عادة سيئة لدينا نهشتنا ولاتزال تنهش الجيل الجديد ؟ الى متى .. !

[البطل نواف11]

السلام عليكم ورحمة الله وبركاتة

بصراحه شئ محزن شاهدته اليوم ..

رحت افطر اليوم بعد الفجر مع اقاربي في القرموشي :heart:

كنا اربعه انا وابوسالم وابومهند وولده مهند وعمر ولده 15 سنه

المهم بعد ما افطرنا قال ابو سالم لنا ياجماعه نبي نروح الشقة حقتي بما اني عزوبي حاليا ونشوف لنا فلم

على طول رد ابو مهند معانا وراعين ( قالها بصوت عالي )

ثم قال ابوسالم وش رايكم نروح الاستراحه ندند بالعود رد ابومهند معنا وراعين

وفي الاخير قلنا كل على بيته ازين

وحنا بالسيارة قالي ابوسالم : ابوحميد ماودك تعرس وتترك ها الاسواق << يقولها مزح (himo)

ورد على طول ابومهند ماتفهمون انتم عندنا بزر

وبعدها قال له ابو سالم لاعاد تجيب ها الورع والله مااخاويك ذبحتنا به :amle:

وانا طول الطريق اقول: لا مهند رجال وكبير وتعدى 15 سنه << قاعد ارفع فيه :kany:

تمت :d:
...................

ياجماعه انا سبق وان مريت بواقع مهند اقسم بالله اتضايق يوم يقولون اللي حولي معنا ورع ..

يعني الواحد ماصدق وصل ثالث متوسط والمدرسين نافخين راسه وانه كبير ورجال ثم يجيه انواع التحطيم من اللي حوله ..

اتذكر مره اخوي قد جلدني جلد صهيوني علشان كنت اتفرج مع الشباك في فلم جاكشان ويوم شافني لحقني وضربني الين كسر اصبعين لي .. :(<< المصيبه الحين مبلشني ابي اخر حلقه من برزن بريك ابي لوست ابي باتمان الجديد ابي ..:jeng:


............................


عموما تأثيرها النفسي ورب الكعبه على المراهق قوي جدا .. بالذات في سن (14-15-16)

اوكي اذا ما حبيت انه يسمع ممكن تغمز او تسوي شئ ماينتبه له بحيث مع تجرحه ..

.................................

انا كنت الى ثالث ثانوي اكره اللي اكبر مني واذا كلمني واحد كبير اتضايق منه وما اخاوي الا اللي اصغر مني حتى ذهب الى دكتور نفسي وتخلصت من المرض هذا .. والسبب مقولة ( معانا ورعان )


اتمنى ياجماعه تأخذون بي درس .. ولاننسى الرسول حينما كان يلقب الغلمان ويكنيهم لكي يشعرهم انهم كبار

الرسول خلف رجال في هذا السن واسامة بن زيد قاد جيش وعمره 17 سنه ولاننسى من قتل ابوجهل

باذن الله تزول هذا العادة السيئه لدينا لاننا نحتاج قواد جيوش ووزراء وناس لهم هيبه ..

دمتم :kello:

[معذبني الهلال9]

صحيح والله

وكثير غيرك يشتكي واولهم اخوي ..

انا اخوي بالمتوسط يشتكي من اخوي اللي بالجامعه

يقول كل ما اطلب شي يقول صغيـــــر

عكس ابوي اللي جالس يعلمه السواقه واشياء كثيره

بس انا ترجمت افعال اخوي الكبير لقيته يعبر عن اللي كان يجيه هو بعد

العمر ذا حساس مره والله واي شي يأثر فيه

فما بالك اذا هو حاس نفسه كبير ويجي من يحطمه ..!

اللي نحتاجه ثقافه عامه للأسره

وثقه ولامبالاة من قبل الفرد


كل الشكر لموضوعـك الرائع

[ابوسعد الهلالي]

بالفعل احس الواحد في هالعمر مسكين ويعاني وكلنا مرينا بهالفتره وكانت من اصعب مراحل العمر من الناحية الاجتماعيه ..

ان دخلت على الحريم تغطوا وقالوا انت بالغ رح للرجال وان رحت للرجال طردوك وقالوا توك ورع وسوالفنا ماتصلح لك رح عند الحريم ..!!

واخوانك الكبار يصفقون فيك ويرجفونك وكل شي غصب عليك تسويه لانك بزر وعلى قولتهم يربونك ..!!


ولاعندك سياره تروح فيها والطلعه مع زملاك ممنوع لايدشرونك .. ولافيه بديل غير التلفزيون ولا الجلسه مع اهلك اللي تنحرم منها اذا جوكم حريم !!


يعني باختصار لا انت اللي رجال ولا انت اللي بزر واتذكر عانيت من هالمرحله لين خلصت الثانوي وصرت اروح بالسياره للجامعه وارجع ومحد يقولي ليش ..

وافكر اذا كبر ولدي ان شاء الله اني اخاويه ولا اخليه يحس بهالمرحله ابد .. لانها تعتمد على التربيه ..


دمت بود ,,,

[يوسف الثنيان لاعب فنان]

اعتقد ان ابو مهند حريص على ولده مهند ومايبيه يتأثر بالسلوكيات الخاطئة

ويبي يغير السالفة لكن ماعرف ابد مثلا مايبي ولده يشوف الفلم معكم يمكن الفلم مب زين :fghty: وفيه لقطات قلة ادب ،، ومايبي ولده يروح ولده معكم للاستراحة بسبب العود لان الغناء حرام ،، ومايبيكم تسولفون بسواليف الزواج لان يمكن الحديث يكون مافيه حياء ابد ..
يشكر حرصه على ولده لكن اخطا الاسلوب وماهكذا تورد الابل يا ابا مهند

كان يقدر يغير الموضوع باسلوب افضل من التحطيم اللي شافه ولده وكأنه يقصد الاساءة له ،، يعني لو قال يابو سالم غير الموضوع او مرة ثانية افضل من معنا ورعان وختمها ماتفهمون معنا بزر !!
عمره 15 وبزر عجيب والله ،، اجل متى يصير رجال اذا صار عمره خمسين يمكن .. واتوقع لو يوصل عمره خمسين بيعتبره بزر ..

يمكن ابو مهند مغصوب من ام مهند على اخذه معه للمطعم فحط حرته بالمسكين ..

ولا مايعرف اسس التعامل مع ابنه والله يعين الابن على ابوه ،، اذا كان قدام الناس تحطيم اجل كيف بالبيت ..

نتائج التحطيم شخصية مهزوزة وقد تنحرف لاسمح الله بسبب القسوة بالتعامل ..

شخصيا ماعانيت من المشكلة اللي تقولها لأنه ببساطة انا اكبر اخواني وما اكبر مني الا ابوي وامي :d:،، اما علاقتي بابوي من زمان علاقة احترام ومعاملني كرجل من يوم اني بالطفولة ولاعمره قالي يابزر او حطمني بشيء .. اذا اخطيت وجهني بأسلوب واذكر الى سادس ابتدائي كان يوجهني وعقبها ترك لي الحرية في كل شيء .. واذا جلست معه آخذ راحتي اسولف معه واضحك معه وبين وبينك مطيح الميانة مع ابوي :angel:

انا عندي اخوي الصغير اصغر مني بحوالي 17 سنة ،، شف الفرق وياما طلع معي وقالوا لي حقين المطاعم وغيرهم هذا ولدك وشيء من هالقبيل ،، لكن علاقتي معه رجل لرجل استمع له ولا عمري قلت له يابزر ،، اخليه يسولف على راحته ،، وماله اي داعي التحطيم لأن مصيره بيكبر وبيصير رجل ،،

وكل اللي تشوف بالكرة الارضية ولدوا اطفال ثم مراهقة ثم رجولة ثم شيخوخه .. فإذا كان يعيره بصغر سنه فهو مثله كان بزر وورع ..

اللي يسوي هالشيء مريض نفسي وعنده مركب نقص ولأجل يحس انه شيء مهم يشوف اللي اصغر منه ويستهزا بصغر عمره ..

[هلال العرب]

كنا اربعه انا وابوسالم وابومهند وولده مهند وعمر ولده 15 سنه
اجل كم عمرك يا اخوي ؟؟؟<<<<< معليش على العفطه

[Golden Pen]

احترم وجهة نظرك

يبدو لي تفكيره سليم لاكن تطبيقه خاطئ

انا بأتكلمك عن نظرتي في ثقافة التعامل مع الأبناء
كثير من الأباء يتعامل مع ابناءه بعصبيه وبتحطيم في كثير من الأمور
ربما هو لايشعر بهذا الأمر ويعتقد بأنه يحاول المحافظه عليهم
لاكن هو يحطمهم بالإسلوب هذا
ويفقدهم ثقتهم
لذلك تجد كثير من أبنائنا لايجيدون ثقافة الحوار
فيصبح مثل أبيه
احادي الرأي لايتقبل الآراء الأخرى
والبعض يفقد القدرة على المحاورة أصلا
فيكون عديم الشخصية وللاسف
تحياتي لك

[لورين]

رحت افطر اليوم بعد الفجر مع اقاربي في القرموشي

:love::love::love:
وش طلبتوآ ؟ :d: أمزح

.
.
والله ابو مهند من زود الحرص على مهند لا يفسد ..

بس عادي خله يتفرج فيلم ويروح الكورنيش أن ماسوا هالاشياء معكم بيسويها مع زملائه
وبعدين الفيلم والكورنيش مافيها شيء سواء مع بزران ولا مع كبآر ..,
.
.
اللي مر في مهند يهوون ذآك اليوم نتكلم عن نكت محششين ونقولها ونضحك ..

مادريت الا امي تغمز لي عشان اخوي اللي عمره 12 مايعرف وشو محششين ..

طيب عاادي خله يعرف عشان يحذر من هالأشيآء بعدين

ولا فيه مواضيع مانفتحها والبزارين فيه ..

طيب عاادي مرره خلهم يسمعون مصيرهم عارفين منا ولا من غيرنآ

وبس تسذآ :d:

[aljanral]

والله من نحية عادة سيئة هي سيئة ومنتشرة لأسف :( , أنا أظن يمكن القضاء على هذه العادة بتثقيف الأب :rolleyes:

[زيـزوم]

^
^

تثقيف الأب :req:

ول يالجنرال ، أثريك نيبرالي :angel:

[aljanral]

^
^

تثقيف الأب :req:

ول يالجنرال ، أثريك نيبرالي :angel:


:d:هع والله لا ليبرالي ولا شئ بس أنا أظن هذا هو حل المشكلة :yees:

[[messi]]

خله يجي ويقول ياورع والا يا بزر

حلاله وربي حلاله

بس لو يرجع واشووووفه

استغفر الله العظيم

آآآآآآآآه الى جنة الفردوس يا ابي:(

[H i M o]

جآلس آعيش المرحله هذي ... لنا الله :(

وطبيعي يمر الإنسآن بهذي المرحله ,,, ويآمآ نآس آعرفهم آبآئهم تآركين لهم كل الحريه يطلعون يسآفرون عآدي وشفهم خربآنين حتى الصلآة مآ يصلون والعيآذ بالله :( .. هذي بالنسبه للمعامله

يعني الخوف لو تطلع تجيب غرض وتتآخر دقيقه يتصل عليك ابوك ويقول وينك وليش تآخرت وهذآ طبيعي جدا ومآ اتوقع فيه شي

ولو تطلع مع اخويآك وتآخرت عن تسع من الليل :cry:تصير كآرثه صح آني آنقهر لكن من صآلحي آكيد

الحمد لله على هذي النعمه :d:

آمآ بالنسبه من التقليل من قيمتك او بمعنى عآمي يسلكون لك :mfhi2: هذي آعآني منهآ كثير وصرت آتجنب آلكلآم كثير وهذي آلصرآحه معذبتني كثير الله يعين :yarab:كثير :d:

تحيآتي كثير :d:

[هلال الارض]

ثقافه مجتمع :rolleyes:

[هلالي نعام]

للاسف االطفل (في عمر 10 الى13) اذا لم يدرك ماسينتظره بعد دخوله مرحلة المراهقه من البيت ويكون واثق من

نفسه انه راح يكون رجل

فلن يحس بقيمة ومعاني ماسيعرفه اذا بلغ

لان الفرق شاسع جدا اذا كان الاب يحدث ابنه عن هذي الامور بحد المعقول وعلى قد عقلله او صديق السوء الي

راح يحرضه على هالامور

ولكن اذا كان سيخفي على ابنه

سيعرف الابن لانه لايعيش في بيئه البيت فقط ولكن اقل شي المدرسه هي كافيه لكي يعلم الامور هذي

يجب ايضا ان تختلف تربيت الاب اختلاف جذري بعد بلوغ الابن لانه اصبح شبه عاقل من ناحية

معرفته بأمور الحياة

وأن يحرص على تامين أبنه من الناحيه الاجتماعيه لان الابن في هالمرحله راح يستغني عن البيت وراح يطلع منه


فاحرص على ان يكون مستعدا للمواجهة حرب اصدقاء السوء وتحريضهم لااجل خراب الابن وان يكون واثق من

نفسه لكي ينتقي الصديق الصالح

لان السبب الرئيسي لااختيار صديق السوء هو ان الابن لايعلم ماسيدركه وياتي صديق السوء لليحرضه على امور

لايعرفها ثم بعد ذلك يدرك الابن ماسياتي له ولكن بطريقة الضياع والتحريض

فالان صديق السوء قام مقام الاب الي راح يقول بعدين ولكن الى متى بعدين

[مذهلــهـ]

وبعدها قال له ابو سالم لاعاد تجيب ها الورع والله مااخاويك ذبحتنا به

وانا طول الطريق اقول: لا مهند رجال وكبير وتعدى 15 سنه << قاعد ارفع فيه


15 يعني صف اولى ثانوي وإلا ثالث متوسط .. الصراحه احسه كبير ماشاء الله

بس شف ترا تختلف من شخصيه لـ شخصيه والله العظيم اني اعرف ناس من وهم في سادس وشياطين وكل شي يعرفونه

وناس يافيهم برائه مو عند احد يعني تلقاه يوصل الثنوي ولسا فيه فهاوه موطبيعيه

واكبر مثال اختي الحين هي في اولى متوسط والله اني اسمع سواليفها هي وصديقاتها في التلفون احس سواليفها

بريييييئه وطفوليه مررره :) .. وبالعكس اخت صديقتي يعني والله اني اكلمها احيانن احسها تعرف اشياء اكثر مني

بالنسبه انك تعاني .. كلن ترا يعاني مو بس انت .. واولهم انا :)



اوكي اذا ما حبيت انه يسمع ممكن تغمز او تسوي شئ ماينتبه له بحيث مع تجرحه ..

حتى الغمز .. انا والله اول انتبه لكل شي حولي ..
جد والله بعضهم مهمشين هالسن مررررره واللي يتكلم بالالغاز ومدري ايش

قسم بالله احسهم يفهموووون وبقوووه .. وبنفس الوقت ينقهرون !!

عندي الحين ولد خالتي والله اني ارحمه مرررررره مسيكين في ثالث متوسط اذا راح مع اولاد خالاتي طقة الثانوي والجامعه ما يبونه .. وهو ما يبغى يروح مع الصغار طقة الابتدائي .. والله اني ارحمه مسيكييين مررره
مشتت بينهم :Bad:

عـ العموم هذي فتره وتعدي بحلوها ومرها ولها ذكراياتها الخاصه :)

تحيتي لك :):br:

[آسير11نوآآآف]

ياما عانيت من هالمواقف ..
لا في ناس عيني عينك يقولون اطلع بنتكلم بموضوع واذا قلنا وين نطلع مافي الا حريم بجلس معكم قالو لا انت بزر اطلع برا
واذا رحنا عند الحريم قالو اطلع برا انت حرمه ولا رجال يعني مطرود من كل الاماكن
الله يصبرنا بس,,
تحياتي

[[[ SaMi ]]]

و عليكم السلام و رحمه الله و بركاته

انا امر بهالمرحله الان و اعاني فيها لكن مو من المشكله اللي قلت انت عليها
المرحله هذي الواحد يكون ما بين رجال و بزر , الرجال يشوفونك صغير و البزران يشوفونك كبير
صرت حتى اذا قال لي اخوي الكبير مثلا ابطلع مع اخوياي نكشت تجي معنا ؟ اقول له لا لاني عارف انه ما راح ياخذ راحته و هذي مجرد مجامله

نجي للبزران هم يشوفونك كبير و لو عطيته وجه يبي يبلشك ( لا و المشكله لا كان بعمرك تقريبا لكنه توه ما نضج و انت مجبور تعطيه وجه يا ليل القلق )

لذلك بهالسن الواحد يحب اخوياه و الطلعه معاهم و ما يمل من الجلسه معهم لانهم في نفس سنه و نفس عقليته لانه هو اختارهم مو الزمن اللي فرضهم عليك ( زي بعض عيال عمي المبزره )

و خل نروح للعائله من المشاكل اللي اواجها معهم في هالسن كل ما قعدت معهم قال انت فيك و فيك و فيك وفيك و دايم قاعد عاللاب توب و الله الله بالصلاه و ليش ما تدخل التحفيظ ؟ و ليش انت مهمل بالدراسه ليش ما تذاكر و ليش قعدتك كذا ليش ليش ليش ليش لدرجه ان اخوي الكبير قالي جمله انت بمفترق طرق حوالي الف مره !!!

و المضحك المبكي يقولون ليش تحب الانترنت و 24 ساعه مقابله ليش ما تقعد منا !!!
هذا بلا ابوك يا عقاب كلمه " ليش " هي اللي خلتني ما احب اقعد معكم

يعطيك العافيه عالموضوع بصراحه كنت محتاج افضفض :d:

[سلفستـــر]

مشكلة الآباء هي تهميش دور الأبناء وجعلهم مثل ( الأطرش بالزفة )

طيب ياخوي ماتبي ولدك يسمع هـ السوالف لا تأخذه معك ..!

خله هو يبدأ يتعرف على البيئة اللي حوله بنفسه .

أما سالفة أخذه معي وما ابيه يسمع !

لا سد آذانه بقطنة احسن بعد ..:fi:

والله يا فيه آباء يبطون التسبد من تصرفاتهم الصبيانية ..

فيه آباء تحس ان ولده فاهم أكثر منه والأب من أيام المراهقة

لا يزال مفهي :o

ياصبر الأرض بسس