المساعد الشخصي الرقمي

مشاهدة النسخة كاملة : نصــائح خاصه لمشرفينا قبل السفر....

جـــلال
13/12/2001, 23:04
بمناسبة مغادرة أحبتنا المشرفين أرض الوطن أقدم لهم نصائح عساها تنفعهم....


- لاتكن مطفوقا..وكنك ماشفت خير..وتروح تزحلق على ثلوج جبال الألب....وتنفك ركبتك وتصاب بمصع برقبتك...والبرد يفحط بك...وعلى اثر ذلك تقوم تنافض..وتبلش بعمرك لأنك مالقت احد يكوي عندهم....واخيرا اقولك..ترى ثلجهم..راس ماله نفود بس ابيض..


- اذا صرت ماتعرف تكلم يوناني..وش موديك لأستراليا مدري امريكا...وتسوي نفسك اطرم...نصيحة ضف خلاقينك ( قشك - عفشك)..وخل عنك السفريات..وترى يمدحون الشرقية ولو انه حر..بس تحمل في سبيل الوطن...


- اذا صرت من اللي يحطون بخور..ومدري ايش..فهذا سوف يسبب ان يشتغل جهاز انذار الحريق..ويطبون عليك الدفاع المدني وانت ماتدري وش السالفة..وتباد تراكض منهبل..فيقوم راعي الشقة بطردك...لأنك هبلت بالدفاع المدني حقهم...


- اذا قمت بزيارة للملاهي..وشفت البزران ينابطون...وبديت تتحمس..وودك تعيد ايام منول..بالمنابط..لأن بك طفولة متأخرة....ومن حيث انه برا محد يعرفك...فاتستغل الفرصة....المهم من الموضوع..حزام البنطلون لايطيح وانت في غمرة المنابط..


- في بريطانيا..لاتقطع الشارع رجلية..كماتفعل هنا...لأن هناك الدعوة مقلوبة..فتصير انت تناظر يسارك..ومافيه احد..وتقطع الشارع..ماتدري الا راعي تاكسي..من اليمين يجي طاير ويقشعك..مايردك الا ماصورة مكتوب عليها ذكريا ديفيد..وترجع لنا بصندوق...


- لا تنس تاخذ معك فروة..لأنك لوتفحط ماتلقاها هناك...


- خل عنك التشمس لأنك خلقة صاقعتك الشمس هنا...ومملوح بعيون الأجانب...والا تبي ترجع مانعرفك الا اذا اخذنا النيقاتيف لوجهك..


- البس اللي تبي..بس ركز على الألوان...حركات برتقالي مع بنفسجي ماتمشي...عاد تصير كنك علم موزنبيق الوطني...


أدري الدعوه سوريه بس وش نقول حانقين عليكم:D وترجعون بالسلامه
ســ9ــامــ9ــي
13/12/2001, 23:27
جهز الشنط يا ولد :) :) ...

عالم بتعيد ان شاء الله في أجواء رهيبة وناس مالها إلا الطعوس وتخب :D :D ...

وأنت يالداج مالقيت تنصح إلا اعمامك الكبار :rolleyes: :rolleyes: ...

أنصح الداجين اللي مثلك :D :D ...

ولك تحياتي ياغالي ...

أخوك / سفر المرزوقي .
صمام الامان
13/12/2001, 23:59
هههههه حلووة نصايحك يامستر جلال
وكل اللي يبي يتعيدون برة يرجعون سالمين غانمين ان شاء الله :)
هاوي الهلال
14/12/2001, 00:22
هلا فيك Mr.jalal

.. الظاهر انك تقصد سفر بهالنصايح ... :D
علشان كذا زعل سفر ..


اشوفه حقد عليك

الله يعينك الحين .. بيستقعدلك سفر :D :D

تحياتي
خالد
جـــلال
14/12/2001, 21:39
مساء الخير وحيا الله أخواني بالمنتدى...

سفر المرزوقي:ياحليلك مبسوط أول مره يطلع من الرياض..:D :D حده حد العليا :p
(وأنت يالداج مالقيت تنصح إلا اعمامك الكبار ) الله أكرمك بالاشراف والا عارفين مقدارك يابو الارانب:D :D
وصدقني انه مافيه داج في الجزيره العربيه كلها مثلك..
وتقبل فائق أحترامي وتقديري..

صمام الامان:امين الله يسمع منك ومليون شكر ياالغالي...

هاوي الهلال:بالله وش رايك فيه ننصحهم نصايح تنشري بالفلوس ويقول يالداج وماادري وشو:(
لكن وش نسوي حبايبنا ونصيحتهم واجب..وياهلا فيك والله