المساعد الشخصي الرقمي

مشاهدة النسخة كاملة : رحلة الاعضاء لسطح القمر ...!!!!

المتميز
18/6/2002, 13:22
السلام عليكم ...

هالموضوع يحمل افكار عديده ومهمه وانا أحاول هنا ان اطرحها بأسلوب خفيف وسهل وممتع للاعضاء , أبطال القصه هم بعض الداجين والداجات من المنتدى وفي هذا الجزء البدايه اما الافكار التي اريد ايصالها فهي عبر الجزء الثاني باذن الله ...


مقدمه ....

دائما نسمع تصاريح لبعض العلماء الغربيين عن نفيهم لوصول احد لسطح القمر وهم بذلك يكذبون وينفون ماتتدعيه بلدانهم من وصولها لسطح القمر ومن هذه الدول امريكا ووكالات الفضاء الامريكيه ناسا ...

فلذلك اليكم هذه القصه ....................

رن جوال اخونا الحبيب الاولاني في الصباح الباكر .........

الاولاني : الو ...
المتصل : الو مرحبا ...
الاولاني : هلا
المتصل : اخوي الاولاني هذي رساله من قبل وكالة ناسا لكم.... حنا (وكالة ناسا ) بعد الشائعات اللي انطلقت ضدنا من قبل الدول العضمى معلوماتيا وفضائيا قررنا اننا نطلق رحله فضائيه للقمر وللمريخ وطبعا احترنا من يطلع على متن هالرحله فقررنا انه لابد يكون المسافرين من دوله محايده لانه لو اخترنا مسافرين من عندنا ... قالو ايه من ربعهم وبيكذبونا ... ومانقدر نطلع احد من عندهم علشان مايسرقون معلوماتنا فاخترنا انهم يكونون من دوله محايده ..... وبما ان دولتكم تتمتع بعلاقات طيبه مع الجميع اخترنا انه يكون المسافرين من بلدكم هذا من ناحيه آما من ناحيه ثانيه احترنا مين بنختار من بلدكم بس سمعنا انه فيه منتدى من اشهر المنتديات في العالم كما ونوعا وانه فيه شباب جيدين فقلنا بدال مانتعب وندور نكلمكم وانتم ارسلولنا شباب بمعرفتكم يطلعون على الصاروخ آلي الفضاء ....

الاولاني : ( بعد تتنيحه بسيطه ) ...طيب اخوي عطونا فرصه نرتب اوضاعنا ونفكر ونرد عليكم ..
المتصل: اوكيه نتصل عليكم بعد اسبوع .....وعلى فكره عدد الركاب لايتعدون الثمانيه ....
الاولاني : ابشر و حياك الله في امان الله ...

الاولاني ماصدق يقلبها يمين يسار يمكن مزحه من احد الشباب لكن شاف ان الرقم من امريكا من بيمزح معه من هناك ....
الاولاني طلب ( المشرفين ) على المسنجر لامر عاجل ...

ياشباب اليوم صار معي كذا وكذا ......الخ

ردوا عليه الشباب : مادام اتصلوا عليك حنا والله نثق فيك ونحترم رايك تصرف انت واختر الاعضاء ولاتنسانا
الاولاني المسيكين تلخبط مايدري وش يسوي من يختار عدد الاعضاء حول الثلاثة الاف وفيه اخوان عزيزين والمشرفين اساسا يتعدون الثمانيه ولايقدر ياخذ المشرفين لانه لو اخذهم لعبوا الاعضاء بالمنتدى لعب :D:D:D

المهم الرجال استخار وقال ياولد مابدهاش ....

ابختار سته رجال وبنتين عشان مايزعجونا حقوق المراه :D:D:D

بس من اختار ( الاولاني يفكر ) ياولد مابدهاش اربعه ابختارهم عن طريق القرعه ......واربعه ابختارهم انا ..

اول اسم طلع هلاليه بالفطره ( ياحضها ) ....

ثاني اسم ......هاوي الهلال

الثالث سداحوه .....

الرابع الوصال ......

زين هذولا بالقرعه طيب من اختار .... اول شي طبعا انا ...يالله صرنا خمسه و يالله ناخذ ابراهيم النجيدي لايحشنا وسفر المرزوقي لايحط فينا عمل سويتش يشوه صورتي وابو حسين بعد هذا حق كمبيوتر ويخوف لايلعب باجهزتنا ويحوسنا لازم ناخذه

بعد اسبوع ....رن التلفون ..

المتصل : الو الاولاني كيف حالك ..

الاولاني : يتنحنح (توه قايم من النوم ) هلا ..

المتصل : الاولاني هاه جهزت الاسامي ...

الاولاني : ايه نعم ...

المتصل : كويس خلاص بيجيكم واحد ويخلص كل اموركم ...

المهم الاولاني اتصل وارسل ايميلات للمحضوضين السبعه يبشرهم ........ويجهزون امورهم ...

سفر الخبيث يوم عرف ويتصل علي ويعلمني ...هلا فيصل كيف حالك ...

انا : هلا سفر وش تبي ,,,,,,,,,,,,,, سفر : ابد بس ابعلمك وش صار .....

المهم هو علمني ولا ماعلمني ويضيق صدري واتكدر انا من يوم اني صغير حلم حياتي اروح للفضاء من يوم الامير سلطان بن سلمان راح وانا ودي اروح واطالع السماء وامنيتي اوصل للقمر ...

المهم ودقيت على الاولاني ...... واتطلبه تكفى ابروح معكم الله يرحم والديك خذوني ...

والمسيكين : والله يا يافيصل ماقدر وكثير كلموني بس ماقدر الظروف وحكمت

قلت الاولاني (اقولها وانا معصب ) علم يوصلك ويتعداك ابروح يعني ابروح وابدبر واسطه ...ولا ابسويبكم زي القصبي يوم يلف اذانه وبنشرت الكفرات .........

قال من وين الواسطه .. قلت ماهو شغلك اعرف ناس بالخطوط يدبروني قال وش دخل الخطوط ؟!
قلت مدري لاواعرف واحد بالمرور (علي نياتي ) بعد اكيد واحد منهم بيدبرني ( ياناس ابروح )...قال الاولاني مااحد يقدر يفيدك .....

المهم واجلس ادعي للاولاني واتطلبه .....بس ماش الرجال مهوب بيده ....قال عموما ابشرط عليهم ناخذ اثنين بعد وانت واحد منهم قلت منهو الثاني قال باواو قلت زين ........

بعد كم يوم دق علي سفر قال هاه بتروح قلت مدري ......

قال: منت قدها انت وخشتك لا ومتميز بعد وخر بس ...

قلت : ايه انا متميز باني اعرف اسكت اشكالك جعلك ماتروح انت ووجهك اللي كانه كمبياله مستحقه الدفع :D:D:D

قال زين .... وسكر بوجهي ...:(:(:(

عقبها دق الاولاني ...هلا يافيصل كيف حالك ابشرك بتروح معنا جهز اغراضك وهات جوازك نسويله تاشيره من امريكا ..... قلتله وانا طاير من الفرح ابشر بس ماعلمتني كم القطه !!!!!

قال أي قطه الروحه على حسابهم لا وبيعطونا فلوس بعد ..قلت الله يبشرك بالخير .....مع السلامه

واتصل على سفر واعلمه قال زين بس ماودك يعطونا فلوسنا مقدم وندز للشام ونلحقهم

قلت انا ماعندي مانع :D:D:D

(بس رفض الاولاني قال نمشي من هنا كلنا )....

المهم خذو جوازاتنا وقالوا يوم الثلاثاء الوعد المطار .....

انا ودعت امي واخواني ودعولي بس ماش ماخش مزاجهم ان الروحه للفضاء يخبروني انصب عليهم اقول رايح للشرقيه واطلع انا وسفر بس الفضاء عاد مره وحده ....قويه

المهم جينا للمطار ولاكل الشباب موجودين ومعهم عفشهم بس ابراهيم النجيدي عفشه زايد جايب معه دلال وبرقان وهيل وكل المستلزمات ..(يحسبها كشته) ......

ورفضوا يدخلونهن بحجة العفش الزايد ......

وسافرنا بعد التوكل على الله حنا العشره ووصلنا لامريكا .......

قالوا الليله بتنامون في واشنطن وتسلمون على اعضاء الكونغرس بكره وتطلعون بعدها لمدينة هيوستن في تكساس للتدريب لمدة اسبوعين ..... وبعدها تروحون لفلوريدا علشان الانطلاق بيكون من هناك ....

المهم صحينا واخذونا للكونغرس وسلمنا على السيناتورات الامريكان ورحبوا فينا الجماعه وقالوا هذي فرصه ماحصلت حتى لابناء امريكا فلا تخذلونا .......

طرنا لهيوستن وسكنونا في القاعده هناك حنا يالشاب كل اربعه بغرفه ..والبنات لحالهم في غرفه .....

وعلمونا بالجدول كل يوم تدريب من الساعه 8 الصباح آلي 6 مساء واول يوم واخر يوم اجازه ...

طلعنا اول يوم وتمشينا كل واحد على راحته .........

انا والاولاني وباوواو ورامبو الاطخم سوا والبنات معنا .....ونوينا نروح لمعالم هيوستن ...

والباقين نووها على الملاهي (مهوب ليليه) بيلعبون ومعهم هاوي الهلال يداريهم وابو حسين يتوعد ترى اللي بيزعجنا بنحذف كل مواضيعه عبرة له ولغيره .........

وبعدها بدا العمل المتواصل لمدة اسبوعين ....... كانوا يدربونا ببدلات فضاء وفي اجواء تنعدم فيها الجاذبيه ..

والحمدالله ماوجهنا أي مشاكل باستثناء البنات الله يستر عليهم ويجزاهم خير رفضوا يرمون العبايات ويلبسون البدل فعدلوا في تصميم البدلتين عشان يناسبهم وهم لابسين العبايات :req: :req: :req:

وانتهينا من التدريب وسافرنا آلي فلوريدا للاقلاع آلي الفضاء ......................................................

اكمل لكم في الجزء الثاني .........وشكرا
القطوه النيكل
18/6/2002, 13:47
ليش يعني نسيتني؟؟؟؟:cry: :cry: :cry: :cry:
مفروض ماتنساني لاني نيكل واروح واناماالبس:p
عمومامشكورواتمنى تاخذني المره الجايه..
ومن جد الله يخلي لك هالخيال الواسع...
مشكور وماقصرت:magkiss:
Full Moon
18/6/2002, 15:27
هلا وغلا بالمتميز..


القصة رايقه وحلوه..

تحمست معها كثير رغم اني قد قريتها..

بس القصص الحلوه ماينمل منها..

وننتظر الجزء الثاني وياليت تعجل فيه..

وربي يوفقك ويخليك..
برستيج
18/6/2002, 15:43
:D :D :D :D :D :D :D :D


هلا بالمتميز


الله يرجك .. :D



هالموضوع يحمل افكار عديده ومهمه وانا أحاول هنا ان اطرحها بأسلوب خفيف وسهل وممتع للاعضاء
افكارك واضحه .. <<=== صفقني ان كان فهم شي .. :D




يمكن مزحه من احد الشباب لكن شاف ان الرقم من امريكا من بيمزح معه من هناك ....
يا خي ما يبغالها .. اكيد شقراوي .. :angel:




ولايقدر ياخذ المشرفين لانه لو اخذهم لعبوا الاعضاء بالمنتدى لعب
واللي يرحم والديك خذهم معك وريحنا منهم شوي .. :kany: .. ولا تخاف انا بانتبه للمنتدى .. (himo) .. (rambo)




طرنا لهيوستن وسكنونا في القاعده هناك حنا يالشاب كل اربعه بغرفه ..والبنات لحالهم في غرفه .....
ليش الدعوه في امريكا مو خلطي .. :ignor: .. :angel:




تسلم حبيبي ابو وندي .. وبانتظار الجزء الثاني .. :yes:
Alghaly
18/6/2002, 15:59
مرحبااااااااااااااااااااااااااا

الله عليك قصه حلوه وفي انتظار الجزء الثاني لا تتاخر علينا
الطيرالهلالي
18/6/2002, 18:34
السلام..

مااارح ارد عليك الا الين اسمع الجزء الثاااني:yes:
هاوي الهلال
19/6/2002, 12:32
هااايااات

هلا فصولي :love:

الاولاني طلب ( المشرفين ) على المسنجر لامر عاجل .
بس تتوقع ان المشرفين تجمعوا كلهم :req:
يمكن بس محمد كان نايم وسفر عندهم عزيمه :D :D :D :D :D


المهم الرجال استخار وقال ياولد مابدهاش ....
استخار كيف :yuupy:


الاولاني : يتنحنح (توه قايم من النوم ) هلا ..
تلقى المتصل قاله موقفه :D :D :D :D :D :D


والباقين نووها على الملاهي (مهوب ليليه) بيلعبون ومعهم هاوي الهلال يداريهم
لاا ماابي ابي اروح معك :cry: :cry: :cry: :cry:


بس حررركه الموضوع
منتظرين الجزء الثاني

بس لي عندك طلب بابا فيصل :kany:
لين رجعنا من القمر نمر مصر يومين وبعدين نرجع :D :D :D


باااياات
خالد
(himo)
الغالي حسين
20/6/2002, 07:52
هلا بك والله ,..



تسلم والله على هالخيال الرائع ...


وابو حسين يتوعد ترى اللي بيزعجنا بنحذف كل مواضيعه عبرة له ولغيره .........

ياحليله ابو حسين ... يعرف يشكمكم ..:D :D :D :D




تسلم والله ,, وننتظر الجزء الثاني ,,:)

تروحون وترجعون لنا بالسلامه .:)
هلاليه بالفطره
20/6/2002, 16:14
اول اسم طلع هلاليه بالفطره ( ياحضها ) ....
:yuupy: متاكد ان هذا حظي , والمشكله انه طلع اول اسم :D

اقول مايصير نمر زحــــ:love: ــــــــل شوي نشم هواه كيف :D لاني رحت من قبل القمر :kany:
وصار نفسي نزور زحــــل :rolleyes:

ها ويش قلت :angel:
ياسر عبدالعزيز
21/6/2002, 00:22
هلالالا بالغالي المتميز:)

الله يرجك......على الموضوع.........:angel: من جد خيال وااااااااسع:D


تحيااااتي لك:yes:
رهام(RGH)
2/10/2002, 19:50
الله يرجك على موضوعك


رهام الملاك
مدرعـم
2/10/2002, 21:21
السلام عليكم ...
وعليكم السلام .. اشلون المدرسه ههههههههههه:D :D

هالموضوع يحمل افكار عديده ومهمه
كل شي الا السياسه <<---------- وش يبي ذااا :D :D

وانا أحاول هنا ان اطرحها بأسلوب خفيف وسهل وممتع للاعضاء
هذي وجبة الافطار :love: :love:

دائما نسمع تصاريح لبعض العلماء الغربيين عن نفيهم لوصول احد لسطح القمر وهم بذلك يكذبون وينفون ماتتدعيه بلدانهم من وصولها لسطح القمر ومن هذه الدول امريكا ووكالات الفضاء الامريكيه ناسا ...
ياحبيبي كله نصب :angel: .. اجل علم فوووق سطح القمر ويرفرف :yuupy: :yuupy: .. سعواااال يبزخ نفسه بالنعله وبعنف .. كيف يرفرف ومافي هواااااء (rambo)

الاولاني : ( بعد تتنيحه بسيطه ) ...طيب اخوي عطونا فرصه نرتب اوضاعنا ونفكر ونرد عليكم ..
لعنبووووو الثقل :D :D .. يعجبني ههههههههه:yes:


الاولاني ماصدق يقلبها يمين يسار يمكن مزحه من احد الشباب لكن شاف ان الرقم من امريكا من بيمزح معه من هناك ....
يمكن الولد بووووووووش :D :D تعرفه شقي :kany:


والمشرفين اساسا يتعدون الثمانيه ولايقدر ياخذ المشرفين لانه لو اخذهم لعبوا الاعضاء بالمنتدى لعب
يعني الى هذي الدرجه سمعة اقتصادنا سيء (( وش دخل الاقتصار الحين :D ))


الثالث سداحوه .....
حتى الشيووووون يبووون يروجون القمر :D :D عز الله جاله خسوووووف مدري كسوووووف .. الي هوو (( توهق :D ))


المتصل : الو الاولاني كيف حالك ..
طلع يعرفه خخخخخخخخخخخخخخخ:D :D


المتصل : كويس خلاص بيجيكم واحد ويخلص كل اموركم ...
عالسالفه ذي صرنا كنا بنغاليين هههههههههههه:D :D يبون احد يكفلهم :D

المهم هو علمني ولا ماعلمني ويضيق صدري واتكدر انا من يوم اني صغير حلم حياتي اروح للفضاء من يوم الامير سلطان بن سلمان راح وانا ودي اروح واطالع السماء وامنيتي اوصل للقمر ...
اهئ اهئ :jhgy: :jhgy: نفس حلمي بس تهقى فيه حمام هناااااااااااااك (rambo)

....قال عموما ابشرط عليهم ناخذ اثنين بعد وانت واحد منهم قلت منهو الثاني قال باواو قلت زين ........
شفت اشلووووون الواسطه .. ياشخصيه ياانا .. طول عمري اقول حق نفسي باني انا شخصيه ولي مستقبل .. تقولي """ رح انت قوطي .. ومكانك الشارع .. """":angel:


المهم صحينا واخذونا للكونغرس وسلمنا على السيناتورات الامريكان ورحبوا فينا الجماعه وقالوا هذي فرصه ماحصلت حتى لابناء امريكا فلا تخذلونا .......
حتى انهم من عاداتهم تسلم عالرجال .. وتبوووس المرا (( ياشيييييخ والله ناس طيبين (rambo) ))


والحمدالله ماوجهنا أي مشاكل باستثناء البنات الله يستر عليهم ويجزاهم خير رفضوا يرمون العبايات ويلبسون البدل فعدلوا في تصميم البدلتين عشان يناسبهم وهم لابسين العبايات
الله يرجهم .. يفشلون صجججج .. اودي وجهي فين <<--------- اقول انثبر بس :D :D




ننتظر الجزء الثاني :angel:



دمت ظهراً ,,


تشا1111ووووووووو
جـــلال
2/10/2002, 21:40
متميز كأسمك,,

ولايقدر ياخذ المشرفين لانه لو اخذهم لعبوا الاعضاء بالمنتدى لعب
أفاااااا وجلال فين رااااااح!!!!!!!(مافي اشراف لو تمووووووت),,:jhgy: :jhgy:

اول اسم طلع هلاليه بالفطره
واسطاااااه واسطه هوه هوه,,(rambo) (rambo)

فعدلوا في تصميم البدلتين عشان يناسبهم وهم لابسين العبايات
أسم التصميم " Mokhassar Moon " أظن كذا!!!:D :D

تحياتي لك يافيصل,,



الواد باو واو :

ياخي باين عليك منت وجه فضااااء والا ماالومك على هذا الرد اللي أطول من الموضوع نفسه ,,:D :D

غووووور منك لله يامقرم,,(himo) (himo)

تحياتي لك,,
قرقو
2/10/2002, 22:14
هلا بالمتميز
الا على فكره ترا لازم تفصخ النظاره عشان ماتطير هناك
وانتبهو لسداح لايضيع ..........

تحياتي لك
POWER
2/10/2002, 23:38
هلا والله فـيـصـل :)

وابو حسين يتوعد ترى اللي بيزعجنا بنحذف كل مواضيعه عبرة له ولغيره .........

اذا سافرنا يبيلي واحد يمسكني ولا يحذف مواضيعي :angel: !!!

عليك موضوع :D قمة في الدجه..:yuupy:

يسلمو يالغالي :D
المتميز
3/10/2002, 12:04
مشكورين كلكم ...

بس من رجع ورفع هالموضوع ؟؟

<====<< عجزان ينزل الجزء الثاني :D :D :D

يالله بكره ولابعده ننزل الجزء الثاني انشاءالله

وشكرا لكم مره ثانيه اخواني :):):)
ابراهيم النجيدي
27/12/2002, 16:45
http://d1d.net/net/himo/motamyyz.gif
عاشق شبكة الهلال
21/1/2003, 23:38
<<========= يقوول ورى ماخذته معك يا الأصفر :lkj:

<<========= ماراح ياخذك معه للسفر ثانية الى؟؟؟؟؟


وندي <<===========>> :jeng::jeng:
sodos
12/3/2005, 13:38
هلا بالمتميز
الا على فكره ترا لازم تفصخ النظاره عشان ماتطير هناك
وانتبهو لسداح لايضيع ..........

تحياتي لك
سلطاااان الهلالي
29/9/2006, 19:25
الله يرجك على هذا الموضوع
نايف السبيعي
17/11/2006, 23:13
هههههههههههههه

شكرا
zaeem N.Z
23/1/2007, 06:28
هلا وغلا بالمتميز..


القصة رايقه وحلوه..

تحمست معها كثير رغم اني قد قريتها..

بس القصص الحلوه ماينمل منها..

وننتظر الجزء الثاني وياليت تعجل فيه..

وربي يوفقك ويخليك..
@البدر@
21/4/2007, 18:58
قصة جميلة ورائعة
الكـا 20 ســر
16/7/2007, 21:39
ليش يعني نسيتني؟؟؟؟:cry: :cry: :cry: :cry:
مفروض ماتنساني لاني نيكل واروح واناماالبس:p
عمومامشكورواتمنى تاخذني المره الجايه..
ومن جد الله يخلي لك هالخيال الواسع...
مشكور وماقصرت :kany:
قانون الجاذبيه
17/7/2007, 16:12
مشكور