ممكن معلومات عن جوال سامسونج الجديد

[محمد]

السلام عليكم

كيف الحال


شباب ممكن اي واحد عنده راي عن جوال سامسونج الجديد (( اصاله))

يعني عيوب او مميزات ... لاني ودي اشريه بس اخاف يطلع فيه عيوب ..
وبعض الناس يمدحونه والبعض الثاني يسبه ......

بس هنا قصدي ممكن يتقارن بنوكيا ولا لا من ناحيه المميزات واهم شي (( لك وللزمن ولا لا)) لان النوكيا معروف (( حمار شغل )) :kany:السامسونج زيه..

اللي عنده راي ولا معلومه لا يبخل بها علينا ...




وتحياتي للجميع

[shubi99]

اخوي حمودي هلا وغلا،،، تبي الصدق عن جوال ( اصاله) صراحه جوال بمعنى الكلمه شاشه صح والوان صح وحافظات شاشه صح، بس العيب الوحيد الي فيه انه مايشيل إلا 8 رسائل فقط لاغير وإذا امتلت الذاكره لازم تمسح رساله علشان تمرر للرسائل المستلمه،، اما من ناحية إرسال وإستقبال فهو لا يعلى عليه:nrey: بس نوكيا افضل في الرسائل فقط لاغير:slv:

[محمد]

يعطيك العافيه اخوي

مادام كذا توكلنا على االه بعدين تراه زين .... ما يشيل الا 8 رسايل هذا اللي نبيه
......... لو تدري الفاتوره اللي راحت كم ؟؟

كان تصير:jhgy:

وانت الصازز (( الصادق )) الا اطلق بمليون مره ... (( حنا يالسعوديين الواحد يده تحكه الا يرسل ... وهذا دوانا )):D


يعطسك العافيه وما قصرت

[TOTTI- 10]

هلا و الله حمودي ...

و الله الجوال رائع بكل ما تحمله الكلمه من معني

بس فيه عيب بسيط

ان النغمات صوتها ضعيف شوي يعني اذا كان عندك ازعاج صعب تسمعه ...

و الا من ناحيه جهاز ممتاز جداً ,,, له عندي تقريباً ست شهور و لا احلى منه ;);)

و اهم شي ان اعلانه الي مسويته (( اصوله ;);) )) يا بعدهم و الله

[محمد]

اخوي توتي طيب هو فيه مشاكل من ناحيه الصيانه او عيب فني بعد زمن او حساس ؟؟؟
وهل يتقارن بنوكيا (( رهيب )) من ناحيه (( لك وللزمن & وحمار شغل )) يعني راعي كرف و مو حساس ؟؟ يعني اذا طاح او اي شي بسيط عليه يأثر ولا لا ؟؟

ويعطيك ربي الف عافيه

[TOTTI- 10]

و الله زي ما قلت لك اخوي حمودي ... له عندي ست شهور ... ماشي زي الحلاوه

و مسئله اذا طاح و الا شي و الله طاح مني كم مره و ما صار فيه اي شي

[محمد]

وش ابشرك فيه ياتوتي & الشباب



شريته... (( اي بالله شريته ))

بس اقول وش البرامج اللي احتاجها عشان ادخل النغمات او الصور ..وترى جا مع الجهاز كيبل
وصله بس مدري هي للنغمات او لا ؟؟

[ابراهيم النجيدي]

الجهاز يجي معه كيبل توصيل بين الكمبيوتر والجوال وسي دي يحتوي على مئات النغمات الجاهزه ومئات الصور لتغييرها وقت ماتحب ,,,

الجهاز عندي من قبل كاس العالم يعني تقريبا من 8 شهور ولا عليه مشاكل أبدا والآن يشيل 15 رساله وهذي مادري كيف صارت في جهازي بعد ماكان يشيل فقط 8 رسائل وأعتقد إن السبب في الشريحه واللي زادت سعة تحميلها للرسائل إلى 15 رساله من شركة الإتصالات !! ,,,

تكسره بالعافيه , وبالفعل الجهاز يستحق الإقتناء ,,,

تحياتي لك ,,,

[محمد]

شكور اخوي ابراهيم على ردك


لكن عندي استفسارات بسيطه ....

1- ممكن شرح بسيط عن كيفيه ادخال انغمات & الصور & (( شاشات التوقف ))
لجهاز اصاله .

وصلتني معلومه من واحد من الشباب يقول انه لازم تطفي الجوال قبل لا تشبكل الكيبل !!
هل هالخبر صحيح ؟؟

- اذا بغيت احذف المكا لمات المرسله او المستقبله او الفائته يبي وقت عشان احذفها ، يعني مو زي النوكيا مسح الكل .. ما فيه طريقه للحذف الكلي اسرع ؟؟
- وش يقصد بإختيار بث في قائمة الرسائل ؟؟
- وش يقصدباختيار رقم الهاتف الموجود في قائمة ضبط الهاتف ؟؟
- اذا اخذت حجب الرقم من اختيار هوية المتصل - ينقطع الاتصال - ليش ؟
- ممكن طريقه تخلي نظام الساعه 12 بدل 24 ....



تحياتي اخوي ابراهيم واسفييين جدا على الاطاله ...

[ابراهيم النجيدي]

هلا حمودي ,,,

بعد ماتدخل السي دي في جهاز الكمبيوتر وتحمله على جهازك تشغل البرنامج (pc link ) وزي ماقال لك ويك لازم الجوال يكون مغلق وبعض الأحيان بمجرد ماتشبك الكيبل فيه يشتغل وعندها لازم تفصل الكيبل تعيد إغلاق الجهاز وتشبكه مره ثانيه ,,,

بعد كذا الموضوع سهل بالمره تختار إما النغمات أو الصور وتلقاها في أعلى البرنامج , النغمات ( melody ) تلقاها على شكل بيانو والصور ( image ) تلقاها على شكل كاميرا ,,,

بجوار الإيقونتين ( البيانو , والكاميرا ) تلقى إيقونه مرسوم عليها جهاز كمبيوتر متصل بجهاز جوال , تضغط عليه بعد ماتوصل الجهاز بالمبيوتر عن طريق الكيبل وراح تطلع لك في أقصى اليمين 8 خانات بأسامي الصور الموجوده عندك وتقدر تغيرها بـ 8 صور جديده كشاشات توقف في كل مره ,,,

أما إذا إخترت النغمات فراح يطلع لك 12 نغمه موجوده في جهازك تقدر تغيرها بـ 12 نغمه جديده موجوده في السي دي ,,,

العمليه أسهل من ماتتصور , وتقدر تجربها بنفسك ومن غير شرحي وماراح تتعب فيها :) ,,,

كل جوال له مميزاته , وبالنسبه للحذف فمعك حق هي تاخذ وقت للحذف لكن الموضوع مهوب مهم ومافي داعي أساسا لحذف أي إتصال إلا في حالات نادره ,,,

قائمة الرسائل هذي رسائل جاهزه تكتبها أنت وتخليها جاهزه للإرسال في أ وقت مثل " النماذج " الموجوده في نوكيا ولكن هذي من تصميمك أنت ,,,

رقم الهاتف ماله أي أهميه عندنا , له فائده في الخارج لكن عندنا لا :( مثله مثل خاصية حجب الرقم يعني برا تقدر من جوالك تمنع اللي تتصل عليه إنه يشوف رقمك ! ومثل هذي الخاصيه ماهي موجوده عندنا للأسف وبالتالي ماله داعي تخليها على " الحجب " لإنك ماراح تستفيد إلا قطع إتصالك ,,,

مافي طريقه لتحويل الساه إلى 12 صباحا أو مساءا , وهذي مشكلة اللي متعودين على النوكيا , يبون كل جهاز يشبه النوكيا :) ,,,

كل جهاز له خصائصه وأكيد راح يكون فيه إختلافات بين الأجهزه :) ,,,

تحياتي لك ,,,

[محمد]

اخوي ابراهيم :

يعطيك الف الف عافيه والعمليه على قولتك .... سهله مرررره ..... لا وابسط من اللوقو منجر حق النوكيا ....


واخيرا يعطيك الف عافيه اخوي ابراهيم