يا سلطان منتخبنا ملك للوطن وأبناءه .. مهب لك ولناصر

[ابوساري]

السلام عليكم ورحمة الله وبركاته

اكثر شي يوسع صدري .. ان فيه ملايين من الجمهور السعودي يشاركن همي وحزني ..


ياسلطان .. بأي حق يدار منتخبنا بالنظام الدكتاتوري .. ؟

المنتخب للشعب .. المنتخب للجماهير .. لأبناء هالوطن .. ليس حكرا عليك وعلى مدربك ..

أصبتونا في مقتل .. وحنا ننتظر نتائج خططكم .. وصبرنا لأن ما باليد حيله .. والله أقوى وحيلنا ضعيف

ياسلطان صديقك من صدقــَـك .. مهب من صدّقك ..

جميع من هم تحت كنف رعايتك من مسؤولين وإداريين ومدربين .. كلهم جبناء ..

ماعندهم حس وطني .. ولا عندهم إنتماء الا لك وللمادة ..

ماعندك واحد تحت جناحك يقوى يقول لك ( غلط ياصاحب السمو ) ..



بأي حق ياسلطان وياناصر تحرمونا من أبرز نجوم الدوري .. وأكثر اللاعبين خبرة .. وتسجيلا للأهداف

بأي حق يدار منتخب شعب يقدّر بـ 26 مليون نسمة حسب أهواءك انت وناصرك ؟؟



وين محمد نور .. ؟ هل استبعاده فني ؟ .. هل أنت وناصر أفهم من 26 مليون ؟

وش انجازات ناصر أساسا عشان يضم نور او مايضمه .. أو يقيّم مستواه ؟

انجازات ناصر الجوهر حاجتين :

روح اللاعبين اللي خدمته في كثر مرات وخبرتهم

وابرز انجاز .. هو قولته لك ( سم طال عمرك )




أنا مانب متشنج في موضوعي بقدر ماهو صراحة وحرقة على شي مالي به حيلة ..


إبعاد نور لو كان بسبب اخلاقه .. أو بسبب مشكله بينك وبينه .. هو اكبر قرار دكتاتوري ..

مشاكلك الشخصية او مشاكل المدرب مع نور ماتخصنا كشعب ..

نور لاعب كبير .. ووجوده كلاعب خبرة مهم كثير للمنتخب ولاعبيه الشباب .. مهم كثير لروح الفريق

من خلاكم أفهم من النقاد والرياضيين والجماهير عشان تحكموا ان اللاعب يستبعد أو لأ ؟



دكتاتورية قراراتكم حرمتنا من الثنيان في كأس العالم 94 .. حرمتنا من لاعب كبير

بعدها يوم تم السماح للثنيان .. وش تتوقع سوا وهو في عقده الثالث ؟ ..

جاب لك بطولة اسيا والعرب .. وقدم مع المنتخب اجمل المستويات ..

ليش تحرمنا من نور ؟ .. ياخي ارحم شعب كامل وتنازل عن افكارك وقراراتك الشخصية ..

ليه المنتخب يدار بك وناصرك ؟




وش سبب ابتعاد ناصر الشمراني هداف الدوري ؟ .. وافضل مهاجم يسجل اهداف .. ؟

قرار فني ؟ .. اذا هو قرار فني .. ياخي دور لنا مدرب كرة سلة صدقني نحقق به انجاز مايحققه جوهرك



وش سبب عدم ضم محمد الدعيع .. ؟ .. افضل حارس سعودي حاليا .. واكثر لاعب بالعالم خبرة

وجود محمد لو يتسدح مع اللاعبين ويسولف مهم .. مابالك وهو ماسك عرينه ..



عطني سبب واحد يخليك تقدم لنا خطة مدروسة كل سنة .. ؟ .. بتقول نبي نعطي لاعبيننا الشباب فرصة صح

اعرفك ردك مثل دايم .. نعطي شبابنا فرصة نبني منتخب قوي للمستقبل ..

كل سنة لك منتخب وكل سنة لك لاعبين جدد .. وين الفرصة ووين البناء اللي أنتا جاي تؤول عليه ..



والله اني حزين ان منتخبنا يدار بهالعقليات ... وحزين اكثر لعدم تدخل أي شخص بكلمة حق يقوله ..

اقل شي يقول له أنت على باطل ياسمو الامير ..



التحكيم ماظلمنا كثر ظلمك .. والله العظيم ماحترقت من التحكيم كثر حرقتي على حالنا اللي وصلنا له ..

وش فرق نظام صدام عن نظام اتحادنا السعودي ؟ ..





منتخبنا ماراح يقدّم شي .. ماراح يسوي شي بدون وجود لاعبين مؤثرين على مستوى وروح الفريق ..

وهالشي ماراح يتحقق بلبس البشوت و التصاريح والخطابات ..

يتحقق بالعمل المدروس مهب بالعلم المديوس والمهروس ..



وجودك ووجود ناصر في المنتخب هو اللي ضيعنا .. ناصر صار مساعد مدرب او مدرب .. ضيعنا وضيعنا معه


من ثمانية ألمانيا والثلاث محاور ما تأدبتوا ؟ ..


يا سلطان الله في كتابه خاطب البشر بأولي الألباب .. وأفلا تعقلون .. وأفلا تفكّرون ..

لأن الله خلقنا نفكر ونعرف الصح والغلط ..

مايصير تجي وحدك ومع حاشية من المنافقين لشخصك و تعلموننا اننا على خطأ وانكم الصح ..



حسبي الله ونعم الوكيل .. حسبي الله ونعم الوكيل


تأكد .. إن المنتخب ملك لنا كجمهور .. ووجودكم فقط عشان نشوف منكم عمل صحيح يسعدنا كشعب

شعب يملك من المواهب مايكفي لمقارعة منتخبات عالمية .. قتلتوها بنظام الدوري الميّت والقرارات الغبية

مواهب انذبحت وهي بالمهد بسبب ان المنتخب صار يلعب به اي واحد يسجل هدف بالدور او هدفين ..



لن نقدم شي في التصفيات وحتى لو تأهلنا ماراح نقدم شي في كاس العالم ..

اذا كان المنتخب يدار بهالطريقة ..

خلوا المنتخب صعب تكفون .. لاحد يلبس شعار الوطن الا اذا هو قد مسؤولية لبسه

واتركوا المنصب لغيركم .. اتركوه للرياضيين القدامى واللاعبين اللي حققوا انجازات ..

ونبي نشوف منتخبنا عنصر ثابت في كل كأس عالم ..


والسلام

[البطل نواف11]

حسبي الله ونعم الوكيل ..

والله مقاله تولج الصدر :heart:

شكرا اخوي ..

[بحريني]

دام الخطط العلميه المدروسه شغاله فالله يعينكم يا سعودين

[In SeOul]

آصبــت كـبد الحقيقـــــه .. وعينـي عليك بآردهـ ,, ولكــن !!!

قآلوأ آنفخ يآشريم قآل ما من برطـــم ,, !!:Bad:

بصراحه انا كنت حاس بالهزيمه قبل المباراهـ ..

وتأكدت بعد المباراه والمستوى الهزيل !!:cry:

طبعا بحكم وجودي في كوريا .. سألني احد أصدقائي الكوريين عن نــور؟!
قلت له مصاب !!!! هل تريدني ان اقول له مايلعــــب بسبب دكتاتوريه الاتحاد السعودي!!:hgfd:

طبعا يوم قلت مصاب قال لي وبكل ثقه : سنفوز عليكم وفي الرياض !! قلت له ليش كل هالثقه ؟؟

قال : ياسر القحطاني مابيلعب بسبب الاصابه ومالك احتمال مايلعب الا شوط واحد فقط بسبب الاصابه ايضا .. ونور ليس بالتشكيله .. اذا سنفوز !!!!:amle:

طبعا الصحف الكوريه الرياضيه هاليومين اللي قبل المباراهـ كلها عن ياسر ومالكـ القصير السريع مثل ماقيل بالصحف !!:d:

طبعا صار اللي صار واكلنآ اثنين وكنت ادعوا الله ان لا يجي الثالث .. فيكفي ذل هدفين وفي ارضنا وبين جمهورنا !!
ولكـــن وعدته بأن نثأر بأذن الله في مباراهـ الاياب هنا في سيئول:yarab: .. لعل وعسى الى ذلك اليوم ان يتغير النظام الدكتاتوري.. ونشوف منتخب يستحق ان يشارك في مونديال كأس العالم 2010 ..

[هلالي تنومة]

احلى شي ان الله انطقه بالحقيقه بعد سنين وسنين من ظلم الهلال واستقعاد الاتحاد الاسيوي للرشاوي و الفساد انطقه بالحق واقر واعترف بفساد الاتحاد الاسيوي ولايهون الغبي بليد بن بيان صاحب بيان دعم بن همام ومنحه العضوية الشرفيه

[[messi]]

عايشه ما بيده شي

هو مثل الريموت كنترول يديره سلطان وأنو

الحل تغيير جذري في الاتحاد السعودي

لأن المسكنات ما عادت تنفع !!

[أزرق مرح]

الخطط المدروسة بكرة بتصير أو بعده

ودي سلطان يكون قده ويقول أنا منب كفو ويعتزل الكرسي ولا يأخذه معه لبيته


ويجي غيره يمسك الرياضة صح

[يوسف الثنيان لاعب فنان]

بيض الله وجهك يابوساري

ماقلت الا الحق ..

هل بالامكان صحفي او كاتب يكتب بمثل ما كتبت
لا اعتقد فهم منافقين وبتشوف بكره العنواين

(الاتحاد الآسيوي ومؤامراته ضد الكرة السعودية)

(الحكم الجبان يحرم السعودية من فوز مستحق)

وبتشاهد الجمل التالية بكثرة
(لم يكن بالامكان افضل مما كان)

(عملنا ما علينا لكن ان تلعب امام فريق ومعهم حكم وبرعاية من الهمام فعليك ان تستلم للهزيمة)

لازم علشان تنضم مع المنتخب لازم معك شهادة حسن سيرة وسلوك وتقدمها للمرشد الطلابي المصيبيح وينظر بأمرك ..

نور والشمراني وحسن معاذ والدعيع وكريري والمحياني مستبعدون لاسباب مجهولة بمقابل ضم هزازي اللي مالعب عشر مباريات مع فريقه والسلطان اللي بتنتهي البطولة وهو ما سجل والاناني احمد عطيف لأنه شقيق عبده فهو اساسي مع المنتخب .. متى صار بالمنتخب اخوان يمثلون المنتخب الا في عهد الجوهر

مشكور على الموضوع المميز والصريح جدا ..

[شقردي الهلال]

والله يوم جا بن حمام الاتحاد الاسيوي والهلال مخذ اسيا اتوقع منه وكلامك عين العقل اخوي

[زعيم الزعماء]

صح لسانك ابو ساري ,,,

كلامك اصب الحقيقه كامله والمنتخب ملك الشعب وليس ملك _ سم طال عمرك _ .

نريد ان يكون هناك تصحيح كامل نريد ان نرجع عن قناعات المدرب البرازيلي نريد مدرب اوربي عالمي ,,

لماذا لانفاوض مورينهو على سبيل المثال لماذا لا يدرب منتخبنا مدرب اوربي علما ان الدوري السعودي لايوجد به اي مدرب برازيلي ,,

لماذا نور والخطأ بابعاده عن تمثيل الوطن اليس نور لاعب سعودي ,,, هل يحمل بطاقه احوال ام اقامه وله كفيل ؟

[الإعـ20ـصار]

ما قاله سلطان بن فهد يدل على ضعفه لما ينهزم فريقك و تتهم التحكيم في كل مباراة

في ربع نهائي آسيا للشباب قالها و في مباراة إيران قالها و الآن قالها و بشدة أن التحكيم هو السبب

للأسف نحن كما قلت تحت دكتاتورية و عنصرية من سلطان بن فهد و نواف بن فيصل (( توم و جيري ))

[هلالي بجنون]

يابو ساري لاتعلييييييييييييييييييييييييييييييييييييق قسم بالله كل اللي بقلبي ابيه يطلع طلعته لي بكتاباتك وصدقت المنتخب ملك للجمهور لكن لاحياة لمن تنااااااااااااااااادي :(

[Aimar 16]

يـ بعدي جبتها على الجرح .. وأقفيت ..

حرااام والله كل من هب ودب يصير أساسي بـ المنتخب !! هزازي ليش يلعب ؟؟ وين المحياني ؟؟ وين الشمراني ((هداف الدوري)) بل أكثر لاعب سعودي يسجل أهداف .. وين نور ؟؟ الشلهوب ليش يلعب ؟؟ ولا علشان مستواه السابق ؟؟

يوووه آسفين يـ طويل العمر :(( نسيت إنه منتخبك أنت .. هذا هو منتخبك اللي شريته بفلوس أبوك .. وأكرر أسفي لـ تدخلي في أمورك الخاصه :(( ..

إلا تكر ذا و وش يصير ؟؟ لاعب كوره ما أظن :) ..


الكره السعوديه ستبقى في الأسفل حتى يذهب طويل العمر ..

[j.zanetti4]

لله دركم يا زعماء تطالبون بلاعب أتحادي

والمصفرين يهمزون ويلمزون ويغمزون بأي لاعب هلالي في المنتخب

حتى سموه المنتخب الكحلي

حتى الكابتنية ما سلمت منهم واليوم الكابتنية مع رضا ولا هلالي تكلم



لله دركم لله دركم