون الا مع زملاؤكم وبس ..


والله معظمكم اكثر وقته مع هالشباب سواء متزوج أو لا , ويقول ليش مانلقى مكان نروح له .. و تقول :(((شوفي المنتزهات والا الملاهي والا غيره..ماندري نلاقيها من السكرتي والا...)))
وانا اقول : خذ معك رشا وام رشا واضمن لك انهم مايقولون لك شيء :)

وما أقول انه مايصير ترحون مع زملائكم .. بالعكس .. بس كل شيء له بحدود ..

اما (ان االصياح حيلة اليآئس ) ماتاصل للصياح عاد .. بس الدعوة كلها كم دمعه تنزل غصب و نبرد فيها قلوبنا :)


على العموم اللي ابي اوصل له من هذا كله , انكم احسن حال مننا .. و لو انا منكم .. ان اطلع انا واهلي واستانس واروح للمكان اللي ابغيه .. واروح لزملائي و استانس معهم .. واسافر واسوي مشاريع .. و أي شيء نفسي فيه .. :rolleyes: :rolleyes:


وألف شكر لك اخوي ابورشا على الموضوع :)

×××××××××××

هلا أخوي ابو حسين ,
والله شكلك انت اللي فهمتني غلط :rolleyes:
صحيح ان البنت معروف انها تقعد بالبيت .. ماقلت شيء , بالعكس راضية والحمد لله :)
ونطبخ وننفخ , ونتهاوش مع الشغالة بعد على غسل المواعين ( مهوب ظفارة إلا من ضيقة الصدر) :D


ولا قلت ابيها تسوق ولا تطلع للبر لوحدها مثل ماقلت ... بس بعد معروف ان المسئول عن الأسرة عليه حق لاهله .. انه يطلعهم ويونسهم على الأقل بالأسبوع مرة :rolleyes: وهذا اللي أقصده


يعني الموضوع يقول : ياحظ البنات .. وانا اقول وين ياحسرة :(
البنات اللي تقول ياحظهم نسبة قليلة جدا من البنات ككل , أما الغالبية فمثل حالتي .. والحمدلله راضية :) وأحسن من مليون وحدة بعد .. غيري ماحصلت على أهل يوفرون لها مثل اللي توفر لي .. وألف الحمد لله والشكر ..

لكن حالتنا يالبنات بالنسبة لكم يالشباب ... والله حالكتم أبرك مليون مرة ...

و يـــــــــــــــــــــــــــــــاحــــظــــكم يـــــالـــشـــبـــاب :o :o



<<===- خلاص طلعت كل اللي بقلبي :)


ولاتقهروني وتقولون ياحظ البنات :mad: :mad: اتمنى تكونون فهمتوني :rolleyes:

[ماروكو]

وييييييين ياحظنا وين :( والله انكم ماتدرون عننا :p

بس ابي اقول شي عن الاماكن المخصصه للعوايل , لو كل واحد محترم نفسه من اول ومايضايق خلق الله كان يمكن ماتلاقون مكان واحد مخصص للعوايل :)

[ابورشا]

هلا والله وغلا ..بعانودالصيد..
والله شوفي كونك تكرهين الزواجات والطقطقه (مااظن) لان البنات كلهم يحبون الوناسه والجمعه..
ولكن يمكن انك رديتي من باب المثاليه بس عشان تثبتين ساحتك للموضوع..
وكونك تقولي انكم ماتدخلون الا الملاهي وبس ..وين الله يهديك ترى حنا نشوف ونعاني (حلوه نعاني)..وش اللي يصيربكل ممكان من احترام منقطع النظر للبنات وانتي عارفه ان الإحترام مش من مبداء الإحترام..ولكن من باب الفزعه..
اما بالنسه للمنتزهات واللي لازم نروح لها مع اصدقانا..وش تبيننا نروح معه يعني نخطف بنت وناخذها محرم لنا:D والا ناخذ الشغاله عشان تدخلنا..
اما من ناحية اني اخذ رشا وام رشا:( الله يوفق ويجيب ام رشا بعدين حاسبينا :( :( :( :( :( :(
ومعاليش لاتصدقي ان كل واحد كاتب اسمه مثلي يكون لازم عنده اسره:( (كسرت خاطرك ادري):( :(
اخر شيء ذكرتيه انك تقولي لو انا منكم كان اطلع مع اهلي او اسافر اواسوي مشاريع..
الله يهديك وين نسافر ان سافرنا بالدس وياويلك لو دروا انك مسافرلأنه معروف وين انت مسافر له:D والمشاريع وش المشروع اللي تبي تسويه اللي يشوفك يقول انك تكلمين ولد فتيحي..
هاه وش راح تكون نظرتك للشباب..
انا اقرب مثال اشبههم فيه بانهم مثل الطير بلا ريش..
وغير هذا انا معك ان فيه بنات مظلومات مرره وربما اسواء وفيه شباب مدلع مرره..بس كل الكلام علينا او على اللي ينطبق عليهم هذا الكلام..ومااقول الا..
بس الموج مايساعد..
ولاالأقدار بتساعد..
ويخليك ربي يالغاليه

[ابورشا]

هلا بالغاليه ماروكو..
اولاياهلا فيك بموضوعي المتواضع..ومشكور على مشاركتك لنا بالنقاش..
والله اعتقد ان اسوء شيء بالشخص بانه يحكم على كل الناس بشيء واحد..واصابعك ماهي وحده..وانا واثق انك ماراح تحكمين على كل الناس بانهم مش محترمين انفسهم..اما من ناحية الإحترام فافيه شباب راقي جدا وخصوصا من ناحية احترامه لنفسه ولغيره..
ومن عرفنا انفسنا وحنا اللي معطين انفسنا سمعه سيئه عن مجتمعنا وانا كلامي هذا عن اهل الرياض..
الحين وبصراحه..ابي صراحه جدا ..
وش نظرة اهل جده عن شباب او بنات الرياض...(متغطرسين..شايفين انفسهم)
واهل الشرقين ينظرون الى اهل الرياض باننا اقل مستوى منهم..
كل هذي حنا اللي حطيناها بانفسنا..لأننا اذا رحنا عندهم نصير مشافيح ومانصدق اننا في منتزه مختلط او عائلي..والسبب اننا مكتومين هنا..
وعشان مانطلع عن الموضوع...
انا اقول ان مثل مافيه شباب مش محترمين ..برضه فيه بنات مش محترمات
وغير هذا ان الشباب ما(يتحرشون) باي احد من الباب للطاقه الا اذا كانت هناك بوادر(.......)
ومشكور يالغاليه على امل انك تغير شوي من النظره..

[عنود الصيد]

أي مثالية الله يرحم والديك :(

بس نقول ان موقفي منهم مهوب مقياس .. لأن الغالبية يحب يطلع للزواجات ..
بس متى تجي هالزواجات عشان نحضرها يالبنات .. في إجازة الصيف ويمكن بالشهر مرة :rolleyes: يعني ( في السنه سنح ) كذى يقولونها:confused:


باختصار :

×انتم تقدرون تروحون لاي احد تبونه من زملاءكم او اصدقاءكم ما فيه احد يمنعكم.. عزايم واستراحات وجمعات ووناسه .. أما حنا مو بكيفنا .
×أنتم إذا احتجتوا شيء وبغيتوه .. مايبي لكم الا تشغلون السيارة وتطلعون تقضون اللي تبونه , أما حنا ساعة عشان توافقون وتطلعون تجيبون لنا شيء نبغيه بعد ماتتمنون ..

×وإذا بغيتوا رحتوا مع العائلة وطلعتوا لأي مكان تبونه ويكون عوائل .. ولو بغيتوا اتفقتوا مع احد من زملائكم او اقاربكم ومعهم اهلهم .. منها تستانسون مع بعض .. ومنها تبلغون شفكم وتدخلون هالاماكن :rolleyes:

×واذا الواحد منكم يدرس ومتفوق , لو بغى سافر وكمل تعليمه .. أما حنا تدرس وتتفوق وبالنهاية حتى الوظيفة ماتحصل :(
أما قصة هالمشاريع , فسالفتها سالفة .. مايبي لكم الا تفكرون تسوون شيء اذا كنتم عاطلين .. وبتلقون ألف شغلة وشغلة .. أما حنا اللي ماتوظفت جالسة بالبيت ..

اجل واحد نعرفه يكسب بالشهر عشرين ألف ريال ... وهو توه متخرج من الثانوية .. بتقول كيف ؟
ينقل تقريبا عشر مدرسات او اكثر الى مدارس بالقرى .. وياخذ من كل وحدة فيهم الفين وخمسمية ريال بالشهر ..
يعني أكثر من خمسة وعشرين ألف بالشهر :eek:

يعني اللي يبي الشغل بيلقاه :rolleyes:


وهو أكثر شيء يضيق صدوركم يالشباب هو الفراغ .. لكن مثل ماقلت بانكم تقدرون تشغلون فراغكم باشياء كثيرة وتنفعكم .. بس مايجي الشيء بالساهل لازم تفكرون وتخططون .. بس المشكلة انكم تبون كل شيء جاهز :p

بس فيه جملة من كلامك مافهمت شيء منها: ((وكونك تقولي انكم ماتدخلون الا الملاهي وبس ..وين الله يهديك ترى حنا نشوف ونعاني (حلوه نعاني)..وش اللي يصيربكل ممكان من احترام منقطع النظر للبنات وانتي عارفه ان الإحترام مش من مبداء الإحترام..ولكن من باب الفزعه.. ))



وعلى العموم .. الله يسمع منك وتكون حياتنا يالبنات أكثر وناسه منكم :)



و تــحـيـاتـي ,,

[هاوي الهلال]

اهلين ابو رشا ..


وش في هنا اشوف طقاق ... :D



والله ياهم مساكين البنات ..

اصلا يكفي انهم مايقدرون يروحون الملعب ويشوفون مباريات الهلال ..


هذي لحالها متعه


من جد راحمهم :D :D :D :D


خالد

[ابورشا]

اهلين بـ عانودالصيد..
اقول الله من العناد بهاالراس:D ..
يعني وش رايك الله يهديك ..هذي الفطره(والرجال قوامون على النساء)..
وبعدين مسؤلية طلعة الرجال او الشباب فهذي من واجباتهم الحياتيه..كون انه هو المسؤل عن توفير مستلزمات الحياه للإسره..
وتخيلي يعني تبين الولد اذا خلص من الجامعه ومالقى وظيفه يجلس بالبيت؟؟
الحين انتي لو توفر لك انك تسافري برا وتكملي دراستك..وبدون اي احد معك هل راح تسمحين لنفسك بانك تسافرين؟؟اكيد لا
والأهل دايما مايحاولون يظغطون على البنت من ناحية الدخله والطلعه لآنها (جوهره)..وتهمهم اكثر من الولد..
وبصراحه الله لايقوله انشاء الله البنت ضعيفه ومكسورة الجناح لو تعرضت لأي شي كيف راح تتصرف؟؟وممكن ترضخ لظروف سيئه او خبيثه وتدفع هي ثمن ضعفها..
الوظيفه..
الوظيفه للأسف الان اصبحت مصدر قوه واستعراض من قبل بعض البنات والدليل ان البنات يتباهون بطريقة تعينها اومنطقة تعينها...وماهي حرص على تسديد رسوم الحياة الا لحالات نادره ..والدليل ان اغلب الموظفات للاسف من(حقين السواقين)..
اما المحتاجات فعليا فلا والف لا..وتلاقي ان فيه من البنات الله يهديهم ماهي محتاجه للوظيفه ولكن كونها من باب التحدي لزوج المستقبل انطلاقاًمن قاعدة(مافيه احد احسن من احد) يعني زي مالي راتب انت لك راتب والعكس صحيح..
وايضا وللاسف ان بعض البنات ياخذون الوظيفه كـ (ميزه) يسيل لها لعاب الخطاب..

*(×وإذا بغيتوا رحتوا مع العائلة وطلعتوا لأي مكان تبونه ويكون عوائل .. ولو بغيتوا اتفقتوا مع احد من زملائكم او اقاربكم ومعهم اهلهم .. منها تستانسون مع بعض .. ومنها تبلغون شفكم وتدخلون هالاماكن )*
مااقول الا الله يسامحك..على هيك حكي وخصوصا الشطر الثاني..

ومن ناحية نقل المعلمات اكيد اللي يبي الشغل يلاقيه ولو بسوق الخضار والشغل مو عيب اهم شيء حلال..
@(بس فيه جملة من كلامك مافهمت شيء منها: ((وكونك تقولي انكم ماتدخلون الا الملاهي وبس ..وين الله يهديك ترى حنا نشوف ونعاني (حلوه نعاني)..وش اللي يصيربكل ممكان من احترام منقطع النظر للبنات وانتي عارفه ان الإحترام مش من مبداء الإحترام..ولكن من باب الفزعه.. ))

الجمله هذي الله يطول عمرك يعني يعني اننا نروح اسواق مع اهالينا ونشوف البنات كيف وضعهم بالأسواق او المطاعم او المنتزهات..وفوق كل الفوضى اللي يسببنه (بعض) البنات الا انهم يعاملون على انهم هم اللي على حق...يعني لو شافوا بنت(مهويه) وتتكلم وتضحك وغيره وجا واحد يبي (يبادر) تلاقيها تقلب السوق وتخلي الحق عليه وانه هو اللي تحرش ويقوم كل الناس يشهدون معها وكله لعيونها ..رغم انهم شايفين الموضوع من اوله..وانتي عارفه مبداءنا من ناحية البنت وخصوصا بالأسواق والماكن العامه ..بان البنت على حق مهما كان
انا عارف انك الحين وبعد ماخلصتي تقولين ايه كلامه صح بس ماراح اعترف بالشيء هذا :D :D
ومشكور على نقاشك الرائع وروحك المرحه..وسعة صدرك علي
ويخليك ربي;)

[ابورشا]

حبيب البي..
خالـــــــــــد او هاوي الهلال..
تخيل ان النزهان اسمه خالد وش تسوي:D ..
هلا والله وغلا
ابدا والله لامطاقه ولاغيره بس انت الله يهديك تتحرش ..
وين مساكين معه ..
ومن قصدك تقصد الشباب اكيد:o ..
يخليك ربي حبيب البي

[هاوي الهلال]

اهلين ابو رشا ..


وش فيه النزهان ...


شكلك ودك تقول اني مثله مالي داعي ومسوي زحمه ... صح :mad:



المساكين البنات والله .. ماهو حنا ...

ولا حنا ... وقت ماتقفل معك مايردك الا المطار :D :D :D :D :D




اخـــــــــــــ خالد ــــــــــــوك
;)

[ابورشا]

حبيب البي..
خلودي..يخليك ربي
والله مو القصد اني اتريق عليك..بس ماادري وش اللي ذكرني فيه:mad:
اي مساكين يالله يهديك..والله المساكين اللي ملحطين بالمقاهي..
ويخليك ربي حبيب البي

[ماروكو]

لالالالالا ياخوي ابو رشا انت فاهمني غلط :( انا ماعممت على الكل انا اقصد اللي مو محترمين انفسهم بس مااقصد الكل :(

وزي ماقلت اصابع اليد مو وحده :o

بس ماالومك اكيد بتفهمني غلط مااعرف اعبر :p <<<< عقدتها التعبير :D

بس بقول لك شئ اخوي احيانا العيال يتحرشون في البنات وحتى لو البنت محترمه نفسها ومتستره وماسوت شي

فيه بعض عيالنا مشافيح ماكانهم شافوا بنت بحياتهم :( وفيه بعضهم مايقربون للبنت الا اذا سوت شئ :mad:

ايه بس الله يستر علينا وعليهم :o

ومشكور اخوي :)

========================

هاوي الهلال ودي افقع راسك :mad: تراك ماقهرتني ابد ابد :(

[ابراهيم النجيدي]

هلا والله بابو رشا ونورت المنتدى العام بكتاباتك :) ,,,

في البدايه لازم نفرق في قضيه معينه بين التجارب الشخصيه وإنعكاسات القضيه بشكل عام ,,,

يعني ما أقدر أقول إنه بحكم إني شخص ملتزم وخلوق وعلى مستوى عالي من العلم والثقافه ( هذا مثل ولا أنا بعيد عن كل اللي قلته :) ) فمعناه إن كل الشباب على نفس القدر من الرقي ,,,

وهذا الكلام يقصد به الطرفين , فمشاهدات ابو رشا لبعض البنات ماينعكس أكيد عليهن كلهن وفي نفس الوقت تجارب عنود الصيد الشخصيه ماهي مقياس لكل البنات ,,,

واللي أقصده من كلامي , إنه في حال وجود ظاهره معينه في مجتمعنا يجب نقاشها بشكل عام دون تدخل تجاربنا الشخصيه والتي لاتلغيها في حال كانت تجاربنا عكس مانناقشه من إشكال أو خلل في طبيعة مجتمعنا ,,,

ما أعتقد شخصيا إن البنات محظوظات لهذي الدرجه اللي ذكرتها يابو رشا فهم بشكل أو بآخر أقل حظوظا في مجتمعنا في " بعض المجالات " , ومن ناحيه أخرى فهم أكثر راحه وأقل إلتزاما من الشباب في بعض الأمور ,,,

والنتيجه النهائيه وبشكل مختصر .... أنه لكلا الجنسين إلتزامات معينه مكمله للجانب الآخر , تزيد عند البنات في ناحيه وعند الشباب في ناحيه أخرى , والمحصله هي قيام كل فئه بواجباتها وكما خلقت من أجله , وأي شذوذ عن هذه القاعده ليس مقياسيا لتعميمه على الجميع بل الأولى مناقشة أسبابه للرجوع إلى الوضع الطبيعي في الواجبات وممارستها بشكل سليم ,,,

تحياتي للجميع ,,,

[هاوي الهلال]

اهلين شباب ..


هاوي الهلال ودي افقع راسك

:confused: :confused: :confused: :confused: :confused:

ليه .. يعني :(



النجيدي .. ( مافهمت ولا كلمه :confused: :confused: )


خالد ;)

[ابورشا]

هلا بالغاليه..ماروكو..
بصراحه الإسم محير جدا..
وعلى العموم انا مشكور على توضيحك الراقي واسلوبك في ادارة دفة النقاش والتفاعل مع القضيه..
انا معك في كل اللي قلتيه..واتفهم ان الشباب اجرء على (التحرش) وخصوصا اذا كانوا في مجموعات فيبداء كل شخص بإستعراض القوه وغيره..
ورغم ان الموضوع او القضيه اخذت منحى اكثر مما نحن نهدف له..الا ان الشيء بالشيء يذكر..
وماذكرتيه من امثله على الشباب فانا معك قلبا وقالب..ولكن تظل طبيعة او تربية الولد هي الفيصل في تمميز مااشرتي له..
مشكور لك على مناقشتك..
ويخليك ربي;) إلك
وياليت ادري وش معنى اسمك :confused:

[ابورشا]

حبيب الب البي..
الغالي مشرفنا ابراهيم..رغم اني ماودي ارد عليك:D
مشكور على مداخلتك الرائعه جدا معنا ولكن هناك ارتباط واضح بين مناقشة اي قضيه على المستوى العام او الخاص وبين التجارب المريره او الإيجابيه وذلك من باب اثبات مدى تأثير القضيه على السلوك الشخصي او السلوك العام وخصوصا الإجتماعي
ولكن لو تم مناقشة اي مشكله مهما كانت فانت ترها مشكله تافهه او هامشيه وذلك لعدم معايشتك لظروف هذه المشكله او الوقوع في احد مراحلها..اما الشخص الاخر والذي يستشهد بحوادث سمع او مرت به فهو يرويها من باب مالي هذه المشكله من اثار قد تتفاقم بالقريب العاجل..
اذا لدينا مشكله واحده ولكن من منظورين مختلفين بسب وجود عنصر التجربه لدى شخص وانعدام التجربه لدى الأخر وبالتالي ادت هذه العناصر الى اختلاف في الرؤيه القضيه وطرق معالجتها ..
اما من ناحية ان هناك واجبات خاصه ومشتركه بين البنات والشباب فانا اوافقك الرأي تماما ولكن يظل الولد يخضع لظغوطات جمه كونه هو المطالب بتحمل تبعات الظروف الحياتيه ومدى نجاحه لتهيئة المستقبل اذاكان يخطط لمستقبل طموح..
اما البنت فمثلا 30% بحاجه فعليه للوظيفه ..والقسم الآخر تحصيل حاصل..وبالتالي فهي لاتقع تحت ظغوطات جانبيه..
كون الشاب يخرج او يتناول حياته بنوع من الفوضى فهذا موضوع آخر يدخل تحت مظلة التربيه والمجتمع وغيره..
ورغم اختلافنا بجوانب الا انني اقدر لك نظرتك وتفهمك بعقليه عصريه لمشكله ولدت لتبقى..
ويخليك ربي حبيب البي;) إلك

[ابورشا]

حبيب البي..
هاوي الهلال..ياحبك للمشاكل:D :D :D
مشكور على مداخلتك..اما سؤالك عاد هذا بينك بينها وطلعني من الموضوع..
يخليك ربي حبيب البي

[اخت القمــر]

بالله عليك ياحظنا وش عليه ...

على الطلعات اللي مقطعه بعض والا على المسايير المتخالفه ..

وبصراحه اخوي / هاوي الهلال عطاك نقطه مهمــــــــــــه ( حضور مباريات الهلال ).

على الاقل انتو الواحد اذا زهق طلع ووسع صدره .

صحيح احنا نطلع بس في اوقات محدده .

وبعدين اذا اماكن العوائل حازه في خاطركم تراها ماتسوى ياسوق والا ملاهي .



:confused: :eek: :confused: :mad: :mad: :eek:

[ابورشا]

هلا وغلا بالإخت القمر..
اولا انتي منتي اخت القمر ..انتي القمر بنفسه..
على العموم ياهلا وغلا بمشاركتك..
بالنسبه لمباريات الهلال وش تروحين وش تشوفين..حنا وحنا شباب الواحد يصم اذنه من اللي يسمعه من الجمهور..
وبعدين لو رحتوا انتم للمباريات راح تسببون ازمه ..وماراح الجمهور يشجع الفريق وراح يطير عيونه على مدرجكم..
اما من ناحية الطلعات والمنتزهات والملاهي..ماهي هذي القضيه ولاوصلنا للدرجه هذي من الشفاحه على شوفتكم..
لكن انا اقول ان الأماكن العامه محصوره عليكم وبس..يعني انتي تقدرين تروحين لأي مكان عائلي ويمكن السكيرتي يفتح لك الباب
اما الشباب وين مايروح مايقراْالا (مدخل العائلات)..ويمكن يمسك ويتبهذل وينحلق راسه بعد..
والسبب انه طفشان..
يعني بالعربي انتم عندكم امتيازات مفتوحه..
اما الشباب ياحظي...مالك لوا..
ومشكور على مداخلتك ومشاركتك بالمناقشه..

[اخت القمــر]

هلا اخوي ...

حبيت اوضح لك نقطه اللي هي عن المباريات فهي ميزه لصالحكم

لان حتى ولو حطو مدرج بنات انا عن نفسي ما راح احضر...

وعليكم بالعافيه ..

[هاوي الهلال]

اهلين ..

ابو رشا .. وش اللي بيني وبينها .. انت اللي ورطني وانت اللي بتحل الموضوع ....:mad:


بس معك حق ... لو حطوا مدرج للبنات .. ماراح يكون فيه تشجيع ....
وحتى ماراح يكون في مباراة اصلا ... خاصة لو كان مع البنات رابطه نسائيه ...:D
عيون اللاعبين بتطير قبل الجمهور ... :rolleyes:



المهم حللي مشكلتي ....

ماابي راسي تتفقع :confused: :confused: :confused: :confused:


بايات
خالد
;)

[عنود الصيد]

سلاااام ,,

أبو رشا .. مع اني اقول كل مرة هذا اخر رد لي .. الا اني كل شوي ناطة بموضوعك واكتب رد :D


# ماتلاحظ انه الى الآن ما احد متوافق معك على رايك .. أنا اقول لك وش سبب الإشكالية بيننا ..

هو انك حاط العنوان ( ياحظ البنات ) , وموضوعك المفروض انه يكون عام لكل جوانب حياة البنت .. بس اللي حاصل العكس ..

هو انك خصصت و تكلمت عن شيء واحد اللي عاجبك في حالتنا اننا ندخل اماكن كثيرة ( على قولتك ) عكسكم يالشباب اللي دايما البيبان مسكرة بوجيهكم ..


ولما نرد عليك بوجود جوانب بحياتنا يالبنات غير محظوظين فيها .. ترد علينا : بأن هذا الشيء من واجبات البنت والمفروض انها ماتعترض عليه ( وأنا معك بها الشيء ) بس مثل ماتقول الاشياء اللي توسع الصدر عند البنات لازم تذكر الاشياء اللي تضيق صدورهم ..


#و بعدين اللي تكلموا عن حضوركم للمباريات أو انكم تسوقون ( القصد نعدد بعض الاشياء اللي انتم محظوظين فيها ) لكن انت ترد باننا نرغب باننا نروح لها ( واحنا بنات ) ..

بالعكس احنا نعي باننا بنات ومايصير نسوي هالشيء لان ضرره اكثر من نفعه لنا( مع انه ودنا فيها ) .. بس نبي نوضح لكم ان فيه اشياء تتميزون فيها عننا فقط لاغير ..


# وباختصار .. من البداية الأجدر يكون عنوان موضوعك ... (الله يعين الشباب ).. وتذكر فيه مشكلتكم وانكم ماتلقون أماكن تروحون لها .. لأن كل الأماكن عوائل .. وبس ..
لأنه من كلامك فهمت ان هذا هو الشيء الوحيد اللي غير محظوظ فيه الشاب ..

ومشكوور مرة ثانية على الموضوع القابل للنقاش :)

××××××××××××

وبعدين تعال تراك كل شوي قاعد تشكر نفسك .. يعني بنهاية ردك علي او احد غيري تقول (مشكور) وماقصرتي أو ماقصرت ( على حسب المخاطب )
المفروض تقول (مشكورة) وماقصرتي .. عند مخاطبة المؤنث ..

<<===== قلبت الموضوع نحو :p:p

وش نسوي خلنا نقول ولو شيء واحد يفيدنا بالموضوع .. لأن كل اللي قلناه مايقدم ولا يوخر :)


و تــحيــاتــي لك ,

[ابورشا]

هلا وغلا ..
اهلين بـ عانود الصيد..
اولا الإختلاف لايفسد للود قضيه..
ومهما اختلفنا فحنا حاطين الموضوع للنقاش ومعرفة ابداعات ومستويات المشكله للبنات او للشباب..
انا معك ان لنا حسنات او لنا مميزات..والبنات لهم بعد..
ولكن انا تكلمت من ناحية نظرة المجتمع على انه مدلع البنات من نواحي..وماابغاك تقيسينها على الأخوان بالبيت ومدى تلبيتهم للمتطلبات البنت داخل البيت..لآن هذا راجع له شخصيا..
انا اقدر انه فيه اشياء كثيره للشباب وبرضه فيه اشياء كثيره للبنات..وان الشباب يقدر يروح وبدون اي محسوبيات عليه بعكس البنت واللي سبق وقلت بانها(جوهره) صعب تركها للمغريات ولو كانت للترفيه..
ان اقدر لك انك ملاحظاتك اللي ذكرتيها علي واللي تشوفين اني متمسك فيها او ارواغ كل ماحاولتي تقنعيني ..ولكن هذا رأي والمفروض مانزعل منه مهما كان لأن لكل شخص حريه بالتعبير عن قناعاته..
وكون ان كل اللي يردون علي بالموضوع غير متوافقين معي..(ماادري وش اقولك بصراحه)..
اما اذا كان عنوان الموضوع مش عاجبك فالشكوى لله..هذا اللي الله عطاني ..مااميز ..:mad:
اتوقع انك لغه عربيه ومهبله فيك الماده وتبين تقلبينها إعراب والذي منه..:D
مشكور **** يعني انا مشكور لمشاركتك وهذا يرجع لك انت
اما مشكوره ******اذا كانت البنت هي اللي كاتبه الموضوع وتعبر عن شكرها..
ماشاء الله عليك ماخليتي شيء الا وصكيتينا بملاحظه..
الله يستر وش يبي يطلع بعد من ملاحظات:D :D
يخليك ربي

[الشاطر]

هلا اخوي الغالي الرائع ابو رشا
موضوع جميل عن اخواتنا البنات
بالنسبه للظلم وتشكيهم ليس بجديد
واذا هم يتشكون من هالوضع فهم معذورين من جد
والله يعينهم وباذن الله علي اجر

[ياسر عبدالعزيز]

هلالالالالالالا والله ابو رشا والله صدقت في كلمك.. تصدق اني لي سنتين مطلعت من بيت:D مقطن في ها البيت,,من الدوام الى النت,,وعلى ها الحاله سنتين
اناعندي فكره,, ناخذ انا وانت خيمه ونطق في امكان.. ونطلع له العشاء..ونجيب النزهان يصلح النا الشاهي ويغسل البيالاته.. ويحرس الخيمه.. وشرررايك كل تماااااااااااا


تم تم تمتمتمت

[ابورشا]

حبيب البي..
اخوي الغالي.....الشاطر..


تشكي وانا اشكي كل منا له ظروف..
تقول بي هم وانا اقول بي هم..


مشكور على مداخلتك يالغالي والله يعيننا ويعينهم..




حبيب البي..
ياااااااااسر..
لاتذكرني بالنزهان والطائي..
تراني جاي هنا ابي انسى..
ومشكور يالغالي على لطفك وذوقك..
يخليك ربي حبيب البي;)

[ابراهيم النجيدي]

http://d1d.net/net/himo/motamyyz.gif

[ضنان الشوق]

يكفي انكم تسوقون سياره وتحضرون مباريات...
وبعدين يحق لنا نوسع صدورنا ولكن في مجال لايخل بالاخلاق..
نطلع نتسوق ,نروح للمشغل ,نزور اقاربنا بكيفنا...
تللرضون احد يحاسبكم على روحاتكم للاستراحات والمغازله والا تجميع المواكب في شارع التحليه؟؟؟؟

كل واحد حر ولا احد يتدخل الا الاهل حتى الزوج ماله كلمه..
<-----تكلره السيطره ووحده بوحده..

[الروح]

:(:(

هذا اللي تقول ان البنت تروح للمشغل من المغرب :(

ياحسره


اقووووول بس والله البنيات مسيكينات :(

[قرانديزر]

ســــــــلام



مشكور على الموضوع


تحياتي

[sodos]

الله يعطيك العافية يابو رشا موضوع مميز

[البركان الأزرق]

الحين ما لقيتو تتنحبون الا حنا يالبنيات المسكينات
يكفي انكم تروحون الملعب :cry: وهذا اهم شي

واي مكان وين ما يكون ان شالله على رصيف الشارع ما عليك الا انك تاخذ قهوتك وشاهيك وتبسط محد راح يقول لك شي :cry:

اما حنا يا حول وين نروح له :cry:
يعني انتم تنحبونا على السوق وش به السوق وشو مكان يبيع اغراض وين المتعه فيه :yuupy:

واذا على المنتزهات الله اكبر يا منتجعات سويسرا والله من المنتجعات اللي بالرياض حر يصلخ وموت حمر ونخلة يابسه وشجره صفرا وش بهن زود وقالولك منتزه العائله الاول >>>>>> :d:


واي مكان تمشون فيه عادي تقطعون شارع عادي

والله يا انا انه نفسي اروح لبيت جدتي مشي >>>>> قولو وش هالقرويه بس كيفي ابي امشي :cry: بس مستحيل طبعا :d:



المهم
اذا على الزوجات وش بهن الزواجات من متعه تكفون :eek:

ماغير كشخه وقرق وحش بخلق الله وصدعة راس مانبي نحظرهن من زينه عاد بس هن الموجودات :d:

[abo-sagr]

........

والله في الصميم يا بو رشا

.. والله انك صادق ..

.. البنت اكثر منّا حرية في هذا الوقت :slv:

.. ملاهي .. حدائق ..

حتى المواقف قريب تكون نسائية فقط :slv:



........

[هلاليه والنعـم]

البنت ياعيني تروح للمشغل من المغرب

قصدك من الظهر

والفنانه تغني

فنانه = طقاقه :fghty:

وهي ماغير تحش باللي رايح واللي جاي..وكأن هي الكمال بالجمال

لا والله حرام عليك مو كلنا اصلا عني انا مافي وقت احش طول وقتي على المسرح :ignor: حتى لو تخلص الاغنيه نجلس انا وبنات خالي على المسرح

ملالالالالالالالالالالالالالالالالاحظه ::

اذا كان العرس من اهلنا نجلس على المسرح وطول الوقت فوقه

اذا كان مانعرفه ذيك الساعه اجلس على الكرسي :ignor:


نرجع للي فاله بالزوج وطقطقه واغاني..وشكشكه وآخر بسط

ااااه شهيتني ودي اروح لعرس !!

مبسوطات ومدلعات من ابوانهم

يعني انا يسموني اهلي وصديقاتي وكل من يعرفني

دلوعة ماما :kello:

////

تسلم على الموضوع :yes:


أختك :: هلاليه والنعـم :qw:

[حفيدة المؤسس]

ابو رشا؟؟؟؟؟

يعني موضوعك كله على بعضه علامات استفهام ؟؟؟؟؟+!!!!

يعني نكون مع الحق احسن.,.,
البنت لها حقها والشباب بعد.,.,

انت تشوف ان البنت ماخذه راحتها وحريتها بشكل معقول .,.,
بس نظرتنا للشباب غيــر.,.,يعني هو اللي ماخذ راحته وعايش حياته بمعنى الكلمه.,.,
وبعدين لي تعليق على كلمة اخوي باوير قال منطق في البيت قال؟؟
اجل من اللي يدور في السيارات اربع وشعرين ساعه لايكون البنات وانا مدري؟؟؟ (himo)

وبعدين مسكت علينا السوق والكوافير مدري المشاغل
<<ماتذكر المكان وعجزانه اطلع اقراها ثانيه :req:

يعني أم البراءه في شبابنا صــح.,. (rambo)

على العموم كل واحد ماخذ حقه وان جت على كل مكان عوايل.,.
مستعده نبادلكم يعني روحو اسواق وانا استراحات.,.,
روحو مشاغل وانا اي كوفي شوب.,.,

<<بس لايكثر :slv:

اهم شيئ الاخلاق.,.,

يعني شيئ احسن من لاشيئ واذكر ربك بــس.,.,
الله يعز الحكومه لنا.,.,ويخليها للشعب السعودي.,.,اللي حتى المطازيز خلتها بكراتين فيه تطور مثل كذا.,., :yes:

[الكـا 20 ســر]

كل البنات يدخلون ويردون علية

ياهو يحش بالبنات حش:rolleyes:


لو كان يحش فينا كان وريتك فيه:mad:














واحد مايحب التحرش أبد:o

[قانون الجاذبيه]

يعطيك العافيه

[مشتاق لنظره]

كلامك صحيح يخوي

[هلاليه ملكعه]

ياغياار سلملي على رشا ههااي